ប្រធានអគ្គសេនាធិការចម្រុះអាមេរិកកំពុងតែស្ថិតនៅឧបទ្វីបកូរ៉េ ខណៈសមយុទ្ធយោធាអាមេរិកនិងកូរ៉េខាងត្បូងកំពុងតែប្រឈមនឹងភាពតានតឹងកាន់តែកើនឡើងជាមួយនឹងកូរ៉េខាងជើង។
លោក Joe Dunford ប្រធានអគ្គសេនាធិការចម្រុះអាមេរិកបានមានប្រសាសន៍ថា ទស្សនកិច្ចរបស់លោកទៅកាន់តំបន់នេះក្នុងសប្តាហ៍នេះ គឺមានគោលបំណងអះអាងសារជាថ្មីដល់កូរ៉េខាងត្បូងនិងជប៉ុនដែលជាសម្ព័ន្ធមិត្ត ស្របពេលជាមួយគ្នានេះដែរ ក៏បង្កើតទំនាក់ទំនងរវាងយោធានិងយោធាជាមួយនឹងចិន ដើម្បីទប់ស្កាត់កំហុសឆ្គងណាមួយ។
ស្របពេលជាមួយគ្នានោះដែរ មន្ត្រីសន្តិសុខជាតិជាន់ខ្ពស់អាមេរិកបានថ្លែងកាលពីថ្ងៃអាទិត្យថា ការប្រឈមមុខដាក់គ្នាមួយខាងផ្នែកយោធាជាមួយនឹងកូរ៉េខាងជើងនឹងមិនកើតមានឡើងក្នុងពេលឆាប់ៗនេះទេ ប៉ុន្តែលទ្ធភាពដែលសង្គ្រាមអាចកើតមានគឺកាន់តែកើនឡើង។
លោក Mike Pompeo ប្រធាន CIA បានថ្លែងលើកម្មវិធី Fox News Sunday ថា ការជំរុញរបស់កូរ៉េខាងជើងក្នុងការផលិតគ្រាប់មីស៊ីលបាញ់ឆ្លងទ្វីបដែលមាននុយក្លេអ៊ែរ ដែលមានសមត្ថភាពអាចវាយប្រហារដល់សហរដ្ឋអាមេរិក «គឺជាការគំរាមកំហែងដ៏ធ្ងន់ធ្ងរមួយ ហើយរដ្ឋបាលនេះនឹងចាត់ការទៅលើវិធានការនេះដូចគ្នាដែរ»។
លោក H.R. McMaster ប្រធានសន្តិសុខជាតិរបស់លោកប្រធានាធិបតី ដូណាល់ ត្រាំ មានប្រសាសន៍លើកម្មវិធី This Week របស់ទូរទស្សន៍ ABC ថា៖ «យើងមិនខិតទៅជិតសង្គ្រាមដូចកាលពីសប្តាហ៍មុនទេ ប៉ុន្តែយើងខិតទៅជិតសង្គ្រាមជាងកាលពីមួយទសវត្សរ៍មុន»៕
