រដ្ឋមន្រ្តីការបទេសសហរដ្ឋអាមេរិក Rex Tillerson កាលពីថ្ងៃសុក្របានជួបជាមួយប្រធានាធិបតីម៉ិកស៊ិក លោក Enrique Pena-Nieto នៅស្របពេលដែលគោលនយោបាយអន្តោប្រវេសន៍ និងពាណិជ្ជកម្មរបស់អាមេរិកបង្កឲ្យមានភាពតានតឹងដល់ទំនាក់ទំនងរវាងប្រទេសជិតខាងទាំងពីរ។
រដ្ឋាភិបាលម៉ិកស៊ិកមានការអាក់អន់ចិត្តចំពោះ វិធានការរបស់លោកប្រធានាធិបតី ដូណាល់ ត្រាំ ក្នុងការទប់ស្កាត់អន្តោប្រវេសន៍ខុសច្បាប់ និងឲ្យប្រទេសម៉ិកស៊ិកជួយចេញថ្លៃសង់ជញ្ជាំងនៅតាមព្រំដែន និងការបារម្ភពីការគំរាមកំហែងរបស់អាមេរិក ក្នុងការដកខ្លួនចេញពីកិច្ចព្រមព្រៀងពាណិជ្ជកម្មសេរី ហៅកាត់ថា NAFTA។
កិច្ចព្រមព្រៀង NAFTA ដែលលោក ត្រាំ បានរិះគន់ថាបានធ្វើឲ្យអាមេរិកបាត់បង់ការងារយ៉ាងច្រើននោះ អាចនឹងធ្វើឲ្យអាប់អួរដល់ជំនួបរវាងរដ្ឋមន្ត្រីការបរទេសម៉ិកស៊ិក លោក Luis Videgaray និងរដ្ឋមន្រ្តីការបរទេសកាណាដា លោក Chrystia Freelandផងដែរ។
ទស្សនកិច្ចរបស់លោក Tillerson ក្នុងប្រទេសម៉ិកស៊ិក គឺជាការឈប់សំចតទី១ នៅក្នុងដំណើរទស្សនកិច្ចចំនួន៦ថ្ងៃនៅក្នុងតំបន់អាមេរិកឡាទីននេះ ដែលលោកនឹងធ្វើទស្សនកិច្ចនៅក្នុងប្រទេសអាហ្សង់ទីន ប៉េរូ និងកូឡុំប៊ី និងចុងក្រោយគឺប្រទេសហ្សាម៉ាអ៊ីកនៅថ្ងៃទី៧ ខែកុម្ភៈខាងមុខនេះ។
នៅមុនចាប់ផ្តើមដំណើរទស្សនកិច្ចនេះ លោក Tillerson បានថ្លែងសុន្ទរកថាកាលពីថ្ងៃព្រហស្បតិ៍នៅឯសកលវិទ្យាល័យ Texas ដែលលោកធ្លាប់បានសិក្សានៅទីនោះ ដោយលោកបានព្រមានថា តួនាទីរបស់ប្រទេសចិន និងរុស្ស៊ីមានការកើនឡើងគួរឲ្យបារម្ភនៅក្នុងតំបន់អាមេរិកឡាទីន និងបានស្នើឲ្យប្រទេសក្នុងតំបន់ធ្វើការជាមួយសហរដ្ឋអាមេរិកជំនួសវិញ៕
