លោក Donald Trump ខិតទៅរកការទទួលបានប្រតិភូ១២៣៧នាក់ដែលគាត់ត្រូវការដើម្បីទទួលការតែងតាំងជាបេក្ខជនប្រធានាធិបតីស.រ.អា.ខាងគណបក្សសាធារណរដ្ឋនៅថ្ងៃព្រហស្បតិ៍ ដែលនេះគឺជាជោគជ័យមួយដែលស្ទើរតែែមិនកើតមានបានទេកាលពីពីរបីខែមុននេះ។
នៅពេលនេះ ទោះណាជាពួកអ្នកកាន់អំណាចនៅក្នុងគណបក្សសាធារណរដ្ឋមានបំណងបែបណាក៏ដោយ ក៏ លោក Trump កំពុងធ្វើការដើម្បីរៀបចំគណបក្សនេះជាថ្មីតាមរបៀបរបស់លោក។
របៀបរបស់លោក Trump ដែលមិនធ្វើតាមបទបញ្ញត្តិ និងការថ្លែងខ្លាំងៗរបស់លោកបានទាក់ទាញក្រុមអ្នកបោះឆ្នោតច្រើននាក់ឱ្យបោះឆ្នោតឱ្យលោកនៅក្នុងការបោះឆ្នោតបឋមរបស់គណបក្សសាធារណរដ្ឋ ក៏ប៉ុន្តែគុណសម្បត្តិដដែលនោះដែលបានជំរុញលោក Trump ឱ្យទទួលការតែងតាំងជាបេក្ខជនប្រធានាធិបតីខាងគណបក្សសាធារណរដ្ឋ បានបង្កើតឱ្យមានការបែកបាក់គ្នារវាងពួកវរជនរបស់គណបក្សនេះជាមួយក្រុមអ្នកបោះឆ្នោតដែលគាំទ្រលោក។
លោក Mark Rozell ព្រឹទ្ធបុរសនៃមហាវិទ្យាល័យខាងគោលនយោបាយ រដ្ឋាភិបាល និងកិច្ចការអន្តរជាតិនៃសាកលវិទ្យាល័យ George Mason បាននិយាយថា «លោកអ្នកឃើញប្រតិកម្មរបស់មនុស្សខ្លះដូចជាលោក Jeb Bush អតីតអភិបាលរដ្ឋ Florida ជាដើម ដែលមានការតប់ប្រមល់ក្នុងចិត្តបានគ្រវីដៃដោយនិយាយថាប្រសិនបើនេះជាអ្វីដែលលោកអ្នកចង់បាន ចូរលោកអ្នកគាំទ្រលោក Trump ចុះ។ មានការក្តៅក្រហាយក្នុងចិត្តក្នុងចំណោមពួកមេដឹកនាំគណបក្សនេះ យើងមិនអាចត្រួតត្រាការណ៍នេះបានទេ។ តើយើងអាចធ្វើអ្វីបានអំពីការណ៍នេះ?»
កាតព្វកិច្ចរបស់លោក Trump គឺធ្វើឲ្យទៅមុខដើម្បីផ្សះផ្សាការប៉ងប្រាថ្នារបស់ពួកអ្នកកាន់អំណាចក្នុងគណបក្សសាធារណរដ្ឋជាមួយផលប្រយោជន៍របស់ពួកអ្នកគាំទ្រលោកថ្មីៗ៕
