ក្នុងអំឡុងនៃការថ្លែងសុន្ទរកថារបស់លោកនៅសេតវិមានកាលពីថ្ងៃព្រហស្បតិ៍ដើម្បីទទួលយកការតែងតាំងរបស់គណបក្សលោកសម្រាប់អាណត្តិទី២ លោកប្រធានាធិបតី ដូណាល់ ត្រាំ បាននិយាយថា ការបោះឆ្នោតនៅខែវិច្ឆិកា«នឹងធ្វើការសម្រេចថាតើយើងនឹងការពាររបៀបរស់នៅរបស់ពលរដ្ឋអាមេរិកាំងឬ យើងនឹងអនុញ្ញាតឲ្យចលនាជ្រុលនិយមរំលាយឬកម្ទេចរបៀបរស់នៅរបស់ពលរដ្ឋអាមេរិកាំងទាំងស្រុង។
លោកប្រធានាធិបតី ត្រាំ ដែលប្រឈមការប្រកួតប្រជែងយ៉ាងខ្លាំងពីលោក Joe Biden បេក្ខជនប្រធានាធិបតីខាងគណបក្សប្រជាធិបតេយ្យបានប្រាប់ពួកអ្នកចូលរួមយ៉ាង ច្រើននៅឧទ្យានក្នុងសេតវិមានថា «ការបោះឆ្នោតនេះ ជាការបោះឆ្នោតដ៏សំខាន់បំផុតនៅក្នុងប្រវត្តិសាស្ត្ររបស់ប្រទេសយើង»។
អ្នកចូលរួមជាង១ពាន់នាក់ រួមមានសមាជិកសភាខាងគណបក្សសាធារណរដ្ឋ បានអង្គុយកៀកៗគ្នាហើយមនុស្សភាគច្រើនមិនពាក់ម៉ាស់ មិនស្តាប់ការណែនាំសុខភាពសាធារណៈក្នុងអំឡុងនៃការរាតត្បាតវីរុសកូរ៉ូណានេះ។
លោកប្រធានាធិបតីត្រាំដែលស្ថិតនៅពីក្រោយលោក Biden នៅក្នុងការស្ទង់មតិជាតិនិងការស្ទង់មតិនៅក្នុងបណ្តារដ្ឋប្រកួតប្រជែងសំខាន់ផ្សេងទៀត បានធ្វើសុន្ទរកថាភាគច្រើនរិះគន់យ៉ាងខ្លាំងលើគូប្រជែងខាងគណបក្សប្រជាធិបតេយ្យរបស់លោក។
ដោយទទួលការទះដៃអបអរយ៉ាងខ្លាំងពីអ្នកចូលរួម លោក ត្រាំ បាននិយាយថា លោក Joe Biden មិនមែនជាអ្នកជួយសង្គ្រោះព្រលឹងរបស់ប្រទេសអាមេរិកទេ។ លោក Biden ជាអ្នកបំផ្លាញការងាររបស់ប្រទេសអាមេរិក។ ហើយបើពលរដ្ឋអាមេរិកាំងផ្តល់ឱកាសដល់លោក Biden លោកនឹងក្លាយជាអ្នកបំផ្លាញប្រទេសអាមេរិកដ៏អស្ចារ្សនេះ៕
