ពួកតាលីបង់បាននិយាយថា ការចូលរួមរបស់ខ្លួនជាមួយសហរដ្ឋអាមេរិកសម្រាប់ការចរចាបញ្ចប់សង្គ្រាមនិងបញ្ចប់ការកាន់កាប់ប្រទេសអាហ្វហ្គានីស្ថានដោយខុសច្បាប់នោះ នៅតែមិនឃ្លាកចាកពីគោលការណ៍ ហើយជាថ្មីម្តងទៀត ពួកតាលីបង់បានបដិសេធការចរចាសន្តិភាពដោយផ្ទាល់ជាមួយរដ្ឋាភិបាលក្រុងកាប៊ុល។
លោក Zabihullah Mujahid អ្នកនាំពាក្យតាលីបង់បានប្រាប់វីអូអេថា ការពិភាក្សាមួយវគ្គថ្មីទៀតជាមួយសហរដ្ឋអាមេរិកនៅតែធ្វើ ប៉ុន្តែកាលបរិច្ឆេទនិងទីកន្លែងមិនត្រូវបានកំណត់នៅឡើយ។
លោក Mujahid បានឆ្លើយតបនិងបានបដិសេធរបាយការណ៍ដែលថា អ្នកចរចារបស់ក្រុមបះបោរមានគម្រោងធ្វើកិច្ចចរចាដោយផ្ទាល់ជាមួយមន្ត្រីអាហ្វហ្គានីស្ថាននៅក្នុងប្រទេសអារ៉ាប៊ីសាអូឌីត នៅក្នុងខែនេះ។
លោក Zalmay Khalilzad អ្នកតំណាងពិសេសរបស់អាមេរិកសម្រាប់ការផ្សះផ្សាអាហ្វហ្គានីស្ថានបានធ្វើកិច្ចចរចារយៈពេលពីរថ្ងៃនៅពាក់កណ្តាលខែធ្នូជាមួយគណៈប្រតិភូតាលីបង់ដ៏ខ្លាំងក្លាមួយនៅទីក្រុង Abu Dhabi ដែលពួកអ្នកតំណាងរបស់អារ៉ាប៊ីសាអ៊ូឌីត ប៉ាគីស្ថាន និងប្រទេសម្ចាស់ផ្ទះក៏បានចូលរួមផងដែរ។
រដ្ឋាភិបាលប៉ាគីស្ថានបានទទួលការកោតសរសើរចំពោះការរៀបចំកិច្ចប្រជុំនៅអេមីរ៉ាត់អារ៉ាប់រួម បន្ទាប់ពីលោក Khalilzad ធ្វើទំនាក់ទំនងជាបឋមជាមួយពួកតាលីបង់ដែលមានមូលដ្ឋាននៅប្រទេសកាតា។
លោក Mujahid បាននិយាយថា៖ «គ្មានការរំខាននៅក្នុងដំណើរការចរចារជាមួយអាមេរិកទេ ពីព្រោះការបញ្ចប់ការកាន់កាប់អាហ្វហ្កានីស្ថាន ឥឡូវនេះគឺជាការចាំបាច់សម្រាប់អាមេរិក» ៕
