ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណបក្ស​នយោបាយ​មួ​យចំនួន​គាំទ្រ និង​ប្តេ​ជ្ញាចិត្ត​​ទប់​ស្កាត់​គ្រឿង​ស្រវឹង​តាម​មូលដ្ឋាន


តំណាងគណបក្សនយោបាយមួយចំនួន បានចុះហត្ថលេខាប្តេជ្ញាចិត្តក្នុងញត្តិរួមគ្នាមួយ ក្នុងការបង្ការទប់ស្កាត់គ្រឿងស្រវឹង និងការលើកកម្ពស់សហគ្រិននារីវ័យក្មេងតាមមូលដ្ឋាន ដែលធ្វើឡើងនៅក្នុងសណ្ឋាគារសាន់វ៉េ រាជធានីភ្នំពេញ នៅថ្ងៃទី២៤ ខែឧសភា ឆ្នាំ២០២២។ (លាស់ លីបលីប/វីអូអេ)
តំណាងគណបក្សនយោបាយមួយចំនួន បានចុះហត្ថលេខាប្តេជ្ញាចិត្តក្នុងញត្តិរួមគ្នាមួយ ក្នុងការបង្ការទប់ស្កាត់គ្រឿងស្រវឹង និងការលើកកម្ពស់សហគ្រិននារីវ័យក្មេងតាមមូលដ្ឋាន ដែលធ្វើឡើងនៅក្នុងសណ្ឋាគារសាន់វ៉េ រាជធានីភ្នំពេញ នៅថ្ងៃទី២៤ ខែឧសភា ឆ្នាំ២០២២។ (លាស់ លីបលីប/វីអូអេ)

គណ​បក្ស​នយោ​បាយ​ចំនួន​១០​ ក្នុង​ចំណោម​គណ​បក្ស​ដែល​នឹងចូលរួម​ប្រកួត​ប្រជែង​ការ​បោះឆ្នោ​តឃុំ​សង្កាត់​ចំនួន​សរុប​១៧​ បាន​បង្ហាញ​ការ​គាំទ្រ​របស់ផងខ្លួន​ ចំពោះ​ការ​ទប់​ស្កាត់​ការ​ប្រើ​ប្រាស់​គ្រឿង​ស្រវឹង ​នៅ​តាម​សហ​គមន៍មូល​ដ្ឋាន​ បើ​ទោះ​បី​ជាដឹង​ថា​កា​រដាក់ចេញ​គោល​នយោ​បាយ​កាត់​បន្ថយ​គ្រឿង​ស្រវឹងនោះ​អា​ច​ធ្វើ​ឱ្យ​បាត់​សម្លេង​ឆ្នោត​គាំទ្រ​ របស់​ក្រុម​អ្នក​ចូល​ចិត្ត​គ្រឿង​ស្រវឹង​យ៉ាង​ណា​ក្តី​។​

តំណាង​គណ​បក្សទាំង​នោះ ​បា​នប្តេជ្ញា​ចិត្តថា​នឹង​រៀប​ចំគោល​នយោបាយ ​និង​ដីកា​ទប់ស្កាត់​ផល​ប៉ះ​ពាល់​នៃ​ការ​ប្រើ​ប្រាស់​គ្រឿង​ស្រវឹង​ និង​លើក​កម្ពស់​សហ​គ្រិន​នារីវ័យក្មេង​នៅតាម​សហគមន៍ នៅ​ពេល​គណបក្ស​ទាំង​នោះ​ជាប់​ឆ្នោត​ជាមេឃុំ​។

គណបក្ស​ចំនួន​១០ដដែល​នោះ បាន​ចុះ​ហត្ថលេខា​ផ្តល់​ជា​សក្ខីកម្ម ក្នុង​ការ​បេ្ត​ជ្ញា​ចិត្ត​ និង​គាំទ្រ​ការ​ដាក់​ចេញគោល​នយោបាយ​ ទប់ស្កាត់​ និង​បង្ការ​គ្រឿង​ស្រវឹង​ ​ជាមួយ​ក្រុម​អង្គការ​សង្គម​ស៊ីវិល ដែល​ដឹក​នាំ​រៀប​ចំ​ដោយ​មជ្ឈមណ្ឌល​ប្រជាពលរដ្ឋ​ដើម្បីអភិវឌ្ឍន៍ ​និង​សន្តិ​ភាព ហៅ​កាត់​ថា​ (PDP) ​នៅ​សណ្ឋាគារ​សាន់វ៉េ​ក្នុង​រាជធានី​ភ្នំពេញ​ កាល​ពីព្រឹក​ថ្ងៃ​២៤​ខែ​ឧសភា​នេះ។

