កាលពីថ្ងៃអង្គារ ទាហានបារាំងបីនាក់ត្រូវបានវាយប្រហារដោយជនវាយប្រហារម្នាក់ដែលមានកាំបិតមួយនៅខាងក្រៅមជ្ឈមណ្ឌលសហគមន៍ជ្វីហ្វមួយនៅក្នុងក្រុង Nice ប៉ែកខាងត្បូងនៃប្រទេសបារាំង។
ទាហានពីរនាក់ក្នុងបណ្តាពួកទាហានទាំងនេះបានត្រូវរបួស ហើយត្រូវទទួលការព្យាបាលនៅនឹងកន្លែង។
ប្រភពពីប៉ូលីសបាននិយាយថា ជីវិតទាហានទាំងនេះមិនឋិតក្នុងគ្រោះថ្នាក់ទេហើយថា អ្នកធ្វើការវាយប្រហារនោះបានត្រូវចាប់ខ្លួនហើយ។ ពួកគេមិនបានផ្តល់សេចក្តីលម្អិតបន្ថែមទៀតទេដោយគ្រាន់តែបញ្ជាក់ថា ការស៊ើបអង្កេតកំពុងមានតែមានដំណើរការ។
ទាហានទាំងនេះបានយាមល្បាតនៅខាងក្រៅមជ្ឈមណ្ឌលជ្វីហ្វនេះ ជាផ្នែកមួយនៃវិធានការបង្កើនកិច្ចការពារសន្តិសុខនៅក្នុងប្រទេសបារាំង នៅក្រោយការវាយប្រហារកាលពីខែមុននៅក្នុងក្រុងប៉ារីស (Paris) លើការិយាល័យនៃទស្សនាវដ្តីបែបចំអកទ្បកទ្បឺយ Charlie Hebdo និងហាងលក់គ្រឿងទេស Kosher មួយ។
ការវាយប្រហារកាលពីថ្ងៃទី៧ដល់ថ្ងៃទី៩ខែមករាបានបណ្តាលឲ្យមនុស្ស២០នាក់ស្លាប់ដោយមានរួមបញ្ចូលទាំងពួកអ្នកវាយប្រហារផងដែរ៕
