ដោយកិច្ចពិភាក្សាសន្តិភាពដែលដឹកនាំដោយអង្គការសហប្រជាជាតិជុំថ្មីគ្រោងនឹងធ្វើឡើងនៅសប្ដាហ៍ក្រោយ មន្ត្រីគណបក្សប្រឆាំងក្នុងប្រទេសស៊ីរីបានជួបប្រជុំគ្នានៅថ្ងៃពុធនេះនៅក្នុងប្រទេសអារ៉ាប៊ីសាអ៊ូឌីត ដើម្បីព្យាយាមបង្កើតចលនានាំមុខបែបបង្រួបបង្រួមមួយ។
រីឯប្រទេសដទៃទៀតដែលមានឥទ្ធិពលខ្លាំងក្លាលើជម្លោះនេះ ក៏បានពិភាក្សាជាមួយនឹងប្រទេសរុស្ស៊ីផងដែរ។
ចាប់តាំងពីការវាយប្រយុទ្ធគ្នាបានផ្ទុះឡើងនៅក្នុងឆ្នាំ ២០១១ មក ពួកឧទ្ទាមបានបំបែកខ្លួនជាច្រើនក្រុមដើម្បីប្រឆាំងនឹងប្រធានាធិបតីស៊ីរី Bashar al-Assad។ ពួកឧទ្ទាមទាំងនេះបានព្យាយាមជាច្រើនលើកច្រើនសារដើម្បីបង្រួបបង្រួមគ្នាជាក្រុមតែមួយ ប៉ុន្តែមិនអាចធ្វើទៅបានដោយសារមានការខ្វែងគំនិតគ្នាក្នុងចំណោមក្រុមទាំងនោះ។
បេសកជនពិសេសអង្គការសហប្រជាជាតិទទួលបន្ទុកកិច្ចការវិបត្តិស៊ីរីលោក Staffan de Mistura បាននិយាយនៅក្នុងសុន្ទរកថាបើកនៅឯកិច្ចពិភាក្សាក្នុងទីក្រុងរីយ៉ាដ ប្រទេសអារ៉ាប៊ីសាអ៊ូឌីត នៅថ្ងៃពុធនេះថា ចាំបាច់ត្រូវតែមានគណៈប្រតិភូខាងក្រុមប្រឆាំងដែលមានការរួបរួមគ្នាខ្លាំងមួយនៅឯការចរចានៅថ្ងៃទី ២៨ ខែវិច្ឆិកា ខាងមុខនេះ នៅក្នុងទីក្រុងហ្សឺណែវ ប្រទេសស្វីស។
កន្លងមក ការពិភាក្សាជាច្រើនលើកច្រើនសារដែលដឹកនាំដោយអង្គការសហប្រជាជាតិ បានបរាជ័យក្នុងការបញ្ឈប់សង្គ្រាមដែលបានធ្វើឲ្យមនុស្សយ៉ាងតិច ៤ សែននាក់ ស្លាប់បាត់បង់ជីវិត និងជនជាតិស៊ីរី ១៣ លាននាក់ ត្រូវការជំនួយមនុស្សធម៌។
លោក Staffan de Mistura បានព្រមានថា ពេលវេលាជិតអស់ហើយក្នុងការស្វែងរកវិធីដើម្បីដោះស្រាយជម្លោះនេះ។
ក្រុមប្រឹក្សាសន្តិសុខអង្គការសហប្រជាជាតិបានគាំទ្រដំណើរការនយោបាយច្រើនជំហានមួយ ដែលជាដំណើរការដែលខ្លួនបានបញ្ជាក់ថា ត្រូវតែដឹកនាំដោយប្រជាពលរដ្ឋស៊ីរីផ្ទាល់ និងមានការបង្កើតរដ្ឋធម្មនុញ្ញថ្មីមួយ និងការបោះឆ្នោត ក៏ដូចជាការឈប់វាយប្រយុទ្ធគ្នានៅទូទាំងប្រទេសផងដែរ៕