លោក ​អូក អ៊ី ​ស្ថាបនិក​ម្នាក់​នៃ​គណបក្ស​កម្ពុជានិយម​ ដែល​មានលោក​ យ៉ែម បុញ្ញឫទ្ធិ​ ជា​ប្រធានបា​ន​ចុះ​ហត្ថ​លេខាលើ​ញត្តិ​រួមមួយប្តេជ្ញា​ចិត្តទប់ស្កាត់​គ្រឿង​ស្រវឹង និងបាន​ប្រាប់​អ្នក​សារព័ត៌​មាន​សំឡេង​សហរដ្ឋ​អាមេរិក​ (វីអូអេ​) នៅ​ពេល​លោក​កំពុង​ចូលរួមកម្ម​វិធី​នោះ​ថា ការ​គាំទ្រ​ និង​ការ​ដាក់​ចេញ​គោល​នយោ​បាយ​ទប់​ស្កាត់​គ្រឿង​ស្រវឹង​នេះ ធ្វើ​ឡើង​ដោយ​មើល​ឃើញផល​ប៉ះ​ពាល់​នៃគ្រឿង​ស្រវឹង​លើ​សុខភាព​ប្រជាពលរដ្ឋ​។ ​

លោក​ថ្លែងថា៖ ​«ពេ​លដែល​យើង​ដាក់​វិធាន​ការ​នេះ​ទៅ​ប្រហាក់​ប្រហែល ឬ​អាច​ប៉ះពាល់​អារម្មណ៍​គាត់​ដែរ ដែល​គាត់​និយម[ផឹកគ្រឿង​ស្រវឹង​]។...អ៊ីចឹង​យើង​យល់​ឃើញ​ថា​ យើង​នឹង​ធ្វើ​ច្បាប់​ បើ​សិន​ជា​យើង​មាន​ឱកាស​ដឹក​នាំ​រដ្ឋាភិបាល​ យើង​ជំរុញ​ឱ្យ​ច្បាប់​គ្រឿង​ស្រវឹង​ឱ្យរឹត​ត្បិត​មែនទែន»។

តំណាងគណបក្សនយោបាយ ថតរូបភ្ជាប់ជាមួយញត្តិដែលបានចុះហត្ថាលេខារួមគ្នា ស្តីពីការបេ្តជ្ញាចិត្តបង្ការ ទប់ស្កាត់គ្រឿងស្រវឹង និងការលើកកម្ពស់សហគ្រិននារីវ័យក្មេងតាមមូលដ្ឋាន ដែលធ្វើឡើងនៅក្នុងសណ្ឋាគារសាន់វ៉េ រាជធានីភ្នំពេញ នៅថ្ងៃទី២៤ ខែឧសភា ឆ្នាំ២០២២។ (លាស់ លីបលីប/វីអូ
តំណាងគណបក្សនយោបាយ ថតរូបភ្ជាប់ជាមួយញត្តិដែលបានចុះហត្ថាលេខារួមគ្នា ស្តីពីការបេ្តជ្ញាចិត្តបង្ការ ទប់ស្កាត់គ្រឿងស្រវឹង និងការលើកកម្ពស់សហគ្រិននារីវ័យក្មេងតាមមូលដ្ឋាន ដែលធ្វើឡើងនៅក្នុងសណ្ឋាគារសាន់វ៉េ រាជធានីភ្នំពេញ នៅថ្ងៃទី២៤ ខែឧសភា ឆ្នាំ២០២២។ (លាស់ លីបលីប/វីអូ

លោកបន្ថែម​ថា៖ ​«កាលណា​យើង​ខ្លាច​បាត់បង់​សំឡេង​ឆ្នោត​ពី​គាត់​ អាហ្នឹង​ដូច​ជា​យើង​លើកទឹ​ក​ចិត្ត​គាត់​ឱ្យ​សេព​គ្រឿង​ស្រវឹង​អ៊ីចឹង​»។

