ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សាលា​ឧទ្ធរណ៍​ច្រានចោល​សំណើ​នៅ​ក្រៅ​ឃុំ​របស់​លោក​ កឹម សុខា


ប៉ូលិស​ឈរ​យាម​ នៅ​ក្បែរ​របារ​ដែក​ដែល​ដាក់​បិទ​ផ្លូវ​សុធារស​ នា​ថ្ងៃ​សវនាការ​លើ​បណ្តឹង​សុំ​នៅ​ក្រៅ​ឃុំ​របស់​លោក​ កឹម​ សុខា​ ទៅ​កាន់​សាលា​ឧទ្ធរណ៍​ នា​ព្រឹក​ថ្ងៃ​ទី​១​ ខែ​កុម្ភៈ​ ឆ្នាំ​២០១៨។​ នេះ​ជា​លើក​ទី​មួយ​ហើយ​ ដែល​លោក​ កឹម​ សុខា​ ត្រូវ​បាន​នាំ​ខ្លួន​មក​សវនាការ​ ចាប់​តាំង​ពី​ការចាប់​ខ្លួន​ អស់​រយៈពេល​ប្រមាណ​៥​ខែ​មក។ (អូន​ ឆេងប៉រ/VOA)

សាលា​ឧទ្ធរណ៍​នៅ​ថ្ងៃ​ព្រហស្បតិ៍​នេះសម្រេច​បន្ត​ឃុំ​ខ្លួន​លោក​ ​កឹម សុខា​ ​អតីត​ប្រធាន​គណបក្សសង្គ្រោះជាតិ​ទៅ​តាម​សេចក្តី​សម្រេច​របស់​តុលាការ​ភ្នំពេញ​ ​បើទោះ​ជា​ក្រុម​មេធាវី​របស់​លោក​ ​កឹម សុខា​ ​បញ្ជាក់​ថា​ ​អតីត​ប្រធាន​គណបក្ស​ប្រឆាំង​រូប​នេះ​កំពុង​មាន​ជំងឺ​ដែល​ចាំបាច់ត្រូវ​ព្យាបាល​នៅក្រៅ​ពន្ធនាគារ​ក៏​ដោយ។

សវនាការ​សុំ​នៅ​ក្រៅ​ឃុំ​របស់​អតីត​ប្រធាន​បក្ស​ជំទាស់​រូប​នេះ​ ​ធ្វើ​ឡើង​តាម​បណ្តឹងរបស់​លោក​ ​កឹម សុខា​ ​ប្តឹង​មិន​សុខចិត្ត​ទៅ​នឹង​ការ​សម្រេច​បន្ត​ឃុំ​ខ្លួន​លោក​ក្នុង​ពន្ធនាគារ​របស់​សាលា​ដំបូង​រាជធានី​ភ្នំពេញ។​ ​ទោះយ៉ាង​ណា​ ​សវនាការ​រយៈពេល​ជាង​៣​ម៉ោង​នា​ព្រឹក​នេះ​ ​មិន​ត្រូវ​បាន​អនុញ្ញាត​ឲ្យ​សាធារណៈជន​ ​និង​អ្នក​សារព័ត៌មាន​ចូលរួម​ស្តាប់​ ​ក្រៅ​តែ​ពី​ក្រុម​មេធាវី​របស់​លោក​ ​កឹម សុខា​ ​នោះ​ឡើយ។

អ្នកស្រី​ ​ម៉េង សុភារី​ ​មេធាវី​មួយរូប​ក្នុង​ចំណោម​មេធាវី​៧រូប​ដែល​ការពារ​ក្តី​ឲ្យ​លោក​ ​កឹម សុខា​ ​ប្រាប់​អ្នក​សារព័ត៌មាន​ក្រោយ​ចេញ​ពី​សាល​សវនាការ​ថា​ ​សភា​ស៊ើប​សួរ​សាលា​ឧទ្ធរណ៍​បាន​សម្រេច​តម្កល់​សាលក្រម​តុលាការ​ភ្នំពេញ​ក្នុងការ​បន្ត​ឃុំ​ខ្លួន​លោក​ ​កឹម សុខា​ ​ទុក​ជា​បាន​ការ​ ​បើទោះ​បី​ជា​ក្រុម​មេធាវី​បាន​លើកឡើង​ពី​មូលហេតុ​ជាច្រើន​ដើម្បី​សុំ​នៅ​ក្រៅ​ឃុំ។​ ​

