ពេលចុងក្រោយដែលអ្នកនយោបាយជាន់ខ្ពស់អាហ្វ្រិកខាងត្បូងម្នាក់បានចោទប្រកាន់រដ្ឋាភិបាលសហរដ្ឋអាមេរិកពីការព្យាយាមបង្កចលាចលឲ្យមានការផ្លាស់ប្តូររបបគឺនៅក្នុងខែកុម្ភៈ ប៉ុន្តែការចោទប្រកាន់នោះត្រូវបានអាមេរិកច្រានចោលដោយចំអក។
លោកអគ្គរដ្ឋទូត Patrick Gaspard បាននិយាយបែបកំប្លែងថា៖ «បើសិនជាខ្ញុំរៀបចំឲ្យមានការធ្វើបដិវត្តន៍មែននោះ បដិវត្តន៍នោះនឹងមានទម្រង់ជាពិធី Mardi Gras ដែលរួមមានម្ហូបអាហារ តន្ត្រី និងការរាំច្រៀង»។
ក៏ប៉ុន្តែ ក្រុមអ្នកការទូតនៃប្រទេសទាំងពីរមិនមានអ្នកណាសើចចំអកចំពោះការចោទប្រកាន់ថ្មីដែលធ្វើឡើងដោយគណបក្សសមាជជាតិអាហ្វ្រិកខាងត្បូងឡើយ។
លើកនេះអ្នកនាំពាក្យគណបក្ស គឺលោក Zizi Kodwa បានប្រាប់ប្រព័ន្ធផ្សព្វផ្សាយក្នុងស្រុកថា រដ្ឋាភិបាលអាមេរិកកំពុង«ធ្វើឲ្យប៉ះពាល់ដល់រដ្ឋាភិបាលដែលកើតចេញពីការបោះឆ្នោតបែបប្រជាធិបតេយ្យ»។
ក្រុមអ្នកតំណាងមកពីរដ្ឋាភិបាលប្រទេសទាំងពីរ បានបដិសេធភ្លាមៗទៅលើការអះអាងនោះ រួមទាំងអ្នកនាំពាក្យក្រសួងការបរទេសអាហ្វ្រិកខាងត្បូង លោក Clayson Monyela ផងដែរ។
លោក Clayson Monyela បាននិយាថា៖ «ទាំងនោះមិនមែនជាការយល់ឃើញរបស់យើងក្នុងនាមជារដ្ឋាភិបាលទេ។ ទស្សនៈយល់ឃើញរបស់រដ្ឋាភិបាលគឺថា ទំនាក់ទំនងរបស់យើងជាមួយសហរដ្ឋអាមេរិកគឺរឹងមាំ កក់ក្តៅ និងប្រកបដោយភាពស្មោះត្រង់ទៀតផង»។
ការអធិប្បាយរបស់លោក Kodwa បានធ្វើឡើងភ្លាមៗបន្ទាប់ពីកាសែតអង់គ្លេសមួយបានសរសេរថា ភ្នាក់ងារស៊ើបអង្កេតកណ្ដាលរបស់សហរដ្ឋអាមេរិក ដែលគេហៅកាត់ថា CIA បានជួយដល់រដ្ឋាភិបាលអាផាថេតរបស់អាហ្វ្រិកខាងត្បូង ក្នុងការចាប់លោក Nelson Mandela កាលពីឆ្នាំ១៩៦២។
របាយការណ៍នោះបានស្រង់សម្តីភ្នាក់ងារចូលនិវត្តន៍ម្នាក់នៃក្រុមCIA ដែលបាននិយាយថា សហរដ្ឋអាមេរិកបានប្រមើលមើលឃើញប្រធានាធិបតីអាហ្វ្រិកខាងត្បូងនៅពេលអនាគត ថាជាមនុស្សមានសណ្ដានចិត្តបែបកុម្មុយនិស្ត។
លោក Kodwa បាននិយាយថា ការចោទប្រកាន់របស់ CIA គឺ ជាការញុះញង់ដ៏ធ្ងន់ធ្ងរ ហើយលោកបានថ្លែងថា ទីភ្នាក់ងារស៊ើបអង្កេតកំពុងមានប្រតិបត្តិការក្នុងប្រទេសអាហ្វ្រិកខាងត្បូង។ អ្នកនាំពាក្យរូបនេះមិនបានឆ្លើយតបទៅនឹងការហៅទូរស័ព្ទរបស់ VOA ដែលសុំការបំភ្លឺអំពីបញ្ហានេះជាច្រើនដងទេ។
អ្នកនាំពាក្យស្ថានទូតអាមេរិក លោកស្រី Cindy Harvey បានច្រានចោលការអះអាងនេះយ៉ាងដាច់អហង្ការ។
លោកស្រីបានថ្លែងថា៖ «ជាការពិតណាស់ អាហ្វ្រិកខាងត្បូងគឺជាដៃគូយុទ្ធសាស្ត្រ និងជាមិត្តភក្តិររបស់សហរដ្ឋអាមេរិក។ សហរដ្ឋអាមេរិកមិនចាត់ទុករដ្ឋាភិបាលដែលកើតចេញពីការបោះឆ្នោតរបស់អាហ្វ្រិកខាងត្បូង និងស្ថាប័នប្រជាធិបតេយ្យរបស់ខ្លួនដ៏រឹងមាំនេះ ថាជារបបទេ។ ហើយការអះអាងរបស់ពួកគេដែលថាយើងព្យាយាមកកូរកកាយលទ្ធិប្រជាធិបតេយ្យរបស់អាហ្វ្រិកខាងត្បូង គឺផ្ទុយពីទឹកចិត្តមោទនភាពនិងទំនាក់ទំនងដ៏យូរអង្វែងដែលយើងមានជាមួយអាហ្វ្រិកខាងត្បូង»។
លោកស្រី Harvey និយាយថា ស្ថានទូតអាមេរិកមិនមានព័ត៌មានអំពីប្រតិបត្តិការរបស់CIA នៅក្នុងប្រទេសអាហ្វ្រិកខាងត្បូងក្នុងទសវត្សរ៍ឆ្នាំ១៩៦០ ដែលគេបានចោទប្រកាន់នោះទេ។
លោកស្រី HarveyនិងលោកMonyela បាននិយាយថា រដ្ឋាភិបាលរបស់ពួកគេប្តេជ្ញាចិត្តរក្សាទំនាក់ទំនងដ៏រឹងមាំនេះ។ ប៉ុន្តែប្រទេសអាហ្រ្វិកខាងត្បូងកាលពីប៉ុន្មានឆ្នាំកន្លងទៅ បានងាកចេញពីបស្ចឹមប្រទេសយ៉ាងច្បាស់ ដោយនៅពេលចុងក្រោយបង្អស់បានចូលរួមក្នុងប្លុកសេដ្ឋកិច្ចមួយដែលគេស្គាល់ថាជា BRICS ដែលរួមមានប្រទេសប្រេស៊ីល រុស្ស៊ី ឥណ្ឌា និង ចិន៕
ប្រែសម្រួលដោយ នៀម ឆេង