​ចំណែក ​អ្នក​នាំ​ពាក្យ​គណបក្ស​ហ៊្វុនស៊ិនប៉ិចលោក ញឿន រ៉ាដែន បាន​ប្រាប់​អ្នក​យក​ព័ត៌មាន​ឱ្យវីអូអេស្រដៀង​គ្នាដែរ​ថា​ ការ​គាំទ្រ ​និង​ការ​ដាក់​ចេញ​គោល​នយោ​បាយ​របស់​បក្ស​ ដើម្បី​អប់​រំ ​និង​ទប់ស្កាត់​ការ​ប្រើ​ប្រាស់​គ្រឿង​ស្រវឹង​ក្នុង​មូលដ្ឋាន​ គឺជា​រឿង​សំខាន់​ ដើម្បី​ឱ្យ​ប្រជា​ពលរដ្ឋ​បាន​យល់​ដឹង​ពី​ផល​វិបាក​នៃ​គ្រឿង​ស្រវឹង ​ទាក់​ទង​ការ​ខាត​បង់​ថវិកា​ និង​សុខ​ភាពផ្ទាល់​ខ្លួន​ជាដើម បើ​ទោះ​បីជា​ប្រជា​ពល​រដ្ឋ​មួយ​ចំនួន​មិន​ទាន់​យល់​គោល​នយោបាយ​បក្ស និង​មិន​ទាន់​គាំទ្រយ៉ាង​ណា​ក្តី។

អ្នក​នាំពាក្យ​គណបក្ស​រាជានិយម​មួយ​នេះ​ ​សង្ឃឹម​ថា ថ្ងៃណា​មួ​យប្រជា​ពល​រដ្ឋ​ដែល​មិន​ពេញ​ចិត្ត​គោល​នយោ​បាយ​បង្ការ ​ទប់ស្កាត់​គ្រឿង​ស្រវឹងនេះ ​នឹង​បាន​យល់​ និង​គាំទ្រ​។

លោកថ្លែងថា៖ ​«​ខ្ញុំ​គិត​ថាសំខាន់​ណាស់​ថ្ងៃនេះ ​ដែលយើង​បាន​ចូលរួម​ទាំង​អស់​គ្នា ហើយ​យើង​បាន​ស្តាប់​ ហើយជជែកគ្នា​ គ្រប់​គណបក្ស​នយោបាយ​ទាំង​១០​នេះ ធ្វើ​ឱ្យយើង​ដឹង​ពីគោល​នយោបាយ​រៀង​ៗ​ខ្លួន​ ហើយ​យើង​គិត​ថាគណបក្ស​ទាំង​អស់​មានភាព​ចាស់ទុំ​ណាស់ ហើយ​គាត់​បាន​យល់ដឹង​ច្បាស់​អំពីការ​ចូលរួម​សុខទុក្ខ​របស់ប្រជារាស្រ្តនៅ​តាម​មូលដ្ឋាន»។ ​

លោក​បន្ថែម​ថា៖ ​«គោល​នយោ​បាយ​នេះ អាច​ថា​អ្នកខ្លះ​មិនទាន់សប្បាយ​ចិត្ត​ទេ​ ដោយ​សារ​គាត់​អត់ទាន់​យល់ ប៉ុន្តែ​ថ្ងៃ​អនាគត​ពួកគាត់​ហ្នឹង​យល់​ ថា​គោល​នយោបាយ​នេះ​សំខាន់​ណាស់​ ដែលធ្វើ​ឱ្យ​សង្គម​កម្ពុជា​នេះ​មាន​សុខដុមរមនា​នៅ​ពេល​អនាគត»។

គណបក្ស​នយោបាយទាំង​១០​ ​ដែល​ប្តេជ្ញា​ព្រ​មគ្នា​ក្នុង​ការ​ទប់ស្កាត់​គ្រឿង​ស្រវឹងនៅតាម​សហគមន៍​នោះ ​រួម​មា​នគណបក្ស​ឆន្ទៈ​ខ្មែរ​ គណបក្ស​ហ៊្វុនស៊ិនប៉ិច គណបក្ស​យុវជន​កម្ពុជា ​គណបក្ស​ឯកភាពជាតិ​ខ្មែរ ​គណបក្ស​ខ្មែរ​អភិវឌ្ឍន៍សេដ្ឋកិច្ច គណបក្សខ្មែរ​តែមួយ ​គណបក្ស​កែ​ទម្រង់​កម្ពុជា ​គណប​ក្ស​ខ្មែរ​រួបរួម​ជាតិ​ គណ​បក្ស​កម្ពុជានិយម​ និង​គណបក្ស​សញ្ជាតិ​កម្ពុជា។