អ្នកស្រី​បន្តថា​ ​ទាំង​លោក​ ​កឹម សុខា​ និង​ក្រុម​មេធាវី​ សុទ្ធ​តែ​បាន​លើកឡើងថា​ ​លោក​ ​កឹម សុខា​ ​មិន​បាន​ប្រព្រឹត្ត​បទ​ល្មើស​ដូចការ​ចោទ​ប្រកាន់​ ​លោក​ ​កឹម សុខា​ ​កំពុង​មាន​បញ្ហា​សុខភាព​ ​និង​ធានា​ថា​ ​លោក​ ​កឹម សុខា​ ​នឹង​បង្ហាញ​ខ្លួន​គ្រប់​ពេល​ដែល​តុលាការកោះ​ហៅ​ដើម្បី​សាកសួរ។​អ្នកស្រី​ ​ម៉េង សុភារី​ ​បន្ថែម​ថា​ ​ការ​មិន​អនុញ្ញាត​ឲ្យលោក​ ​កឹម សុខា​ ​ស្ថិត​នៅ​ក្រៅ​ឃុំ​ដោយ​សំអាង​ថា​បារម្ភ​ខ្លាច​លោក​ប្រព្រឹត្ត​បទល្មើស​បន្ថែម​ ​និង​ដើម្បី​បន្ត​ការ​ស៊ើបសួរ​ ​ជាការ​សម្រេច​ដែល​មិន​សម​ហេតុ​ផល។​

អ្នក​ស្រី​ ម៉េង​ សុភារី ​ជា​សហ​មេធាវី​ការពារ​ក្តីលោក កឹម សុខា និយាយ​ទៅ​កាន់​អ្នក​សារព័ត៌មាន​ នៅ​មុខ​សាលា​ឧទ្ធរណ៍​ បន្ទាប់​ពី​សវនាការ​នៃសំណុំ​រឿង​បណ្ដឹង​លោក​ កឹម​ សុខា​ សុំ​នៅ​ក្រៅ​ឃុំ​ កាល​ពី​ថ្ងៃ​ទី​១ ខែ​កុម្ភៈ​ ឆ្នាំ​២០១៨។ (អូន​ ឆេងប៉រ/VOA)
អ្នក​ស្រី​ ម៉េង​ សុភារី ​ជា​សហ​មេធាវី​ការពារ​ក្តីលោក កឹម សុខា និយាយ​ទៅ​កាន់​អ្នក​សារព័ត៌មាន​ នៅ​មុខ​សាលា​ឧទ្ធរណ៍​ បន្ទាប់​ពី​សវនាការ​នៃសំណុំ​រឿង​បណ្ដឹង​លោក​ កឹម​ សុខា​ សុំ​នៅ​ក្រៅ​ឃុំ​ កាល​ពី​ថ្ងៃ​ទី​១ ខែ​កុម្ភៈ​ ឆ្នាំ​២០១៨។ (អូន​ ឆេងប៉រ/VOA)

​អ្នកស្រី​បញ្ជាក់​ថា៖

«យើង​ខ្ញុំ​ដែល​ជា​ក្រុម​មេធាវី​ហ្នឹង​យល់​ឃើញថា មិនមាន​លក្ខណៈ​ត្រឹមត្រូវ​ទេ ទីមួយ​គឺ​ដោយសារ​ថា បទ​ល្មើស​អត់​មាន​កើត​ឡើងអីទេ។ ហើយ​ផ្អែក​លើ​ចំណុច​នៃ​មាត្រា​២០៥ ស្តីពី​ការ​ឃុំ​ខ្លួន​ហ្នឹង​ គឺចំណុច​ទី១​ទាក់ទង​ទៅ​នឹង​ការ​បង្ការ​នូវ​បទ​ល្មើស ដោយសារ​ថា​កូន​ក្តី​របស់​យើង​ហ្នឹង​អត់​បាន​ប្រព្រឹត្ត​នូវ​បទល្មើស​ទេ ហើយ​បើរឿង​បង្ក​នូវ​ភាព​ច្របូក​ច្របល់​ហ្នឹង​ក៏​អត់​មាន​ដែរ។ ហើយ​កូន​ក្តី​យើង​ខ្ញុំ​ហ្នឹង​មាន​មុខរបរ មាន​ការងារ មាន​តួនាទី​របស់​គាត់​ត្រឹមត្រូវ មាន​ប្រពន្ធ​មាន​កូន​មាន​ផ្ទះ​សម្បែង​អីត្រឹមត្រូវ ហើយ​គាត់​ធានា​ថា​នឹង​ចូល​ខ្លួន​គ្រប់នីតិវិធី​ការ​កោះ​ហៅ​របស់តុលាការ​ទាំង​អស់»។​

