ការចរចាអំពីការធ្វើឱ្យមានឡើងវិញនូវកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ បានបន្តធ្វើឡើងជាថ្មីនៅថ្ងៃចន្ទនេះ នៅក្នុងទីក្រុងវីយែន ប្រទេសអូទ្រីស បន្ទាប់ពីបានផ្អាកអស់រយៈពេល ៥ ខែ និងក្រោយពេលដែលប្រធានាធិបតីថ្មីនៃប្រទេសអ៊ីរ៉ង់បានចូលកាន់តំណែងមក។
ដូចការចរចាកាលពី ៦ លើកមុនដែលបានចាប់ផ្តើមដំបូងកាលពីខែមេសាដែរ សហរដ្ឋអាមេរិក នឹងចូលរួមដោយប្រយោល។ អ៊ីរ៉ង់នឹងចរចាដោយផ្ទាល់ជាមួយប្រទេសហត្ថលេខីផ្សេងទៀតនៃកិច្ចព្រមព្រៀងនេះ ដែលនោះ គឺចក្រភពអង់គ្លេស ប្រទេសបារាំង រុស្ស៊ី និងអាល្លឺម៉ង់ ហើយមន្ត្រីការទូតអឺរ៉ុបនឹងធ្វើដំណើរទៅមកដើម្បីពិគ្រោះយោបល់ជាមួយភាគីសហរដ្ឋអាមេរិក។
កិច្ចព្រមព្រៀងនុយក្លេអ៊ែរអ៊ីរ៉ង់នេះ គឺជាកិច្ចព្រមព្រៀងដែលដាក់កំហិតលើកម្មវិធីនុយក្លេអ៊ែររបស់ប្រទេសអ៊ីរ៉ង់ពីរវាង ១០ ទៅ ១៥ ឆ្នាំ ដើម្បីជាថ្នូរនឹងការដកទណ្ឌកម្មចេញពីប្រទេសនេះ។
សហរដ្ឋអាមេរិកបានដកខ្លួនចេញពីកិច្ចព្រមព្រៀងនេះនៅក្នុងឆ្នាំ ២០១៨ ក្នុងអំឡុងពេលនៃរដ្ឋបាលរបស់លោកប្រធានាធិបតី Donald Trump។ បន្ទាប់ពីនោះមក អ៊ីរ៉ង់ បានចាប់ផ្តើមងាកចេញពីការប្ដេជ្ញាចិត្តរបស់ខ្លួនចំពោះកិច្ចព្រមព្រៀងនេះ។
មកទល់នឹងពេលនេះ អ៊ីរ៉ង់មានចំនួនសារធាតុអ៊ុយរ៉ានីញ៉ូមដែលខ្លួនរក្សាទុកច្រើនជាងចំនួនកំណត់ដែលខ្លួនបានឯកភាពនៅក្នុងកិច្ចព្រមព្រៀង និងបានសម្រិតសម្រាំងសារធាតុអ៊ុយរ៉ានីញ៉ូមទាំងនេះឱ្យមានកម្រិតខ្ពស់។
កិច្ចព្រមព្រៀងនុយក្លេអ៊ែរអ៊ីរ៉ង់នេះដំបូង បានធ្វើឡើងដើម្បីឆ្លើយតបទៅនឹងការព្រួយបារម្ភដែលថា អ៊ីរ៉ង់កំពុងធ្វើការដើម្បីអភិវឌ្ឍអាវុធនុយក្លេអ៊ែរ។ អ៊ីរ៉ង់បានច្រានចោលការព្រួយបារម្ភនេះ ដោយបញ្ជាក់ថា កម្មវិធីនុយក្លេអ៊ែររបស់ខ្លួន គឺធ្វើឡើងក្នុងគោលបំណងធម្មតាប៉ុណ្ណោះដូចជាសម្រាប់ការស្រាវជ្រាវនិងការបង្កើតថាមពលអគ្គីសនីជាដើម៕
ព័ត៌មានមួយចំនួននៅក្នុងសេចក្ដីរាយការណ៍នេះ ត្រូវបានដកស្រង់ពីទីភ្នាក់ងារព័ត៌មាន Associated Press ទីភ្នាក់ងារព័ត៌មាន AFP និងទីភ្នាក់ងារព័ត៌មាន Reuters។