ដោយ​ឡែក​ ​គណ​បក្ស​ប្រជា​ជន​កម្ពុជា ដែល​កំពុង​គ្រប់​គ្រង់​ប្រទេស​ និង​គណ​បក្ស​ចំនួន​៦​ផ្សេង​ទៀត មិន​បាន​បង្ហាញវត្ត​មា​ន​ និង​មិន​បាន​ចុះហត្ថ​លេខា​ជា​ភស្តុតាង​ ​ក្នុង​ការ​បង្ហាញ​ឆន្ទៈ​ទប់​ស្កាត់ និង​បង្ការ​គ្រឿងស្រវឹងក្នុង​កម្ម​វិធី​រៀប​ចំ​ដោយ​មជ្ឈមណ្ឌល​ប្រជាពលរដ្ឋ​ដើម្បីអភិវឌ្ឍន៍ ​និង​សន្តិ​ភាពនោះ​ទេ ទោះ​បីជា​មាន​ការ​អញ្ជើញ​យ៉ាង​ណា​ក្តី​។ ​

ប្រធាន​មជ្ឈមណ្ឌល​ប្រជាពល​រដ្ឋ​ដើម្បី​អភិវឌ្ឍន៍ ​និង​សន្តិភាព​ លោក​យង់ គិមអេង​ ថ្លែង​ប្រាប់​អ្នកសារព័ត៌មាន​វីអូអេថា ​ការ​រៀប​ចំ​កម្មវិធីចុះ​ហត្ថ​លេខា​ ប្តេជ្ញា​ចិត្ត​លើ​គោល​នយោបាយ​បង្ការ ​ទប់ស្កាត់​នៃការ​ប្រើ​ប្រាស់គ្រឿង​ស្រវឹង​ និង​ដីកា​លើក​កម្ពស់​សហគ្រិន​នារីវ័យក្មេ​ង​ មាន​បំណង​ដើម្បី​កាត់បន្ថយ​ការ​ប្រើប្រាស់គ្រឿង​ស្រវឹង​នៅ​តាម​ថ្នាក់​មូលដ្ឋាន និង​ការ​លើក​កម្ពស់​ជីវភាព​រស់នៅ​ និង​សុវត្ថិ​ភាព​ សន្តិ​សុខនៅ​តាម​ភូមិឃុំ និង​ធ្វើ​យ៉ាង​ណា​កុំ​ឱ្យ​ស្ត្រី និង​កុមារ​រង​គ្រោះ​ដោយ​សារ​បញ្ហាគ្រឿង​ស្រវឹង​ ដែល​ស្រប​ទៅតាម​ការ​ចង់​បាន​របស់​ប្រជាពលរដ្ឋ​ដែល​ជា​ម្ចាស់​សន្លឹក​ឆ្នោត​។

លោក​ថ្លែង​ថា៖ ​«ហើយ​អ្វីដែល​យើង​ធ្វើ​ថ្ងៃនេះ​មិនមែន​ ពួកខ្ញុំ​សុខៗ​ធ្វើ​ទេ ដោយ​សារ​ប្រជាពលរដ្ឋ​នៅ​តាម​សហ​គមន៍ ​បណ្តាញ​យុវជន​ជា​ច្រើន​ នៅ​តាម​ខេត្ត​គឺ​រាប់ពាន់នាក់​ ដែលស្នើ​សុំ​ឱ្យយើង​ធ្វើកិច្ច​ការ​ជាមួយ​គណបក្ស​នយោ​បាយ​។ អ៊ីចឹង​ហើយ​បាន​ជាយើងរៀប​ចំ​ធ្វើ​ឱ្យមាន​ការ​ប្តេជ្ញាចិត្ត​ថ្ងៃនេះ ពី​គណបក្ស​នយោបាយ​ចំពោះ​ម្ចាស់​ឆ្នោត គាត់​ទាម​ទារ​ គាត់​ចង់​បាន​ហ្នឹង​»។

លោក​បន្ថែម​ថាអ្នក​នយោបាយ​មួយ​ចំនួន​បាន​មា​នការ​យល់ច្រឡំ​ និង​មើល​រំលង​គោល​នយោបាយ​គ្រឿង​ស្រវឹង ដោយ​ខ្លាច​ប៉ះពាល់​ខ្លួន​ឯង​ ដែលជាហេតុបណ្តាលឱ្យ​នៅ​មាន​អំពើ​ហិង្សា ការ​ខាតបង់​ថវិកា និង​ប៉ះ​ពាល់​សុខ​ភាពសាធារណៈ​របស់ប្រជា​ពល​រដ្ឋ​ជា​ដើម។ លោក​ចង់​ឃើញគណបក្ស​ទាំង​អស់​យកចិត្ត​ទុកដាក់​ និង​ដាក់​ចេញ​ការ​ប្តេជ្ញា​ចិត្ត​ គ្រប់​គ្រងបញ្ហា​គ្រឿង​ស្រវឹង​នេះ​ឱ្យ​មាន​ប្រសិទ្ធិភាព​។ ​