អ្នកស្រី​បន្ថែម​ពាក់ព័ន្ធ​នឹង​ស្ថានភាព​សុខភាព​របស់​លោក កឹម សុខា យ៉ាង​ដូច្នេះ៖

«ដោយសារ​ថា​គាត់​មាន​សសៃ​គៀប គៀប​សសៃ​ស្មា​ហ្នឹង វាធ្វើ​ឲ្យ​ប៉ះពាល់​គាត់​មិន​អាច​សម្រាន្ត​លក់​បាន។​ ​ហើយ​ការ​ដែល​មិន​អាច​សម្រាន្ត​លក់​បាន​មួយ​យប់ៗ​គាត់​ភ្ញាក់​ច្រើន​ដង​ហ្នឹង​ ​ធ្វើ​ឲ្យ​គាត់​ឡើង​ជាតិ​ស្ករ​ ​ធ្វើ​ឲ្យ​គាត់ឡើង​ឈាម​ឡើង​អី អញ្ចឹង​វាប៉ះពាល់​ដល់​រាងកាយ​ផ្សេងៗ​ទៀត​ ​និង​បង្កើត​ជំងឺ​ផ្សេងៗ​ទៀត។​ ​ហើយ​បញ្ហា​គៀប​សសៃ​ឈាម​នេះ​ ​គឺ​ក្រុម​គ្រូពេទ្យ​នៅ​ប្រទេស​សិង្ហបុរី​ហ្នឹងបាន​ឲ្យ​គាត់​ទៅ​ធ្វើការ​វះកាត់​តាំង​ពី​មុន​ពេល​គាត់​ជាប់​ពន្ធនាគារ​ ​ប៉ុន្តែ​ដោយសារ​តែគាត់​មានរវល់​ ​ហើយ​ឥលូវ​គាត់ជាប់​ពន្ធនា​គារច្រើន​ខែ​ទៀត​ ជំងឺ​ហ្នឹង​ធ្វើ​ទុក្ខ​គាត់​រហូត​ដល់​ហើម។​ ​អញ្ចឹង​ទៅ​គាត់​ទាមទារ​សុំ​ទៅ​ព្យាបាល​ជំងឺ​ហ្នឹង»។​

នេះ​ជា​លើក​ទី​មួយ​ហើយ​ដែល​លោក​ ​កឹម សុខា​ មាន​វត្តមាន​ក្នុង​សវនាការ បន្ទាប់​ពីលោក​ត្រូវ​បានឃុំ​ខ្លួន​អស់​រយៈពេល​ជិត​៥​ខែ​កន្លង​មក។​ ​ក្នុង​សវនាការ​នៅ​តុលាការ​គ្រប់​ជាន់​ថ្នាក់​ទាំងអស់​សម្រាប់​បណ្តឹង​របស់​ក្រុម​មេធាវី​ ​ដែល​ប្តឹង​សុំ​មោឃភាព​នីតិវិធី​នៃ​ការ​ចាប់​ឃុំ​ខ្លួន​លោក​ ​កឹម សុខា​ ​ ​និង​បណ្តឹង​សុំនៅ​ក្រៅ​ឃុំ​នា​ពេល​ថ្មីៗ​នេះ ​សុទ្ធ​តែ​មិនមាន​វត្តមាន​របស់​លោក​ ​កឹម សុខា​ ​ចូលរួម​នោះ​ទេ​ ​ដោយ​មន្រ្តី​តុលាការ​អះអាង​ថា​ ​ការ​មិន​បញ្ជូន​លោក​ឲ្យ​ទៅ​ចូល​រួម​សវនាការ​ ​គឺ​បារម្ភ​ពី​សន្តិសុខ​ ​និង​សុវត្ថិភាព​របស់​លោក។​

ម្ដាយ​ និង​ភរិយា​របស់​លោក​ កឹម​ សុខា​ ព្រម​ទាំង​សហ​មេធាវី ដើរ​ចេញ​ពី​សាលាឧទ្ធរណ៍​ បន្ទាប់​ពី​យក​ម្ហូប​ទៅ​ឲ្យ​លោក​ កឹម​ សុខា​ នា​ថ្ងៃ​សវនាការ​នៃ​បណ្ដឹង​សុំ​នៅ​ក្រៅ​ឃុំ​ កាល​ពី​ថ្ងៃ​ទី​១ ខែ​កុម្ភៈ​ ឆ្នាំ​២០១៨។ (ខាន់​ សុគុំមនោ/VOA)
ម្ដាយ​ និង​ភរិយា​របស់​លោក​ កឹម​ សុខា​ ព្រម​ទាំង​សហ​មេធាវី ដើរ​ចេញ​ពី​សាលាឧទ្ធរណ៍​ បន្ទាប់​ពី​យក​ម្ហូប​ទៅ​ឲ្យ​លោក​ កឹម​ សុខា​ នា​ថ្ងៃ​សវនាការ​នៃ​បណ្ដឹង​សុំ​នៅ​ក្រៅ​ឃុំ​ កាល​ពី​ថ្ងៃ​ទី​១ ខែ​កុម្ភៈ​ ឆ្នាំ​២០១៨។ (ខាន់​ សុគុំមនោ/VOA)

