លោកប្រធានាធិបតីស.រ.អា. បារ៉ាក់ អូបាម៉ា បានសម្តែងទុក្ខព្រួយអំពីការវាយប្រហារនៅក្នុងក្រុងមុយនិច នៃប្រទេសអាល្លឺម៉ង់ កាលពីថ្ងៃសុក្រ ដែលគេមានជំនឿថាបានបណ្តាលឱ្យមនុស្ស៦នាក់ស្លាប់។
ថ្លែងទៅកាន់ការប្រជុំមួយនៃពួកមន្ត្រីខាងការពង្រឹងច្បាប់ លោក អូបាម៉ា បានមានប្រសាសន៍ថា នៅពេលដែលសេចក្តីលម្អិតអំពីស្ថានការណ៍នេះនៅតែកំពុងលេចឡើងក៏ដោយក៏ «សមានចិត្តរបស់យើងមានទៅកាន់ពួកជនដែលបានត្រូវរបួស»។ លោកប្រធានាធិបតីបានកត់សម្គាល់ថា ប្រទេសអាល្លឺម៉ង់ជាសម្ព័ន្ធមិត្តមួយក្នុងបណ្តាពួកសម្ព័ន្ធមិត្តជិតស្និទ្ធរបស់ ស.រ.អា. ហើយលោកបានសន្យាថានឹងផ្តល់ការគាំទ្រទាំងអស់ដែលប្រជារាស្ត្រអាល្លឺម៉ង់ត្រូវការក្នុងការដោះស្រាយបញ្ហាក្នុងកាលៈទេសៈនេះ។
មានសេចក្តិរាយការណ៍ថា មានមនុស្ស៦នាក់បានបាត់បង់ជីវិតក្នុងឧប្បត្តិហេតុនេះដែលបានចាប់ផ្តើមមានឡើងកាលពីល្ងាចថ្ងៃសុក្រ។ ពួកប៉ូលិសអាល្លឺម៉ង់បានបញ្ជាក់ថា មានការបាញ់កាំភ្លើងនៅឯមជ្ឈមណ្ឌលហាងលក់ទំនិញ Olympia ក្នុងក្រុងមុយនិច ហើយពួកប៉ូលិសច្រើននាក់បានបាញ់តបតទៅនឹងការវាយប្រហារនេះ។
ពួកមន្ត្រីបាននិយាយថា ពួកគេកំពុងមានការតាមរកចាប់មនុស្សនៅទូទាំងក្រុងនេះ។ ពួកប៉ូលិសនិយាយថា ពួកគេមានជំនឿថា ខ្មាន់កាំភ្លើងមានលើសពីម្នាក់ ក៏ប៉ុន្តែគ្មានសេចក្តីលម្អិតទេអំពីថាតើអ្នកបាញ់កាំភ្លើងនេះឬពួកអ្នកបាញ់កាំភ្លើងទាំងនេះជានរណា។
ប៉ូលិសបាននិយាយថា ពួកអ្នកឃើញហេតុការណ៍នេះបានរាយការណ៍ថា បានពួកគេបានឃើញមនុស្សបីនាក់ប្រដាប់ដោយកាំភ្លើង។ វីដេអូរបស់អ្នកឃើញហេតុការណ៍នេះបានបង្ហាញឱ្យឃើញបុរសម្នាក់កាន់កាំភ្លើងវែងមួយនៅខាងក្រៅហាងលក់អាហារ ឈ្មោះ McDonald។ នៅពេលជនប្រដាប់អាវុធនេះលើកកាំភ្លើងបាញ់ហ្វូងមនុស្សនៅជិតទីនោះ អ្នកថតវីដេអូនេះក៏ចាប់ផ្តើមរត់គេចខ្លួនដែរនៅពេលមានស្នូរការបាញ់កាំភ្លើងពាក់កណ្តាលស្វ័យប្រវត្តិ។
កិច្ចប្រតិបត្តិការធំមួយរបស់ប៉ូលិស កំពុងមានធ្វើនៅក្នុងក្រុងមុយនិច។ ពួកប៉ូលិសបានប្រើសេវាកម្មគ្រាមានអាសន្នទាំងអស់ ដោយមានការគាំទ្រពីកងកម្លាំងពិសេសដែលមានរួមបញ្ចូលពួកប៉ូលិសសហព័ន្ធផងដែរ។ ពួកប៉ូលិសបានសុំដល់សាធារណជនកុំឱ្យថតរូបថតឬវីដេអូសកម្មភាពពួកប៉ូលិសដើម្បីចៀសវៀងការផ្តល់ព័ត៌មានណាមួយដែលជួយដល់ពួកជនជាប់សង្ស័យ៕
