គណបក្សសមាជជាតិអាហ្រ្វិក ដែលជាគណបក្សកាន់អំណាចនៅប្រទេសអាហ្វ្រិកខាងត្បូងបាននិយាយកាលពីថ្ងៃអាទិត្យថា គណបក្សរបស់ខ្លួនបានប្រាប់រដ្ឋាភិបាលរបស់លោកប្រធានាធិបតី Jacob Zuma ឲ្យដកសមាជិកភាពរបស់ប្រទេសអាហ្វ្រិកខាងត្បូងចេញពីតុលាការឧក្រិដ្ឋកម្មអន្តរជាតិ។
ប្រទេសអាហ្វ្រិកខាងត្បូងនិងតុលាការឧក្រិដ្ឋកម្មអន្តរជាតិ មានភាពចម្រូងចម្រាស់នឹងគ្នា ចាប់តាំងពីប្រទេសនេះមិនបានចាប់ខ្លួនប្រធានាធិបតីស៊ូដង់ គឺលោកOmar al-Bashir ក្នុងអំឡុងពេលនៃជំនួបកំពូលរបស់សហភាពអាហ្រ្វិក នៅប្រទេសអាហ្វ្រិកខាងត្បូង កាលពីខែមិថុនាឆ្នាំមុន។ ទើបតែសប្តាហ៍មុននេះ តុលាការឧក្រិដ្ឋកម្មអន្តរជាតិ បានស្នើឲ្យប្រទេសអាហ្វ្រិកខាងត្បូង ផ្តល់ការបកស្រាយអំពីមូលហេតុដែលមិនព្រមចាប់ខ្លួនលោក Bashir ។
ប្រធានអនុគណៈកម្មាធិការទំនាក់ទំនងអន្តរជាតិនៃក្រុមប្រឹក្សាប្រតិបត្តិជាតិរបស់គណបក្សសមាជជាតិអាហ្រ្វិក គឺលោកស្រី Edna Molewa ថ្លែងថា គណបក្សសមាជជាតិអាហ្រ្វិកយល់ឃើញថា តុលាការឧក្រិដ្ឋកម្មអន្តរជាតិ មិនបានបម្រើការឲ្យទ្វីបអាហ្វ្រិកដូចដែលតុលាការនេះបម្រើឲ្យប្រទេសនានានោះទេ។ លោកស្រី Molewa ក៏បាននិយាយផងដែរថា សេចក្ដីសម្រេចរបស់គណបក្សសមាជជាតិអាហ្រ្វិក គឺស្របគ្នាជាមួយនឹងការយល់ឃើញរបស់សហភាពអាហ្វ្រិក ទៅលើតុលាការឧក្រិដ្ឋកម្មអន្តរជាតិ។
លោកស្រី Molewa ថ្លែងថា «ដូចដែលអ្នកដឹងស្រាប់ហើយថា មានការវាយតម្លៃបន្តបន្ទាប់ទៅលើតុលាការឧក្រិដ្ឋកម្មអន្តរជាតិដោយសហភាពអាហ្រ្វិកទាំងមូល ដូច្នេះថ្ងៃនេះ គណបក្សសមាជជាតិអាហ្វ្រិកបានលើកឡើងពីអ្វី ដែលសហភាពអាហ្រ្វិក បានសម្រេចនៅក្នុងក្រុមប្រឹក្សាជាន់ខ្ពស់នៅថ្ងៃនេះ ដើម្បីថ្លែងទៅកាន់រដ្ឋាភិបាលអាហ្វ្រិកខាងត្បូងថា យើងផ្តល់ដល់អ្នកនូវអាណត្តិមួយ សូមទៅពិនិត្យឡើងវិញនូវទំនាក់ទំនងរបស់យើងជាមួយនឹងតុលាការឧក្រិដ្ឋកម្មអន្តរជាតិ។ ហេតុអ្វី? ពីព្រោះយើងមានជំនឿថា តុលាការឧក្រិដ្ឋកម្មអន្តរជាតិ តាមពិតមិនមែនបម្រើឲ្យទ្វីបអាហ្រ្វិក ដូចប្រទេសដ៏ទៃទៀតនោះទេ»។
