ប្រធានាធិបតីស.រ.អា. លោក ដូណាល់ ត្រាំ បានប្រកាសភាពអាសន្ននៅទូទាំងប្រទេសជាតិដោយបើកផ្លូវឱ្យមានជំនួយច្រើនជាងមុនពីរដ្ឋាភិបាលសហព័ន្ធទៅឱ្យរដ្ឋនិងទីក្រុងដើម្បីប្រយុទ្ធប្រឆាំងនឹងការរាតត្បាតនៃមេរោគវីរុសកូរ៉ូណា។
លោកប្រធានាធិបតីបាននិយាយកាលពីរសៀលថ្ងៃសុក្រ នៅក្នុងសន្និសីទកាសែតមួយតាមទូរទស្សន៍ផ្សាយនៅទូទាំងប្រទេសដោយផ្សាយចេញពីសួនផ្កាកុលាបនៃសេតវិមានថា «យើងនឹងយកជ័យជម្នះលើការគំរាមកំហែងដោយមេរោគវីរុសនេះ»។
លោក ត្រាំ បានប្រកាសភាពមានអាសន្ននៅទូទាំងប្រទេស ៥ដងរួចមកហើយ ហើយលោកបានរងការគាបសង្កត់ពីក្រុមប្រជាធិបតេយ្យដែលជាក្រុមប្រឆាំងកាលពីប៉ុន្មានថ្ងៃមុននេះឱ្យលោកចាត់វិធានការបែបនេះនៅពេលដែលពួកអភិបាលរដ្ឋ និងពួកអភិបាលក្រុងនៅទូទាំងស.រ.អា.បានប្រកាសភាពមានអាសន្នដោយបញ្ជាឱ្យមានការលុបចោលការប្រមូលផ្តុំសាធារណៈ និងការបិទសាលារៀន។
សកម្មភាពនេះរបស់លោកប្រធានាធិបតីនឹងបើកប្រាក់រាប់សិបពាន់លានដុល្លារពីមូលនិធិជួយសង្គ្រោះគ្រាមានមហន្តរាយ។ វិធានការនេះអនុញ្ញាតឱ្យរដ្ឋមួយសុំដល់រដ្ឋាភិបាលសហព័ន្ធឱ្យបង់ការចំណាយ ៧៥ភាគរយនៃចំណាយនានាដូចជាពួកអ្នកធ្វើការនៅពេលមានអាសន្ន, ការផ្គត់ផ្គង់ឧបករណ៍ពេទ្យ, ការធ្វើតេស្ត និងការចាក់ថ្នាំដើម្បីទប់ទល់នឹងមេរោគវីរុសនេះដែលអ្នកជំនាញខាងជំងឺឆ្លងខ្លះព្រមានថា អាចច្រើនលើសលប់លើប្រព័ន្ធថែរក្សាសុខភាពរបស់ប្រទេស។
លោក ត្រាំ បាននិយាយថា «រដ្ឋទាំងអស់ត្រូវបង្កើតមជ្ឈមណ្ឌលកិច្ចប្រតិបត្តិការគ្រាមានអាសន្នជាបន្ទាន់ហើយមន្ទីរពេទ្យទាំងអស់ត្រូវតែអនុវត្តផែនការកិច្ចប្រតិបត្តិការគ្រាមានអាសន្នរបស់ពួកគេ»។
លោកក៏បានប្រកាសដែរអំពីការទិញប្រេងយ៉ាងច្រើនសម្រាប់ការបម្រុងប្រេងយុទ្ធសាស្ត្រជាតិ។
លោកបានិយាយថា៖ «យើងនឹងបំពេញប្រងដល់កម្រិតកំពូល»។
លោក ត្រាំ ក៏បាននិយាយដែរថា លោកបញ្ជាឱ្យបដិសេធការបង់ការប្រាក់លើប្រាក់កម្ចីសហព័ន្ធសម្រាប់ក្រុមនិស្សិតរហូតដល់មានការប្រកាសជាថ្មី។
កាលពីព្រឹកថ្ងៃសៅរ៍ សភាតំណាងរាស្ត្រអាមេរិកាំងបានអនុម័តសេចក្តីព្រាងច្បាប់ Families First Coronavirus Response Act ដោយមានសំឡេងឆ្នោតគាំទ្រ ៣៦៣ទល់នឹង៤០។ សេចក្តីព្រាងច្បាប់នេះមានរួមបញ្ចូលការឈប់សម្រាកនៅពេលមានជំងឺពីរសប្តាហ៍ដោយនៅតែមានប្រាក់ខែសម្រាប់ពួកជនទាំងឡាយណាដែលឆ្លងជំងឺ COVID-19, ការកែលម្អការធានារ៉ាប់រងខាងការគ្មានការងារធ្វើនិងការបង្កើនកម្មវិធីអាហារថ្ងៃត្រង់សម្រាប់ពួកសិស្សានុសិស្សក្នុងចំណោមវិធានការឯទៀតៗដើម្បីកាត់បន្ថយផលប៉ះពាល់នៃជំងឺ COVID-19 ទៅលើក្រុមគ្រួសារអាមេរិកាំង។
លោកប្រធានាធិបតី ត្រាំ បាននិយាយតាម Twitter ថា លោកគាំទ្រសេចក្តីព្រាងច្បាប់នេះ។
ព្រឹទ្ធសភាស.រ.អា.ត្រួតត្រាដោយពួកសាធារណរដ្ឋនឹងពិចារណាអំពីសេចក្តីព្រាងច្បាប់នេះនៅសប្តាហ៍ក្រោយហើយការគាំទ្ររបស់លោក ត្រាំ មានន័យថាវិធានការនេះទំនងជានឹងទទួលការយល់ព្រម៕
