មនុស្សជាច្រើននៅក្នុងទីក្រុងសេអ៊ូលសង្ឃឹមថា ជំនួបកំពូលរវាងអាមេរិកនិងកូរ៉េខាងជើងនឹងធ្វើឲ្យប្រសើរឡើងនូវលទ្ធភាពនៃការមានសន្តិភាពដ៏យូរអង្វែងនៅក្នុងតំបន់នាពេលអនាគត បើទោះបីជាមិនមានកិច្ចព្រមព្រៀងបញ្ចប់កម្មវិធីអាវុធនុយក្លេអ៊ែរជាក់លាក់ណាមួយនៅឡើយ។
លោក Cho Ik-Sung អ្នករស់នៅទីក្រុង សេអ៊ូលបានថ្លែងថា៖ «អ្វីដែលយើងចង់បានគឺសន្តិភាព។ ខ្ញុំសង្ឃឹមថា ជំនួបកំពូលនេះទទួលជោគជ័យ ដូច្នេះសន្តិភាពនឹងមកដល់ឧបទ្វីបកូរ៉េ»។
មុននឹងឈានដល់ជំនួបនៅប្រទេសសិង្ហបុរីរវាងប្រធានាធិបតីអាមេរិកលោក ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន មានការប្រមូលផ្តុំគ្នានៅក្នុងទីក្រុង សេអ៊ូលដោយក្រុមដែលជំរុញឲ្យមេដឹកនាំទាំងពីរបញ្ចប់ភាពទាល់ច្រកនៃកម្មវិធីអាវុធនុយក្លេអ៊ែររវាងអាមេរិកនិងកូរ៉េខាងជើង ដោយកិច្ចព្រមព្រៀសន្តិភាពមួយ។
ក្រុមអភិរក្សនិយមក៏បានធ្វើបាតុកម្មដើម្បីជំរុញមិនឲ្យអាមេរិកចុះញ៉មជាមួយរដ្ឋាភិបាលដ៏គាបសង្កត់របស់លោក គីម ដែលបានក្បត់ពាក្យសន្យាបញ្ចប់កម្មវិធីអាវុធនុយក្លេអ៊ែរកាលពីអតីតកាលផងដែរ។
ប៉ុន្តែការស្ទង់មតិសាធារណៈបានចង្អុលបង្ហាញពីការគាំទ្រយ៉ាងខ្លាំងនៃការរីកចម្រើនទៅមុខនៃកិច្ចខិតខំប្រឹងប្រែងផ្នែកកាទូតរបស់ប្រធានាធិបតីកូរ៉េខាងត្បូងដើម្បីបញ្ចុះបញ្ចូលឲ្យមេដឹកនាំកូរ៉េខាងជើងយល់ព្រមចរចាពីការបញ្ចប់កម្មវិធីអាវុធនុយក្លេអ៊ែរ។ ប្រជាប្រិយភាពរបស់លោក គីម នៅក្នុងប្រទេសកូរ៉េខាងត្បូងបានកើនឡើងយ៉ាងខ្លាំង បន្ទាប់ពីជំនួបកំពូលរវាងកូរ៉េទាំងពីរនេះកាលពីខែមេសា ដែលលោក គីម ត្រូវបានគេមើលឃើញថាមិនមានការគំរាមកំហែងនិងមានឆន្ទៈចង់ផ្សះផ្សាគ្នា។
អ្នកស្រី Choi Yun-Mi អ្នករស់នៅទីក្រុងសេអ៊ូលមួយរូបថ្លែងថា៖ «ពាក់ព័ន្ធនឹងលោកមេដឹកនាំ គីម ជុងអ៊ុន ខ្ញុំធ្លាប់មានអារម្មណ៍អវិជ្ជមានជាមួយនឹងលោក ប៉ុន្តែបន្ទាប់ពីខ្ញុំបានឃើញលោកនៅលើទូរទស្សន៍កាលពីជំនួបកំពូលលើកមុនមក អារម្មណ៍របស់ខ្ញុំចំពោះលោកមានភាពប្រសើរឡើង»។
អត្រាគាំទ្រលោកត្រាំ នៅក្នុងប្រទេសកូរ៉េខាងត្បូងក៏មានភាពប្រសើរឡើងផងដែរ មុននឹងឈានដល់ជំនួបកំពូលនៅក្នុងប្រទេសសិង្ហបុរី។
មនុស្សជាច្រើននៅក្នុងទីក្រុង សេអ៊ូល នៅតែបារម្ភថា អាមេរិកនិងកូរ៉េខាងជើងនឹងមិនអាចដោះស្រាយការខ្វែងគំនិតគ្នា ខណៈដែលរដ្ឋាភិបាលក្រុងវ៉ាស៊ីនតោនចង់ឲ្យបញ្ចប់កម្មវិធីអាវុធនុយក្លេអ៊ែរឲ្យបានពេញលេញ មុននឹងដកទណ្ឌកម្មនានា ប៉ុន្តែរដ្ឋាភិបាលក្រុងព្យុងយ៉ាងចង់ឲ្យមានការបន្ធូរបន្ថយម្តងបន្តិចៗអាស្រ័យលើដំណាក់កាលនៃការចរចា។
បន្ទាប់ពីការលុបចោលជំនួបកំពូលជាបណ្តោះអាសន្នកាលពីពេលមុន លោក ត្រាំបានថ្លែងថា លោកបានត្រៀមខ្លួនដើម្បីដើរចេញ ប្រសិនបើលោក គីម មិនប្តេជ្ញាបញ្ចប់កម្មវិធីអាវុធនុយក្លេអ៊ែររបស់ខ្លួន។
លោក Shim Nu-Ri អ្នករស់នៅទីក្រុងសេអ៊ូលមួយរូបទៀតថ្លែងថា៖ «ខ្ញុំបារម្ភថា អាមេរិកប្រហែលលុបចោលជំនួបកំពូលរវាងអាមេរិកនិងកូរ៉េខាងជើងម្តងទៀត»។
ប៉ុន្តែមនុស្សទូទៅនៅក្នុងទីក្រុងសេអ៊ូលរំពឹងថា ជំនួបកំពូលនៅប្រទេសសិង្ហបុរីនឹងផ្តល់ជាលទ្ធផលវិជ្ជមានដែលនឹងបន្ថយជម្លោះយោធា ហើយងាកទៅរកដំណោះស្រាយបែបសន្តិវិធីវិញ៕
ប្រែសម្រួលដោយ ស្រេង លក្ខិណា
