វិទ្យាស្ថានស្លឹករឹតគ្រោងកសាងបដិមាមួយដើម្បីឧទ្ទិសដល់វីរភាព និងការតស៊ូរបស់ស្រ្តីដែលបានរស់រានមានជីវិតពីរបបខ្មែរក្រហម។ បដិមានេះគឺជាអំណោយពីសិល្បករឥណ្ឌូនេស៊ីម្នាក់ ដែលធ្លាប់បានជួបស្រ្តីកម្ពុជាដែលរងគ្រោះក្នុងសម័យខ្មែរក្រហម។
វិទ្យាស្ថានស្លឹករឹតបានបញ្ចេញរូបថតនៃបដិមាគម្រូ ដែលមានចំណងជើងថា«វីរស្រ្តីកម្ពុជា៖ មានក្តីសង្ឃឹម»។ បដិមាគម្រូនេះត្រូវបានជ្រើសរើសឡើងក្នុងចំណោមបដិមាគម្រូមួយចំនួនដែលឆ្លាក់ដោយសិល្បករឥណ្ឌូនេស៊ី។ បដិមានេះគឺជារូបម្តាយប្រឹងទាញដៃកូនឡើង ដែលអ្នកជំនាញនៃវិទ្យាស្ថាននេះពន្យល់ថា វាបង្ហាញពីសេចក្តីសង្ឃឹមរបស់ស្ត្រីជួយយឹតយោងក្មេង ដែលជាកូន ឲ្យឡើងរូចផុតពីក្តីលំបាក។
អ្នកនាងស៊ីរិក សាវីណា នាយិកានៃសារមន្ទីរនៃការចងចាំរបស់វិទ្យាស្ថានស្លឹករឹត បានឲ្យដឹងថា គម្រោងកសាងបដិមានេះផ្តួចផ្តើមឡើងដោយមជ្ឈមណ្ឌលឯកសារកម្ពុជាតាំងពីឆ្នាំ២០០៤មកម្ល៉េះ ហើយវាក៏ជាគម្រោងមួយក្នុងគម្រោងសាងសង់វិទ្យាស្ថានស្លឹករឹតផងដែរ។
«យើងចង់ធ្វើជារូបសំណាកមួយរំឭក ឬក៏ឧទ្ទិសទៅដល់វីរភាពនិងការតស៊ូរបស់ស្រ្តីដែលបានតស៊ូរួចរស់ជីវិតតាំងពីរបបខ្មែរក្រហមមក ហើយគាត់បានចូលរួមនៅក្នុងការកសាងប្រទេសកម្ពុជាយើងឡើងវិញ»។
ចេញពីរូបថតគម្រូនេះ សិល្បករឥណ្ឌូនេស៊ីគឺ លោក I Nyoman Nuarta នឹងកសាងឡើងជាបដិមាធំមួយសម្រាប់ជាអំណោយដល់វិទ្យាស្ថានស្លឹករឹតនៃមជ្ឈមណ្ឌលឯកសារកម្ពុជា។អ្នកនាងសាវីណាបានឲ្យដឹងទៀតថា ក្នុងចំណោមអ្នករស់រានមានជីវិតក្រោយរបបខ្មែរក្រហមមានស្រ្តីចំនួន៧០%។ ដូចនេះការទទួលស្គាល់ការចូលរួមរបស់ពួកគាត់ក្នុងសង្គមពិតជាមានសារៈសំខាន់។
«ពួកគាត់ភាគច្រើនបាត់បង់ក្រុមគ្រួសារ និងសាច់ញាតិ តែពួកគាត់នៅតែមានការតស៊ូ ចូលរួមកសាងប្រទេសក្នុងវិស័យផ្សេងៗ ដូចជាវិស័យអប់រំ សេដ្ឋកិច្ច និងវប្បធម៌។ គាត់ជាកម្លាំងចលករមួយដែលសំខាន់ដែរ ហើយជំរុញឲ្យមានការអភិវឌ្ឍរហូតមកដល់សព្វថ្ងៃ។ អញ្ចឹងហើយការតស៊ូរបស់ពួកគាត់ធំធេង ហើយដែលត្រូវមានការទទួលស្គាល់»។
