កាលពីថ្ងៃពុធម្សិលមិញក្រសួងសេដ្ឋកិច្ចនិងក្រសួងការបរទេសសហរដ្ឋអាមេរិកបានប្រកាសពីការដាក់ទណ្ឌកម្ម និងការរឹតត្បិតទិដ្ឋាការលើពលរដ្ឋបេឡារុសរាប់សិបនាក់ និងអង្គភាពជាច្រើនសម្រាប់តួនាទីនៅក្នុងអ្វីដែលសហរដ្ឋអាមេរិកហៅថាជាការលួចបន្លំក្នុងការបោះឆ្នោតថ្ងៃទី៩ ខែសីហា និងការប្រើប្រាស់អំពើហិង្សាបង្រ្កាបលើបាតុករគាំទ្រលទ្ធិប្រជាធិបតេយ្យដែលបានកើតឡើងក្រោយការបោះឆ្នោត។
ក្រសួងសេដ្ឋកិច្ចសហរដ្ឋអាមេរិកបានឲ្យដឹងក្នុងការចេញផ្សាយព័ត៌មានមួយថា៖ «ការបោះឆ្នោតដែលរួមមានភាពមិនប្រក្រតីជាច្រើនរាប់មិនអស់ ដែលធ្វើឲ្យការបោះឆ្នោតមិនសេរីនិងមិនយុត្តិធម៌រូមមានការមិនឲ្យបេក្ខជនបក្សប្រឆាំងចូលរួម បដិសេធវត្តមានរបស់អ្នកអង្កេតការបោះឆ្នោត និងការបញ្ជាក់ពីចំនួនសន្លឹកឆ្នោតដែលមិនត្រឹមត្រូវជាដើម»។
ក្រោយការប្រកាសរបស់ក្រសួងសេដ្ឋកិច្ច រដ្ឋមន្ត្រីក្រសួងការបរទេសលោក Mike Pompeo ក៏បានប្រកាសទណ្ឌកម្មបន្ថែមទៀតតាម Twitter ថា៖«ព្រឹកនេះខ្ញុំដាក់ការរឹតត្បិតទិដ្ឋាការដល់បុគ្គល ៣៩នាក់ ហើយក្រសួងសេដ្ឋកិច្ចអាមេរិកដាក់ទណ្ឌកម្មបន្ថែមលើមន្ត្រី និងអង្គភាព ដែលពាក់ព័ន្ធនឹងការកេងបន្លំការបោះឆ្នោតថ្ងៃទី០៩ ខែសីហា និងការប្រើអំពើហិង្សាបង្រ្កាបបាតុករនៅប្រទេសបេឡារុស។ ពលរដ្ឋបេឡារុសសក្តិសមទទួលបានការបោះឆ្នោតដែលសេរីនិងយុត្តិធម៌។
កាលពីដើមខែធ្នូនេះ កងកម្លាំងសន្តិសុខរបស់បេឡារុសបានឃុំឃាំងមនុស្សជាច្រើននាក់ទូទាំងប្រទេស ស្របពេលដែលមានបាតុកម្មតវ៉ាតាមផ្លូវទាមទារឲ្យមេដឹកនាំផ្ដាច់ការ លោក Alexander Lukashenko ចុះចេញពីតំណែងនៅតែបន្ត៕