លោកសង្កត់​ធ្ងន់​ថា​៖ «​បើ​យើងមិន​កាត់​បន្ថយ​ការ​ប្រើប្រាស់គ្រឿង​ស្រវឹង ​ធ្វើម៉េច​យើង​កាត់​បន្ថយ​ហិង្សាបាន។ អ៊ីចឹង​បើសិន​ជាអ្នកនយោ​បាយ អត់​បែង​ចែក​បញ្ហា​ហ្នឹង​ឱ្យច្បាស់​លាស់​ទេ នៅ​តែ​យល់ច្រឡំ​ទេ​ គឺ​បញ្ហា​ដែល​កើត​ក្នុង​សហគមន៍​ហ្នឹង​គឺ​ យើង​មិនអាច​ដោះស្រាយ​ចេញ​ទេ»។

បើ​តាមលោក​ ​យង់ គិម​អេង​ ការ​ផ្សព្វ​ផ្សាយ​គ្រឿង​ស្រវឹង​នៅ​តាម​ទីសា​ធារណៈ​ក្នុង​ប្រទេស​កម្ពុជា គឺ​ហាក់​ដូច​ជាទី​កន្លែង​សម្បូរបែប ឬ​ជាឋាន​សួគ៌​ផ្សព្វផ្សាយ​គ្រឿង​ស្រវឹង ដែល​បញ្ហា​នេះ គឺមិនបានចំណេញ​សេដ្ឋ​កិច្ច​ជាតិ​នោះទេ តែ​វា​ធ្វើ​ឱ្យប៉ះពាល់​ធនធា​ន​មនុស្ស​ ធ្វើ​ឱ្យ​កើត​បញ្ហាច្រើន​ក្នុង​សង្គម​ និង​ទាញ​ទម្លាក់​សេដ្ឋ​កិច្ច​ជាតិ​ជា​ដើម​។ ដូច្នេះ​ លោក​ថា ​កម្ពុជា​ ក៏​គួរតែ​មាន​ច្បាប់ក្នុង​ការ​គ្រប់គ្រង់​គ្រឿង​ស្រវឹង​ដូច​ប្រទេស​ដទៃ​ និ​ងផ្លាស់​ប្តូរ​ការ​ផ្សព្វ​ផ្សាយ​គ្រឿង​ស្រវឹង​តាម​ទីសាធារណៈ ​ទៅជា​ការ​ផ្សាយកន្លែង​ទេសចរណ៍ ​ដើម្បី​អាច​ទាក់ទាញ​ភ្ញៀវ​ជាតិ​ និង​អន្តរ​ជាតិ​។

​គួរ​កត់​សម្គាល់​ផង​ដែរ​ថា​ ជា​រៀង​រាល់​ឆ្នាំ​នៅ​លើពិភពលោក ​មនុស្ស​ជាង​៣​លាន​នាក់​បាន​ស្លាប់​ដោយ​សារ​គ្រឿង​ស្រវឹង​ និ​ងបង្កឱ្យ​មាន​ជំងឺ​ជាង​២០០​មុខ​ ដូច​ជា​លើស​សម្ពាធ​ឈាម​ ជំងឺ​បេះដូង​ ជំងឺ​ថ្លើម​ រលាក​លំពែង ​ដាច់​សរសៃ​ឈាម​ខួរក្បាល ​បញ្ហា​សរសៃប្រសាទ​ រួមទាំ​ង​គ្រោះថ្នាក់​ចរាចរណ៍ និង​អំពើ​ហិង្សា​ក្នុង​ស​ហគមន៍​។ នេះ​បើ​តាម​ញត្តិ​នៃការ​តាំង​ចិត្តរួម​នោះ​ ​ចុះហត្ថ​លេខា​ដោយ​បក្ស​នយោបាយ​ចំនួន​១០ ​ធ្វើ​ឡើង​នៅ​ថ្ងៃទី​២៤​ ខែ​ឧសភា​ ឆ្នាំ​២០២២​នេះ៕

XS
SM
MD
LG