រដ្ឋាភិបាលសហរដ្ឋអាមេរិកបានចុះកិច្ចសន្យាផ្ដល់ប្រាក់ចំនួន ១.៦០០ លានដុល្លារដល់ក្រុមហ៊ុន Novavax, Inc. ឲ្យផលិតវ៉ាក់សាំងបង្ការជំងឺកូវីដ១៩។
ការចុះកិច្ចសន្យាផ្ដល់ប្រាក់ផលិតវ៉ាក់សាំងបង្ការជំងឺកូវីដ១៩ ដល់ក្រុមហ៊ុនដែលមានទីស្នាក់ការនៅរដ្ឋ Maryland នេះគឺជាគំនិតផ្ដួចផ្ដើមធំបំផុតរបស់រដ្ឋាភិបាលសហរដ្ឋអាមេរិកក្នុងការបង្កើនល្បឿនការផលិតវ៉ាក់សាំងនិងវិធីព្យាបាលជំងឺកូវីដ១៩។
លោក Stanley Erck នាយកប្រតិបត្តិក្រុមហ៊ុន Novavax នេះ គ្រោងនឹងចាប់ផ្ដើមចែកចាយវ៉ាក់សាំងចំនួន ១០០ លានដូសនៅក្នុងត្រីមាសទីបួនឆ្នាំនេះ។ លោកថ្លែងថា គម្រោងនេះប្រហែលជានឹងបញ្ចប់នៅខែមករា ឬខែកុម្ភៈឆ្នាំក្រោយនេះ។
ក្រសួងសុខាភិបាលនិងសេវាពលរដ្ឋ និងក្រសួងការពារប្រទេសរបស់សហរដ្ឋអាមេរិក បានថ្លែងនៅក្នុងសេចក្ដីថ្លែងការណ៍រួមគ្នាមួយថា ដោយសារតែរដ្ឋាភិបាលសហព័ន្ធជាអ្នកផ្ដល់ថវិកាសម្រាប់គំនិតផ្ដួចផ្ដើមនេះ ពួកគេនឹងទទួលបានវ៉ាក់សាំងចំនួន ១០០ លានដូសពីគម្រោងស្រាវជ្រាវនេះ។
កិច្ចសន្យានេះត្រូវធ្វើឡើង ខណៈដែលករណីឆ្លងជំងឺកូវីដ១៩ កំពុងតែកើនឡើងនៅក្នុងសហរដ្ឋអាមេរិក ហើយសហរដ្ឋអាមេរិកក៏ជាប្រទេសដែលមានករណីឆ្លងនិងករណីស្លាប់ដោយសារជំងឺកូវីដ១៩ ច្រើនជាងគេបំផុតនៅក្នុងពិភពលោកផងដែរ។ កំណើនករណីឆ្លងនេះបានធ្វើឲ្យបណ្ដារដ្ឋនិងទីក្រុងមួយចំនួនដាក់វិធានបិទសកម្មភាពសង្គមជាថ្មីទៀត៕
