ការិយាល័យរដ្ឋអាជ្ញាបារាំងបានឲ្យដឹងថា ប៉ូលិសបានចាប់ខ្លួនមនុស្សយ៉ាងហោចណាស់៣នាក់នៅថ្ងៃសៅរ៍នេះ ដែលមានជាប់ពាក់ព័ន្ធនឹងការវាយប្រហារនៅក្នុងទីក្រុង នីស ក្នុងទិវាឯករាជ្យ Bastille Day ដែលបានសម្លាប់មនុស្សអស់ចំនួន៨៤នាក់ និងធ្វើឲ្យមនុស្សជាច្រើននាក់ទៀតរងរបួស។ រដ្ឋអាជ្ញាមិនបានបញ្ចេញព័ត៌មានអ្វីផ្សេងទៀតពាក់ព័ន្ធនឹងការចាប់ខ្លួននេះនោះទេ។
ក្រុមរដ្ឋឥស្លាមបានអះអាងទទួលខុសត្រូវថាការវាយប្រហារកាលពីថ្ងៃព្រហស្បតិ៍នៅរមណីយដ្ឋាន Riviera គឺជាស្នាដៃរបស់ខ្លួន។ ទីភ្នាក់ងារសារព័ត៌មាន Amaq ដែលជាបណ្តាញផ្សព្វផ្សាយព័ត៌មានរបស់ក្រុមរដ្ឋឥស្លាម បានផ្សាយថា អ្នកវាយប្រហាររូបនោះគឺជាទាហានរបស់ក្រុមរដ្ឋឥស្លាម។ ទីភ្នាក់ងារសារព័ត៌មាននេះបានដកស្រង់សម្តីរបស់ប្រភពកងកម្លាំងសន្តិសុខដែលមិនបញ្ចេញឈ្មោះដែលថា អ្នកវាយប្រហាររូបនោះបានបើកការវាយប្រហារ ដើម្បីឆ្លើយតបទៅនឹងការអំពាវនាវរបស់ក្រុមរដ្ឋឥស្លាមឲ្យធ្វើការវាយប្រហារទៅលើពលរដ្ឋនៃបណ្តាប្រទេសដែលជាសមាជិករបស់ក្រុមសម្ព័ន្ធមិត្តដែលវាយប្រយុទ្ធនឹងក្រុមរដ្ឋឥស្លាម។
គេនៅមិនទាន់ច្បាស់នៅឡើយទេ ថាតើអ្នកវាយប្រហាររូបនោះមានជាប់ពាក់ព័ន្ធដោយផ្ទាល់ជាមួយនឹងក្រុមសកម្មប្រយុទ្ធឬយ៉ាងណា ដោយសារតែក្រុមរដ្ឋឥស្លាមនេះ ពេលខ្លះអះអាងទទួលខុសត្រូវលើការវាយប្រហារមួយចំនួនដែលធ្វើឡើងដោយបុគ្គលផ្សេងៗ ដែលមិនជាប់ពាក់ព័ន្ធជាមួយនឹងក្រុមរបស់ខ្លួនឡើយ។
ប្រទេសបារាំងបានចាប់ផ្តើមកាន់ទុក្ខទូទាំងប្រទេសចំនួន៣ថ្ងៃនៅថ្ងៃសៅរ៍នេះ បន្ទាប់ពីការវាយប្រហារបានកើតឡើង ក្នុងអំឡុងពេលប្រារព្ធពិធីបុណ្យឯករាជ្យជាតិនៅក្នុងទីក្រុង នីស។ កុមារចំនួន១០នាក់គឺជាជនរងគ្រោះក្នុងចំណោមជនរងគ្រោះទាំង៨៤នាក់ដែលបានស្លាប់បាត់បង់ជីវិត។ អាជ្ញាធរនិយាយថា ជនរងគ្រោះ៥២នាក់ទៀតកំពុងស្ថិតក្នុងស្ថានភាពគ្រោះថ្នាក់ធ្ងន់ធ្ងរដល់ជីវិត ក្នុងចំណោមជនរងគ្រោះដែលរងរបួសជាង២០០នាក់ មុនពេលដែលជនដៃដល់រូបនោះត្រូវបានប៉ូលិសបាញ់សម្លាប់។ ពលរដ្ឋអាមេរិកាំង២នាក់ត្រូវបានបញ្ជាក់ថា បានស្លាប់នៅក្នុងការវាយប្រហារនោះ។
អ្នកវាយប្រហាររូបនោះត្រូវបានគេកំណត់អត្តសញ្ញាណថា ឈ្មោះ Mohamed Lahouaiej Bouhlel វ័យ៣១ឆ្នាំ ជាជនជាតិបារាំងដើមកំណើត ទុយនេស៊ី ដែលបានរស់នៅក្នុងទីក្រុង នីស៕