លោក​ ​កឹម សុខា​ ​ត្រូវ​បាន​បញ្ជូន​ពី​ពន្ធនាគារ​ត្រពាំង​ផ្លុង ក្នុង​ខេត្ត​ត្បូង​ឃ្មុំ ​ទៅ​ដល់​សាលា​ឧទ្ធរណ៍​នា​ម៉ោង​ប្រមាណ​ជា​៥​និង​៣០​នាទី​ព្រឹក។​ ទោះជាយ៉ាងណា​ ​មិនមាន​ការ​បញ្ជាក់​ពី​មូលហេតុ​នៃ​ការ​នាំ​ខ្លួនលោក​ ​កឹម សុខា ​ឲ្យ​ទៅ​ចូល​រួម​ក្នុង​សវនាការឡើយ។​

លោក​ ​ទូច ថារិទ្ធ​ ​អ្នកនាំពាក្យ​សាលា​ឧទ្ធរណ៍​ ​ប្រាប់​ ​VOA​ ​នា​រសៀល​ថ្ងៃ​ព្រហស្បតិ៍​នេះ​ពាក់ព័ន្ធ​នឹង​ការ​សម្រេច​បន្ត​ឃុំ​ខ្លួន​លោក​ ​កឹម សុខា​ ​ថា​សភា​ស៊ើប​សួរ​សាលា​ឧទ្ធរណ៍​អនុវត្ត​ទៅ​តាម​គោល​ការណ៍​ច្បាប់។​

លោក​មាន​ប្រសាសន៍​ថា៖​

​«សភា​ស៊ើបសួរ​ដោយ​គេ​ពិនិត្យ​ឃើញ​ទៅ​តាម​គោលការណ៍​ច្បាប់​ហើយ ដោយសារ​តែ​ចៅក្រម​សភា​ស៊ើបសួរ​សាលា​ដំបូង​រាជធានី​ភ្នំពេញ​ហ្នឹង​ ​គេ​បាន​សម្រេច​ទៅតាម​ការ​ចោទ​ប្រកាន់​របស់​អយ្យការអម​សាលា​ដំបូង​រាជធានី​ភ្នំពេញ​គេ​ចោទ​ប្រកាន់​ហើយ​។ អញ្ចឹង​ទេ​សាលា​ឧទ្ធរណ៍​ពិនិត្យ​ទៅតាម​ផ្លូវ​ច្បាប់​ហើយ​ ​គេ​តម្កល់ដីកា​សម្រេច​ហ្នឹងទុក​ជា​បាន​ការ​ដដែល។ បានន័យ​ថា​មិន​អនុញ្ញាត​ឲ្យ​នៅ​ក្រៅ​ឃុំ»។​

មាន​ការ​លើក​ឡើង​ថា​ ​សំណុំ​រឿង​របស់​លោក​ ​កឹម សុខា ​ ​អតីត​ប្រធាន​គណបក្ស​សង្រ្គោះជាតិ​ហាក់​កំពុង​ត្រូវ​បាន​ពន្យារ​ពេល​ការ​បើក​សវនាការ​ដោយ​មិនមាន​ហេតុផល​ ​ខណៈ​ដែល​អតីត​គណបក្ស​ប្រឆាំង​ដ៏​ធំ​មួយ​នេះ​ត្រូវ​បាន​តុលាការ​កំពូល​បើក​សវនាការ​រំលាយ​ចោល​យ៉ាង​លឿន​ ​ដោយ​មូល​ហេតុចោទ​ពី​បទ​ពាក់ព័ន្ធ​នឹង​ការ​ឃុបឃិត​ជាមួយ​បរទេស​ ​ដើម្បី​ផ្តួល​រំលំ​រដ្ឋាភិបាល​ដូចគ្នា។

