ដោយមានភាពចលាចលរឿងជាតិសាសន៍កាន់តែខ្លាំងឡើងនៅក្នុងសហរដ្ឋអាមេរិក អនុប្រធានាធិបតីសហរដ្ឋអាមេរិកលោក Mike Pence កាលពីយប់ថ្ងៃពុធម្សិលមិញ បានប្រាប់អ្នកបោះឆ្នោតថា «អ្នកនឹងមិនមានសុវត្ថិភាពទេនៅក្នុងសហរដ្ឋអាមេរិកដែលដឹកនាំដោយលោក Joe Biden» ដោយបានវាយប្រហារដោយពាក្យសម្តីលើបេក្ខជនប្រធានាធិបតីខាងគណបក្សប្រជាធិបតេយ្យរូបនេះ ថាមានបំណងចង់ទប់ស្កាត់ការផ្តល់ថវិកាដល់ផ្នែកប៉ូលិស។
លោក Pence បាននិយាយនៅយប់ទី ៣ នៃសន្និបាតជាតិរបស់គណបក្សសាធារណរដ្ឋថា៖ «លោក Joe Biden និយាយថា សហរដ្ឋអាមេរិកមានការប្រកាន់ជាតិសាសន៍ជាប្រព័ន្ធ និងថា ទីភ្នាក់ងារពង្រឹងច្បាប់នៅសហរដ្ឋអាមេរិកមានភាពលម្អៀងប្រឆាំងនឹងជាតិសាសន៍ភាគតិច។ ហើយនៅពេលគេសួរលោកថាតើនឹងគាំទ្រការកាត់បន្ថយថវិកាដល់ទីភ្នាក់ងារពង្រឹងច្បាប់ដែរឬក៏យ៉ាងណានោះ លោក Biden បានឆ្លើយថា ប្រាកដជាគាំទ្រ»។
លោក Pence បានបញ្ជាក់នៅក្នុងសុន្ទរកថានៅ Fort McHenry ក្នុងទីក្រុង Baltimore រដ្ឋ Maryland ថា៖ «ការពិតគឺថា អ្នកនឹងមិនមានសុវត្ថិភាពទេនៅក្នុងសហរដ្ឋអាមេរិកដែលដឹកនាំដោយលោក Joe Biden»។
កន្លងមក លោកប្រធានាធិបតី Donald Trump និងអ្នកគាំទ្រជាច្រើនទៀតរបស់លោក បានចោទប្រកាន់លោក Biden ថា បានគាំទ្រចលនា «ជីវិតពលរដ្ឋស្បែកខ្មៅមានតម្លៃ» និងគាំទ្រការអំពាវនាវរបស់សកម្មជនសេរីនិយមផ្សេងទៀត ដែលចង់ឲ្យកាត់បន្ថយការផ្ដល់ថវិកាដល់មន្ទីរប៉ូលិសមូលដ្ឋាន។ លោក Biden បានច្រានចោលការចោទប្រកាន់ទាំងនេះ៕
