ប្រធានាធិបតីអ៊ីរ៉ង់លោក Ebrahim Raisi រដ្ឋមន្ត្រីការបរទេសអ៊ីរ៉ង់លោក Hossein Amirabdollahian និងមន្ត្រីផ្សេងទៀតត្រូវបានគេរកឃើញថាស្លាប់នៅថ្ងៃចន្ទនេះនៅកន្លែងធ្លាក់ឧទ្ធម្ភាគចក្រនៅភាគពាយ័ព្យប្រទេសអ៊ីរ៉ង់។ នេះបើយោងតាមសេចក្ដីរាយការណ៍របស់ប្រព័ន្ធផ្សព្វផ្សាយរដ្ឋរបស់អ៊ីរ៉ង់។
ក្រុមរុករកបានរកឃើញបំណែកបាក់បែកនៃឧទ្ធម្ភាគចក្រនេះនៅថ្ងៃចន្ទនេះ ក្នុងពេលមួយថ្ងៃក្រោយមកបន្ទាប់ពីឧទ្ធម្ភាគចក្រនេះបានធ្លាក់នៅពេលដែលធាតុអាកាសមិនល្អនៅជិតតំបន់ Varzaqan ក្នុងខេត្ត East Azerbaijan ក្នុងប្រទេសអ៊ីរ៉ង់។
ប្រព័ន្ធផ្សព្វផ្សាយរដ្ឋបានរាយការណ៍ថា នៅពេលនោះ អ្នកដែលជិះនៅលើឧទ្ធម្ភាគចក្រនោះកំពុងធ្វើដំណើរត្រឡប់ទៅប្រទេសអ៊ីរ៉ង់វិញពីពិធីសម្ពោធគម្រោងទំបន់វារីអគ្គិសនីមួយនៅជាប់ព្រំដែនជាមួយនឹងប្រទេសអាស៊ែបៃហ្សង់ ដែលនៅទីនោះពួកគេបានជួបជាមួយនឹងប្រធានាធិបតីអាស៊ែបៃហ្សង់លោក Ilham Aliyev។
លោក Aliyev បានបង្ហោះសារនៅលើបណ្ដាញសង្គមអនឡាញ X ថា លោក «ក្ដុកក្ដួលយ៉ាងខ្លាំង» ចំពោះការធ្លាក់ឧទ្ធម្ភាគចក្ររបស់លោក Raisi ហើយនឹងបួងសួងនិងផ្ដល់ការជួយជ្រោមជ្រែងក្នុងនាមជា «មិត្តនិងជាប្រទេសជាបងប្អូន»។
មេដឹកនាំមួយចំនួននៅលើពិភពលោកបានចូលរួមរំលែកទុក្ខចំពោះការស្លាប់របស់លោក Raisi នេះ។
នាយករដ្ឋមន្ត្រីប៉ាគីស្ថានលោក Shehbaz Sharif បានប្រកាសថ្ងៃកាន់ទុក្ខមួយថ្ងៃនៅថ្ងៃចន្ទនេះ។
នាយករដ្ឋមន្ត្រីឥណ្ឌាលោក Narendra Modi បាននិយាយថាលោកតក់ស្លុតចំពោះដំណឹងនេះ និងថា «ឥណ្ឌាឈរនៅជាមួយអ៊ីរ៉ង់នៅក្នុងពេលវេលាដ៏សោកសង្រេងនេះ»។
នាយករដ្ឋមន្ត្រីអ៊ីរ៉ាក់លោក Mohammed Shia al-Sudani បានបង្ហាញ «ភាពសោកសៅដ៏ធំធេង»។
ប្រធានាធិបតីអេមីរ៉ាតអារ៉ាប់រួមលោក Bin Zayed Al Nahyan បាននិយាយថា ប្រទេសអេមីរ៉ាតអារ៉ាប់រួម «រួមសាមគ្គីជាមួយនឹងអ៊ីរ៉ង់នៅក្នុងពេលដ៏លំបាកនេះ»។
រដ្ឋធម្មនុញ្ញប្រទេសអ៊ីរ៉ង់បានចែងថា ប្រសិនបើប្រធានាធិបតីស្លាប់ឬបាត់បង់សមត្ថភាព អនុប្រធានាធិបតីទីមួយនឹងត្រូវឡើងជំនួសតំណែងប្រធានាធិបតីនេះ រហូតទាល់តែដល់ពេលបោះឆ្នោតជ្រើសរើសប្រធានាធិបតីថ្មីនៅក្នុងរយៈពេល ៥០ ថ្ងៃ។ បច្ចុប្បន្ននេះ លោក Mohammad Mokhber គឺជាអនុប្រធានាធិបតីទីមួយ។
តួនាទីជាប្រធានាធិបតីនេះគឺជាតួនាទីក្រោមបង្គាប់របស់មេដឹកនាំកំពូលអ៊ីរ៉ង់លោក Ayatollah Ali Khamenei។ លោក Khamenei គឺជាអ្នកមានអំណាចសម្រេចចុងក្រោយបង្អស់លើកិច្ចការរបស់ប្រទេស៕
លោក Payam Yazdian លោក Farhad Poulavi និងលោក Masood Farahmand នៃ VOA ផ្នែកភាសាពែក្ស និងលោក Asgar Asgarov ប្រធាន VOA ផ្នែកភាសាអាស៊ែបៃហ្សង់រួមចំណែកនៅក្នុងសេចក្ដីរាយការណ៍នេះ។
វេទិកាបញ្ចេញមតិ