លោក​ ​ស៊ឹង សែនករុណា​ ​មន្រ្តី​អង្កេត​ផ្នែក​ច្បាប់ និង​ជា​អ្នកនាំពាក្យ​សមាគម​ការពារ​សិទ្ធិ​មនុស្ស​អាដហុក លើក​ឡើង​ថា ការ​សម្រេច​មិន​ឲ្យ​លោក​ កឹម សុខា ស្ថិត​នៅ​ក្រៅ​ឃុំ គឺ​ជា​ករណី​នយោបាយ ដែល​លោក​ថា តុលាការ​ហាក់​ពិបាក​សម្រេច​ក្នុង​ការ​អនុវត្ត​ឲ្យ​ដូចករណី​ប្រជាពលរដ្ឋ​ធម្មតា។

លោក​បញ្ជាក់​ថា៖​

«យើង​ឃើញ​ការ​ដាក់​ស្នើ​របស់​មេធាវី​របស់​គាត់​ហ្នឹង​មាន​លក្ខណៈ​សម​ស្រប​តាម​នីតិវិធី​ផ្លូវ​ច្បាប់។ ដូច្នេះ​យើង​គិតថា​គួរតែពិចារណា​ក្នុងការ​ដោះ​លែង​រូប​គាត់ ហើយ​យើង​អាច​ដែរ​ ​ព្រោះ​យើង​ឃើញ​ហើយ​ថា​ ក្នុងករណី​នេះយើង​ឃើញ​ហេតុ​ផល​ដែលសាធារណៈ​មតិ​គាត់​វាយ​តម្លៃ​ ​ចង់​មិន​ចង់​រឿង​ហ្នឹង​នរណាៗ​ក៏គេ​ចាត់​ទុក​ថា ​ករណីនេះ​ជាករណី​នយោបាយ»។​

លោក​ ​កឹម សុខា​ ​អតីត​ប្រធាន​គណបក្ស​សង្គ្រោះ​ជាតិ​ ​ត្រូវ​បាន​សមត្ថកិច្ច​សម្រុក​ចូល​ចាប់​ខ្លួន​ពី​ក្នុង​ផ្ទះទាំង​កណ្តាល​យប់​រំលង​អាធ្រាត្រ​ ​កាល​ពីដើមខែ​កញ្ញា​ ​ដោយ​ចោទ​លោក​ពី​បទ«ក្បត់ជាតិ»​ ​និង​បញ្ជូនលោក​ទៅ​ឃុំ​ក្នុង​ពន្ធនាគារ​ត្រពាំង​ផ្លុង​ ​នៅ​ខេត្ត​ត្បូងឃ្មុំ​ ​ដែល​ជា​ខេត្ត​មាន​ព្រំ​ប្រទល់​ជាប់​ប្រទេសវៀតណាម។​ ​ក្រោយ​ការ​ចាប់ខ្លួន​អតីត​មេដឹកនាំ​បក្ស​ប្រឆំាងដ៏​ចម្រូង​ចម្រាស់​ ​តុលាការ​កំពូល​កម្ពុជា​ ​បាន​សម្រេច​រំលាយ​បក្ស​សង្គ្រោះជាតិ​ ​តាម​ពាក្យ​បណ្តឹង​របស់​រដ្ឋាភិបាលលោក ហ៊ុន សែន។​

កន្លង​មក​ក្រុម​មេធាវី​ការពារ​ក្តី​ឲ្យ​លោក​ ​កឹម សុខា​ ​បាន​ប្តឹង​ទៅ​តុលាការ​គ្រប់​ជាន់​ថ្នាក់​ ​ដើម្បី​សុំ​មោឃ​ភាព​ការ​ចាប់​ឃុំ​ខ្លួន​លោក​ ​កឹម សុខា​ ​ដោយ​អះអាង​ថា​ ​ការ​ចាប់​ឃុំឃាំង​តំណាង​រាស្ត្រ​មណ្ឌល​កំពង់​ចាម​ដែល​មាន​អភ័យ​ឯក​សិទ្ធិ​សភា​ទាំង​កណ្តាល​យប់ ​គឺជា​អំពើ​ខុស​ច្បាប់​កំពូល​របស់​កម្ពុជា។​ ​ក្រុម​មេធាវី​ទាំងនោះ​ក៏​បាន​ប្តឹង​ទៅ​សាលា​ដំបូង​រាជធានី​ភ្នំពេញ​សុំ​ឲ្យ​លោក​ ​កឹម សុខា​ ​បាននៅ​ក្រៅ​ឃុំ ប៉ុន្តែបណ្តឹង​របស់​ពួកគេ​ត្រូវ​បាន​តុលាការ​ទាំងនោះ​ច្រាន​ចោល៕

XS
SM
MD
LG