កីឡាអូឡាំពិកទីក្រុងតូក្យូប្រទេសជប៉ុនបានដល់ទីបញ្ចប់ជាផ្លូវការហើយ។
នៅក្នុងពិធីបិទកាលពីយប់ថ្ងៃអាទិត្យ ប្រធានគណៈកម្មាធិការកីឡាអូឡាំពិកអន្តរជាតិ (IOC) លោក Thomas Bachបានប្រកាសការបិទបញ្ចប់កីឡាអូឡាំពិកនេះ។ កីឡាអូឡាំពិករដូវក្តៅបន្ទាប់នឹងធ្វើនៅទីក្រុងប៉ារីសឆ្នាំ២០២៤។
ដូចការប្រកួតក្នុងពេលប៉ុន្មានថ្ងៃកន្លងមកនេះដែរ ពិធីបិទកីឡាអូឡាំពិកនេះមិនអនុញ្ញាតឲ្យមានអ្នកចូលមើលផ្ទាល់ទេ ដោយសារបារម្ភអំពីការរាតត្បាតនៃជំងឺកូវីដ១៩។ ភ្លើងគប់កីឡាអូឡាំពិកត្រូវបានពន្លត់ ស្របពេលការបាញ់កាំជ្រួចទៅលើផ្ទៃមេឃត្រូវបានធ្វើឡើង។
នៅថ្ងៃបញ្ចប់ការប្រកួត ក្រុមកីឡាករសហរដ្ឋអាមេរិកដណ្តើមបានមេដាយមាស៣បន្ថែមទៀត ដោយធ្វើឲ្យសហរដ្ឋអាមេរិកបានមេដាយមាសសរុបទាំងអស់ចំនួន៣៩ ចំណែកប្រទេសចិនបានមេដាយមាសសរុបចំនួន៣៨។
បើសរុបទាំងមេដាយមាស ប្រាក់ សំរិទ្ធិ សហរដ្ឋអាមេរិកទទួលបានច្រើនជាងប្រទេសផ្សេងៗគឺចំនួន១១៣ ប្រទេសចិនបាន៨៨ ប្រទេសរុស្ស៊ីបាន៧១ ចក្រភពអង់គ្លេសបាន៦៥ និងប្រទេសជប៉ុនដែលជាម្ចាស់ផ្ទះបានចំនួន៥៨។
ប្រធានាធិបតីអាមេរិកលោក Joe Biden និងភរិយាបានជួបជាមួយកីឡាករអូឡាំពិកអាមេរិកតាមអនឡាញកាលពីយប់ថ្ងៃសៅរ៍។ លោកនិយាយថា «អ្នកទាំងអស់គ្នាធ្វើឲ្យខ្ញុំមានមោទនភាពខ្លាំងណាស់»។
ក្រុមកីឡាបាល់បោះនារីអាមេរិកបានឈ្នះមេដាយមាស៧ដងជាប់ៗគ្នា ដោយឈ្នះក្រុមកីឡាការិនីបាល់បោះជប៉ុនពិន្ទុ៩០ទល់នឹង៧៥៕
