ខណៈយុទ្ធនាការបោះឆ្នោតក្រុមប្រឹក្សា ឃុំសង្កាត់ កំពុងដំណើរការ គណបក្សគ្រប់គ្រងប្រទេសគឺគណបក្សប្រជាជនកម្ពុជា បានអញ្ជើញមន្ត្រីដែលត្រៀមបំពេញការងារជា ប្រធាន អនុប្រធាន និងលេខាការិយាល័យបោះឆ្នោត ដើម្បីចូលរួមវគ្គបំប៉ន មន្ត្រីការិយាល័យបោះឆ្នោតក្រុមប្រឹក្សា ឃុំសង្កាត់ អាណត្តិទី៥ ឆ្នាំ២០២២។ នេះបើយោងតាមលិខិតមួយចំនួនដែលវីអូអេទទួលបាននាពេលថ្មីៗនេះ។
ការចេញលិខិតអញ្ជើញយ៉ាងដូច្នេះ បានធ្វើឱ្យគណបក្សមួយចំនួនមានការសង្ស័យ និងព្រួយបារម្ភនឹងការទិញទឹកចិត្តពាក់ព័ន្ធការបោះឆ្នោត ដែលអាចនាំឱ្យដំណើរការបោះឆ្នោតប្រព្រឹត្តទៅដោយមានបញ្ហាចម្រូងចម្រាសមួយចំនួន ទាក់ទងនឹងភាពសេរី ត្រឹមត្រូវ និងយុត្តិធម៌សម្រាប់ការបោះឆ្នោត។
អនុប្រធានគណបក្សភ្លើងទៀន លោក សុន ឆ័យ ប្រាប់វីអូអេនៅថ្ងៃច័ន្ទនេះថា គណបក្សរបស់លោកកំពុងតែតាមដានមើលថា តើលិខិតនោះពិតប្រាកដមែនឬយ៉ាងណា។ បើនេះជាការពិត លិខិតទាំងនោះ អាចត្រូវបានចាត់ទុកថា ជាទម្រង់នៃការរំលោភទៅលើឯករាជ្យភាពរបស់គណៈកម្មាធិការជាតិរៀបចំការបោះឆ្នោត(គ.ជ.ប) ហើយអាចត្រូវបានគេគិតថា ជាអំពើលួចសន្លឹកឆ្នោត និងការជាការប្រមាថឆន្ទៈរបស់អ្នកបោះឆ្នោត។
លោកថ្លែងថា៖ «យើងកំពុងតែតាមដានមើល តើលិខិតនោះវាពិតប្រាកដឬយ៉ាងម៉េច? បើសិនជាពិតប្រាកដមែន នេះជា[ការ]រំលោភទៅ[លើ]ឯករាជ្យភាពនៃគ.ជ.ប.ហើយ ជាគណៈកម្មាធិការរៀបចំការបោះឆ្នោតហើយ ព្រោះយើងមិនអាចយកអំណាចគណបក្សទៅហៅមន្ត្រីការិយាល័យបោះឆ្នោតឱ្យមកខាងគណបក្សណែនាំធ្វើយ៉ាងនេះយ៉ាងនោះទេ។ អានេះជាវិធីនៃការលួចសន្លឹកឆ្នោត»។
អ្នកនយោបាយជំទាស់ជើងចាស់រូបនេះបន្ថែមថា៖ «អានេះបើក្នុងលក្ខខណ្ឌថា បើលិខិតនេះជាលិខិតពិតប្រាកដមែន ជាការមួយដែលជាការប្រមាថទៅលើប្រជាពលរដ្ឋខ្មែរធ្ងន់ធ្ងរណាស់។ពីព្រោះពលរដ្ឋទៅបោះឆ្នោតសង្ឃឹមថាការបោះឆ្នោតនេះរៀបចំដោយអង្គការមួយដែលឯករាជ្យ មិននៅក្រោមចំណុះរបស់គណបក្សនយោបាយណាទេ»។
អ្នកនាំពាក្យគណបក្សប្រជាជនកម្ពុជាលោក សុខ ឥសាន ប្រតិកម្មភា្លមៗថា ករណីបែបនេះគឺមិនអាចកើតឡើងនៅក្នុងជួរគណបក្សប្រជាជនកម្ពុជាជាដាច់ខាត។ លោកចាត់ទុកថា លិខិតអញ្ជើញបុគ្គលត្រៀមបំពេញការងារ នៅការិយាល័យបោះឆ្នោតនោះ គឺគ្រាន់តែជាយុទ្ធសាស្ត្ររបស់ជនខិលខូចដើម្បីបង្ខូចកេរ្តិ៍ឈ្មោះគណបក្សកាន់អំណាចប៉ុណ្ណោះ។
លោកមានប្រសាសន៍ថា៖ «ខ្ញុំជឿជាក់ថា គណបក្សប្រជាជនគ្រប់ជាន់ថ្នាក់មិនធ្វើអ្វីផ្តេសផ្តាសដែលផ្ទុយពីគោលការណ៍ច្បាប់ទេ។ អ៊ីចឹងគ្មានករណីហ្នឹងកើតឡើងទេ វាអាចមានជនណាមួយបំផ្លើសការពិតហ្នឹងហើយ»។