លោកស្រី Molewa បាននិយាយថា ក្រុមប្រឹក្សាប្រតិបត្តិជាតិរបស់គណបក្សសមាជជាតិអាហ្រ្វិក បានធ្វើសេចក្ដីសម្រេចតាំងពីមុនពេលដែលតុលាការឧក្រិដ្ឋកម្មអន្តរជាតិ បានស្នើឲ្យរដ្ឋាភិបាលអាហ្រ្វិកខាងត្បូង បកស្រាយអំពីមូលហេតុ ដែលខ្លួនមិនបានចាប់ខ្លួនលោកប្រធានាធិបតី Bashir។
លោកស្រីបន្តថា គណបក្សសមាជជាតិអាហ្វ្រិក បានពិចារណាទៅលើសេចក្ដីសម្រេចនេះ តាំងពីយូរណាស់មកហើយ។ លោកស្រី Molewa បាននិយាយថា «វាគឺជាបញ្ហាមួយ ដែលត្រូវបានវែកញែក អស់រយៈពេលប្រមាណ២ឆ្នាំមកហើយ នៅពេលដែលគណបក្សសមាជជាតិអាហ្វ្រិក បានធ្វើសេចក្ដីសម្រេចនេះ គឺគ្រាន់តែគណបក្សសមាជជាតិអាហ្វ្រិកទើបតែអនុវត្តនៅពេលនេះតែប៉ុណ្ណោះ»។
លោកស្រី Molewa បានបន្តថា គណបក្សសមាជជាតិអាហ្វ្រិក នៅតែមានជំនឿទៅលើគោលការណ៍ជាមូលដ្ឋានរបស់តុលាការឧក្រិដ្ឋកម្មអន្តរជាតិ ដូចជាការទប់ស្កាត់របបប្រល័យពូជសាសន៍ និងការបញ្ឈប់ការរំលោភសិទ្ធិមនុស្ស។ លោកស្រីបានបន្ថែមថា ប៉ុន្តែបច្ចុប្បន្ននេះ បញ្ហាទាំងនោះ អាចទុកឲ្យតុលាការសិទ្ធិមនុស្សអាហ្វ្រិកជាអ្នកដោះស្រាយបាន។
លោកស្រី Molewa បានលើកឡើងថា គណបក្សសមាជជាតិអាហ្វ្រិក មានការព្រួយបារម្ភអំពីប្រទេសមានអំណាចមួយចំនួន ដែលបដិសេធមិនព្រមធ្វើជាសមាជិករបស់តុលាការឧក្រិដ្ឋកម្មអន្តរជាតិ ខណៈដែលប្រទេសទាំងនោះមានអំណាចក្នុងការណែនាំប្រទេសផ្សេងៗទៀតឲ្យចូលជាសមាជិករបស់តុលាការឧក្រិដ្ឋកម្មអន្តរជាតិ។ លោកស្រី Molewa បានថ្លែងថា «ដូច្នេះ ប្រសិនបើប្រទេសអាហ្រ្វិកខាងត្បូងក៏ប្រកាសអំពីការសម្រេចចិត្តរបស់ខ្លួនឯងថា នឹងដកខ្លួនចេញពីសមាជិកភាពតុលាការឧក្រិដ្ឋកម្មអន្តរជាតិ យើងមានជំនឿថាសេចក្ដីសម្រេចនេះត្រូវតែគោរពតាម»។
មន្រ្តីរបស់រដ្ឋាភិបាលអាហ្វ្រិកខាងត្បូងបាននិយាយថា ពួកគេមិនអាចចាប់ខ្លួនលោកប្រធានាធិបតី Bashir បានទេ ព្រោះថាមេដឹកនាំស៊ូដង់រូបនេះ មានអភ័យឯកសិទ្ធិ ជាមេដឹកនាំរបស់អាហ្វ្រិក នៅពេលដែលលោកបានចូលរួម នៅក្នុងជំនួបកំពូលរបស់សហភាពអាហ្រ្វិក នៅប្រទេសអាហ្រ្វិកខាងត្បូងកាលពីខែមិថុនាឆ្នាំមុន៕
ប្រែសម្រួលដោយ ហុង ចិន្តា
