មនុស្សម្នាក់បានត្រូវចោទប្រកាន់ពីបទសម្លាប់មនុស្សក្នុងការវាយប្រហារភេរវកម្មក្នុងព្រះវិហារឥស្លាមពីរក្នុងប្រទេសនូវែលសេឡង់ ដែលបានបណ្តាលឱ្យមនុស្ស៤៩នាក់ស្លាប់។
លោក Mike Bush ស្នងការប៉ូលិសបាននិយាយថា ជនជាប់សង្ស័យនេះនឹងចេញបង្ហាញខ្លួនក្នុងតុលាការនៅព្រឹកថ្ងៃសៅរ៍នេះ។
ទោះណាជាលោក Bush បានប្រកែកមិនព្រមប្រាប់ឈ្មោះជនដែលបានត្រូវចោទប្រកាន់ក៏ដោយ ក៏ទូរទស្សន៍របស់ប្រទេសនូវែលសេឡង់ TVNZ បានផ្សាយថាខ្មាន់កាំភ្លើងនោះមានឈ្មោះ Brenton Tarrant អាយុ២៨ឆ្នាំ មកពី Grafton រដ្ឋ New South Wales ប្រទេសអូស្ត្រាលី។ មន្ត្រីអូស្ត្រាលីបានបញ្ជាក់ថា ជនប្រដាប់អាវុធនេះពិតជាពលរដ្ឋអូស្ត្រាលីម្នាក់មែន។
មនុស្សបួននាក់គឺបុរសបីនាក់និងស្ត្រីម្នាក់បានត្រូវចាប់ខ្លួន។ លោកស្រីនាយករដ្ឋមន្ត្រីនូវែលសេឡង់ Jacinda Ardern បានមានប្រសាសន៍ថា គ្មាននរណាម្នាក់ក្នុងបណ្តាជនបួននាក់នេះស្ថិតក្នុងបញ្ជីឈ្មោះមនុស្សដែលត្រូវឃ្លាំមើលខាងសន្តិសុខទេ។
ប៉ូលិសបាននិយាយថា មនុស្សម្នាក់ក្នុងចំណោមបួននាក់ដែលបានត្រូវចាប់ខ្លួននេះ គ្មានទាក់ទិនអ្វីនឹងការវាយប្រហារនេះទេ។ ប៉ូលិសបានបន្ថែមថា ពួកគេកំពុងស៊ើបអង្កេតអំពីមនុស្សពីរនាក់ទៀត។
លោក Bush បានថ្លែងថា៖ «គ្មានទីភ្នាក់ងារណាមួយមានព័ត៌មានអំពីជនទាំងនេះទេ ហើយសហសេវិកអូស្ត្រាលីរបស់ខ្ញុំ ក៏មិនមានព័ត៌មានទាំងនេះដែរ»។
លោកនិយាយបន្ថែមថា ផ្នែកមួយនៃការស៊ើបអង្កេតនេះគឺ«ពិនិត្យមើលអំពីលទ្ធភាពទាំងអស់ដើម្បីធ្វើឱ្យប្រាកដប្រជាថា យើងពង្រឹងច្បាប់និងសន្តិសុខ មិនបាត់បង់ឱកាសណាមួយដើម្បីបញ្ចៀសកុំឱ្យមានហេតុការណ៍ដ៏សែនអាក្រក់បែបនេះកើតឡើងទៀត»។
មនុស្ស៤១នាក់ ក្នុងបណ្តាមនុស្សដែលត្រូវបានសម្លាប់ បានស្ថិតនៅក្នុងព្រះវិហារសាសនាឥស្លាមមួយ។ កុមារក្មេងៗក៏ស្ថិតនៅក្នុងចំណោមជនរងគ្រោះទាំង៤៨នាក់ដែលទទួលការព្យាបាលរបួសដោយសារគ្រាប់កាំភ្លើង។
លោក Bush បានពោលថា៖ «កាំភ្លើងជាច្រើនបានត្រូវរកឃើញនៅក្នុងព្រះវិហារឥស្លាមទាំងពីរកន្លែងនេះ»។
លោកស្រីនាយករដ្ឋមន្ត្រី Ardern បានមានប្រសាសន៍ថា ការវាយប្រហារទាំងនេះ«មិនធ្លាប់មានពីពេលមុនទេ ហើយក៏មិនដូចការវាយប្រហារដែលយើងបានជួបប្រទះកាលពីពេលមុនដែរ»៕