អ្នកនាងបានរំឭកដែរថា វិទ្យាស្ថានស្លឹករឹតចង់ឲ្យរូបភាពនេះមានលក្ខណៈជាសាកល ហើយវាអាចតំណាងឲ្យស្រ្តីនៅក្នុងតំបន់ និងប្រទេសលើសាកលលោកទាំងឡាយដែលឆ្លងកាត់សម័យកាលប្រវត្តិសាស្រ្តដ៏ជូរចត់ ហេតុដូចនេះ វិទ្យាស្ថានស្លឹករឹតជ្រើសរើសសិល្បករណាដែលអាចផ្សារភ្ជាប់កម្ពុជាទៅនឹងពិភពលោក។
ម្យ៉ាងទៀត លោក I Nyoman Nuarta គឺជាអ្នកជំនាញផ្នែកចម្លាក់រូបមនុស្សប្រមាណជាង៣០ឆ្នាំមកហើយ ហើយស្នាដៃរបស់លោកក៏ត្រូវបានមជ្ឈដ្ឋានអន្តរជាតិទទួលស្គាល់ផងដែរ។
ដោយមានការពេញចិត្តយ៉ាងខ្លាំងចំពោះគម្រោងសាងសង់បដិមាវីរស្រ្តីកម្ពុជានោះ សិល្បករឥណ្ឌូនេស៊ីរូបនេះបានមកទស្សនកិច្ចប្រទេសកម្ពុជាកាលពីខែកក្កដាកន្លងទៅ ដើម្បីស្វែងយល់អំពីប្រវត្តិសាស្រ្ត និងអំពីស្រ្តីកម្ពុជា។
លោកក៏បានសន្ទនាជាមួយស្រ្តីកម្ពុជាមួយចំនួន ដែលរងគ្រោះក្នុងសម័យខ្មែរក្រហមដើម្បីសិក្សាពីពួកគាត់។ ក្រោយមកលោកសម្រេចចិត្តសាងសង់បដិមានេះនៅឯវិចិត្រសាលរបស់លោកក្នុងប្រទេសឥណ្ឌូនេស៊ី។
ក្នុងបទសម្ភាសន៍ជាមួយ VOA លោកបានបង្ហាញទស្សនអំពីសិល្បៈនេះថា៖
«សិល្បៈតំណាងឲ្យអ្វីៗទាំងអស់ក្នុងនយោបាយ សង្គម វប្បធម៌ និងបរិស្ថាន។ ហើយវាអាចឲ្យខ្ញុំបង្ហាញចេញពីបេះដូងរបស់ខ្ញុំ ហើយរូបចម្លាក់មនុស្សអាចឲ្យខ្ញុំបញ្ចេញអំពីអ្វីដែលខ្ញុំយល់ឃើញ»។
ទោះជាយ៉ាងណាក៏ដោយ គេមិនទាន់កំណត់ពេលវេលាជាក់លាក់ថា តើរូបនេះនឹងសាងសង់រួចរាល់នៅពេលណាទេ ហើយទីតាំងសាធារណៈដែលនឹងត្រូវតម្កល់រូបនេះក៏មិនទាន់បានកំណត់នោះដែរ។
ក៏ប៉ុន្តែអ្នកនាងស៊ិរិក សាវីណាបានបញ្ជាក់ថា រាជរដ្ឋាភិបាលកម្ពុជាបានសម្រេចរួចហើយអនុញ្ញាត្តឲ្យដាក់តម្កល់បដិមានេះនៅទីសារធាណៈ៕
រាយការណ៍បន្ថែមដោយ ៖ ស៊ូ ពិសែន