វីអូអេមិនអាចសុំការអត្ថាធិប្បាយពីលោក ង៉ែត ចដ្តាវី ប្រធានមន្ទីរគណបក្សប្រជាជនរាជធានីភ្នំពេញ និងមន្ត្រីបក្សដដែលនេះ គឺ ឃុត សុខខា ដែលមានឈ្មោះនិងដាក់លេខទំនាក់ទំនងនៅក្នុងលិខិតមួយចុះថ្ងៃទី១៩ ខែឧសភា ផ្ញើទៅជូនប្រធានគណៈកម្មាធិការគណបក្សខណ្ឌ៧មករា និងខណ្ឌសែនសុខ ដើម្បីស្នើចាត់អញ្ជើញប្រធាន អនុប្រធាន និងលេខាការិយាល័យបោះឆ្នោត។
ដោយឡែកមន្រ្តីសម្របសម្រួលជាន់ខ្ពស់នៃអង្គការខុមហ្វ្រែល លោក កន សាវាង្ស បានប្រាប់វីអូអេនៅថ្ងៃចន្ទនេះថា គណបក្សនយោបាយគ្មានសិទ្ធិហៅមន្ត្រីរៀបចំការបោះឆ្នោតទៅចូលរួមវគ្គបំប៉នណាមួយនោះទេ ព្រោះច្បាប់មិនអនុញ្ញាត។
លោកថ្លែងថា៖ «វាជារឿងមួយដែលខុសឆ្គងណាស់...ករណីគឺថា គណបក្សនយោបាយគ្មានសិទ្ធិអំណាចក្នុងការហៅមន្ត្រីការិយាល័យរៀបចំការបោះឆ្នោតហ្នឹង ទៅជួប ណែនាំ ឬក៏បំពាក់បំប៉ន សូម្បីតែហៅជួបក៏គ្មានសិទ្ធិអំណាចក្នុងការហៅដែរ»។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា ថ្លែងថា លោកមិនដឹងថាតើលិខិតនោះពិតឬអត់នោះទេ ហើយគ.ជ.ប.ក៏មិនមានសមត្ថកិច្ចលូកដៃចូលផ្ទៃក្នុងរបស់គណបក្សនយោបាយនោះដែរ។
លោកបញ្ជាក់ថា៖ «ទី១ ខ្ញុំមិនដឹងថា លិខិតហ្នឹងជាលិខិតពិតឬអត់? ទី២ កិច្ចការរបស់គណបក្សគ.ជ.ប.មិនលូកដៃចូលទៅក្នុងហ្នឹងទេ។ អ៊ីចឹងគ.ជ.ប គ្រប់គ្រងដែនសមត្ថកិច្ចរបស់ខ្លួនគឺគ្រប់គ្រងលើមន្ត្រីរៀបចំការបោះឆ្នោត គ្រាន់តែថា មន្ត្រីហ្នឹងមកពីខាងណាខាងណីក៏ដោយ ក៏អ្នកទាំងនោះត្រូវអនុវត្តអព្យាក្រឹតភាពរបស់ខ្លួននៅក្នុងតំណែងជាការិយាល័យបោះឆ្នោត»។
ការបោះឆ្នោតជ្រើសរើសក្រុមប្រឹក្សា ឃុំសង្កាត់ អាណត្តិទិ៥នេះ មានគណបក្សនយោបាយចំនួន១៧ចូលរួម ក្នុងនោះគឺគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន គណបក្សភ្លើងទៀន និងគណបក្សប្រជាធិបតេយ្យមូលដ្ឋានជាដើម។
ទោះជាយ៉ាងណា នៅក្នុងរយៈពេលពីរថ្ងៃជាប់ៗគ្នានៃការចាប់ផ្តើមសកម្មភាពឃោសនារកការគាំទ្រពីពលរដ្ឋនោះ គណបក្សនយោបាយយ៉ាងហោចណាស់ចំនួនបីត្រូវគេឃើញមានការផុសផុលនៅក្នុងការធ្វើយុទ្ធនាការឃោសនាបោះឆ្នោតក្នុងទ្រង់ទ្រាយធំ គឺគណបក្សប្រជាជនកម្ពុជា គណបក្សភ្លើងទៀន និងគណបក្សរាជានិយមហ៊្វុនស៊ីនប៉ិច។
ការបោះឆ្នោតក្រុមប្រឹក្សាឃុំសង្កាត់នឹងប្រព្រឹត្តទៅនៅថ្ងៃទី៥ ខែមិថុនា ខាងមុខ។ នៅក្នុងការបោះឆ្នោតជ្រើសរើសមេដឹកនាំមូលដ្ឋាន សម្រាប់អាណត្តិទី៥នេះទៀតសោត គណបក្សនយោបាយបានដាក់បេក្ខជនឈរឈ្មោះចំនួនជាង ៨២.៧០០ នាក់ សម្រាប់ឃុំសង្កាត់ចំនួន ១.៦៥២នៅទូទាំងប្រទេស។ ការឃោសនារបស់គណបក្សនីមួយៗនឹងមានរយៈពេល១៤ថ្ងៃ។ នេះបើតាមស្ថាប័នរៀបចំបោះឆ្នោតជាតិគ.ជ.ប៕
គណបក្សកាន់អំណាចស្នើសុំមន្ត្រីត្រៀមរៀបចំការបោះឆ្នោតឃុំសង្កាត់ ចូលរួមវគ្គបណ្តុះបណ្តាលកិច្ចការបោះឆ្នោត
ភ្នំពេញ —
