ប្រធានាធិបតីស៊ែប៊ីនិងក្រុមមន្ត្រីកាលពីថ្ងៃពុធ បានផ្តល់សញ្ញាមិនជាក់លាក់ថាតើពួកគេនឹងធ្វើតាមគម្រោងដាក់វិធានការបិទរដ្ឋធានីប៊ែលក្រាដជាថ្មី ដើម្បីទប់ស្កាត់ការរាតត្បាតជំងឺកូវីដ១៩ឬយ៉ាងណា ក្រោយពីមានបាតុកររាប់ពាន់នាក់បានចេញមកតវ៉ាហិង្សាប្រឆាំងនឹងវិធានការនេះ។
បាតុករបានចេញមកតវ៉ាក្រោយប្រធានាធិបតីលោក Aleksandar Vucic បានប្រកាសកាលពីថ្ងៃអង្គារថា នឹងដាក់បម្រាមគោចរនៅចុងសប្តាហ៍ ក្រោយករណីស្លាប់ក្នុងមួយថ្ងៃបានកើនដល់ ១៣ នាក់ ហើយអ្នកឆ្លងកូវីដ១៩ថ្មីក្នុងមួយថ្ងៃកើនដល់ជិត ៣០០ នាក់។
ក្រុមប្រឆាំងបានចោទមេដឹកនាំស៊ែប៊ីដែលមាននិន្នាការផ្តាច់ការថា បានរួមចំណែកដល់ការរាតត្បាតកាន់តែខ្លាំងនៃកូវីដ១៩ ដោយលោកប្រញាល់ប្រញាល់ពេកក្នុងការដកវិធានការរឹតត្បិតសកម្មភាពសង្គមលើកទី១ ដើម្បីអនុញ្ញាតឲ្យមានការបោះឆ្នោតជាតិកាលពីថ្ងៃទី២១ ខែមិថុនា និងដើម្បីពង្រឹងអំណាចលោក៕
