កិច្ចប្រឹងប្រែងដើម្បីធ្វើឲ្យរដ្ឋាភិបាលអ៊ីរ៉ង់វិលទៅគោរពតាមលក្ខខណ្ឌនៃកិច្ចព្រមព្រៀងនុយក្លេអ៊ែរអ៊ីរ៉ង់ឡើងវិញ កំពុងប្រឈមនឹងការបរាជ័យ ហើយករណីនេះបានបង្ខំឲ្យសហរដ្ឋអាមេរិកនិងសម្ព័ន្ធមិត្តរបស់ខ្លួន ពិចារណាលើជម្រើសមិនមែនការទូតដើម្បីទប់ទល់នឹងការគំរាមកំហែង។ នេះបើតាមការបញ្ជាក់របស់មន្ត្រីការទូតកំពូលសហរដ្ឋអាមេរិក។
អស់រយៈពេលជាច្រើនខែមកហើយ សហរដ្ឋអាមេរិករួមជាមួយនឹងមហាអំណាចធំៗផ្សេងទៀត បានស្វះស្វែងជួយសង្គ្រោះកិច្ចព្រមព្រៀងនុយក្លេអ៊ែរអ៊ីរ៉ង់នេះ តាមរយៈការចរចាដោយប្រយោលជាបន្តបន្ទាប់នៅក្នុងទីក្រុងវីយែន ប្រទេសអូទ្រីស។ ក៏ប៉ុន្តែ ការចរចាទាំងនោះបានជាប់គាំង។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បានប្រាប់ក្រុមអ្នកយកព័ត៌មានកាលពីថ្ងៃពុធក្នុងអំឡុងពេលសន្និសីទកាសែតជាមួយសមភាគីរបស់លោកមកពីប្រទេសអ៊ីស្រាអែលនិងអេមីរ៉ាតអារ៉ាប់រួមនៅក្នុងរដ្ឋធានីវ៉ាស៊ីនតោនថា៖ «ដោយសារពេលវេលាចេះតែកន្លងផុតទៅនិងការបដិសេធរបស់អ៊ីរ៉ង់នៅក្នុងការមិនចូលរួមដោយស្មោះត្រង់ យើងជិតអស់ពេលហើយ»។
លោកបានបន្ថែមថា៖ «យើងបន្តជឿថា ការទូតគឺជាវិធីដ៏មានប្រសិទ្ធភាពបំផុតនៅក្នុងការធ្វើរឿងនេះ ប៉ុន្តែវាត្រូវការការចូលរួមពីភាគីទាំងសងខាង ហើយយើងមិនទាន់ឃើញអ៊ីរ៉ង់បង្ហាញឆន្ទៈនៅឡើយទេ។ យើងត្រៀមប្រើជម្រើសផ្សេងទៀត ប្រសិនបើអ៊ីរ៉ង់មិនផ្លាស់ប្ដូរដំណើរនេះ»។
សហរដ្ឋអាមេរិកបានដកខ្លួនចេញពីកិច្ចព្រមព្រៀងនេះកាលពីឆ្នាំ ២០១៨ នៅក្រោមអាណត្តិរបស់លោកអតីតប្រធានាធិបតី Donald Trump ដើម្បីដាក់កំហិតលើមហិច្ឆតានុយក្លេអ៊ែររបស់អ៊ីរ៉ង់៕
