មេដឹកនាំថ្មីនៃក្រុមប្រឹក្សាយោធាអន្តរកាលរបស់ប្រទេសស៊ូដង់បាននិយាយកាលពីថ្ងៃសៅរ៍ថា លោកប្តេជ្ញាផ្ទេរអំណាចឲ្យរដ្ឋាភិបាលស៊ីវិលក្នុងរយៈពេល២ឆ្នាំ ហើយថាបម្រាមគោចរនៅពេលយប់ត្រូវបានលុបចោល។
លោកឧត្តមសេនីយ៍ឯក Abdel-Fattah Burhan បានធ្វើសេចក្តីប្រកាសនេះក្នុងសុន្ទរកថារបស់លោកផ្សាយតាមទូរទស្សន៍ជាលើកដំបូង។ លោកបានបញ្ជាឱ្យដោះលែងអ្នកទោសទាំងអស់ដែលជាប់គុក ក្រោមច្បាប់គ្រាអាសន្នរបស់លោក Omar al-Bashir ប្រធានាធិបតីដែលត្រូវបានបណ្តេញចេញពីតំណែង។
សកម្មភាពនេះគឺជាការបង្ហាញចុងក្រោយបំផុតថា បាតុកម្មគាំទ្រលទ្ធិប្រជាធិបតេយ្យកំពុងធ្វើឱ្យឥទ្ធិពលរបស់យោធាធ្លាក់ចុះនៅក្នុងប្រទេសសម្បូរប្រេងនេះ។
សេចក្តីប្រកាសនេះធ្វើឡើងបន្ទាប់ពីលោក Salah Abdallah Mohamed Saleh ប្រធានផ្នែកស៊ើបអង្កេតរបស់ស៊ូដង់បានលាលែងពីតំណែងកាលពីថ្ងៃសៅរ៍ គឺមួយថ្ងៃបន្ទាប់ពីរដ្ឋមន្ត្រីការពារជាតិបានលាលែងពីតំណែងក្រោយពីយោធាបានទម្លាក់ប្រធានាធិបតី។
ក្រុមប្រឹក្សានេះបានចេញសេចក្តីថ្លែងការណ៍មួយដែលនិយាយថា មេដឹកនាំរបស់ខ្លួនគឺលោក Abdel Fattah al-Burhan បានទទួលយកការសុំលាលែងរបស់លោក Salah ដែលគេស្គាល់ជាទូទៅថា ឈ្មោះ Salah Gosh។ លោក Salah Gosh បានដឹកនាំក្រសួងស៊ើបការណ៍សម្ងាត់និងសន្តិសុខជាតិគួរឲ្យខ្លាចដែលបានដឹកនាំការបង្ក្រាបដ៏ឃោរឃៅប្រឆាំងក្រុមអ្នកតវ៉ាដែលបានចូលរួមក្នុងបាតុកម្មរយៈពេលបួនខែដែលពេលខ្លះមានអំពើហិង្សា ដែលនាំឲ្យយោធាបណ្តេញលោក al-Bashir ចេញពីតំណែងប្រធានាធិបតីកាលពីថ្ងៃព្រហស្បតិ៍៕
