លោកប្រធានាធិបតីកូរ៉េខាងត្បូង Moon Jae-in បាននិយាយនៅថ្ងៃពុធនេះថាលោកចង់ធ្វើការចរចាទល់មុខគ្នាជាមួយមេដឹកនាំកូរ៉េខាងជើង គឹម ជុងអ៊ុន ក៏ប៉ុន្តែទាល់តែមានការបំពេញតាមលក្ខខណ្ឌខ្លះ។
សំណើធ្វើការចរចារបស់លោកប្រធានាធិបតី Moon ជាមួយសមភាគីកូរ៉េខាងជើងរបស់លោកមានឡើងមួយថ្ងៃក្រោយពីពួកអ្នកការទូតមកពីប្រទេសកូរ៉េទាំងពីរបានធ្វើការចរចាជាផ្លូវការលើកទីមួយរបស់ពួកគេ ចាប់តាំងពីខែធ្នូ ឆ្នាំ២០១៥មក។
ប្រធានាធិបតីកូរ៉េខាងត្បូងរូបនេះបាននិយាយប្រាប់ពួកអ្នកកាសែតនៅក្នុងក្រុងសេអ៊ូលថា ជំនួបកំពូលទ្វេភាគីមួយគួរតែបានផលច្រើនជាងការជួបគ្នាជាធម្មតា។ លោក Moon បានថ្លែងថាជោគជ័យតាមកម្រិតណាមួយ ត្រូវតែមានការធានារ៉ាប់រង នៅមុនលោកអង្គុយធ្វើការចរចាជាមួយលោក គឹម ជុងអ៊ុន។
នៅក្នុងការប្រជុំកំពូលកាលពីថ្ងៃអង្គារនៅឯភូមិសន្តិភាព Panmunjom ដែលជាកន្លែងអព្យាក្រិតនៅក្នុងតំបន់គ្មានកងទ័ព ដែលបែងចែកប្រទេសកូរ៉េខាងជើងនិងប្រទេសកូរ៉េខាងត្បូង ប្រទេសកូរ៉េខាងជើងបានយល់ព្រមបញ្ជូនគណៈប្រតិភូមួយទៅកាន់ការប្រកួតកីឡាអូឡាំពិក រដូវធ្លាក់ទឹកកកនៅខែក្រោយក្នុងក្រុង Pyeongchang នៃប្រទេសកូរ៉េខាងត្បូង។ ភាគីទាំងពីរនេះក៏បានយល់ស្របគ្នាធ្វើការចរចាខាងយោធា ដើម្បីបន្ធូរបន្ថយភាពតានតឹងខាងយោធានៅពេលបច្ចុប្បន្ននេះ។
ប្រទេសកូរ៉េខាងត្បូងក៏បានស្នើឱ្យមានការជួបជុំគ្នាមួយលើកទៀតនៃពួកសមាជិកក្រុមគ្រួសារបែកខ្ញែកគ្នាចាប់តាំងពីសង្គ្រាមស៊ីវិលពីឆ្នាំ ១៩៥០ ដល់ឆ្នាំ១៩៥៣ ដែលបានបែងចែកប្រទេសកូរ៉េទាំងពីរនេះ ឱ្យបានប្រព្រឹត្តទៅនៅខែក្រោយនៅពេលចូលឆ្នាំថ្មីតាមចន្ទគតិ នៅពេលដែលការប្រកួតកីឡានៅ Pyeongchang នឹងនៅតែមានធ្វើនៅឡើយ៕
