អ្នកការទូតជាន់ខ្ពស់លំដាប់ទីបីនៅក្នុងរដ្ឋាភិបាលសហរដ្ឋអាមេរិកបានប្រកាសលាលែងចេញពីតំណែង កាលពីថ្ងៃព្រហស្បតិ៍បន្ទាប់ពីបម្រើការងារអស់រយៈពេល៣៥ឆ្នាំ។ នេះគឺជាការប្រកាសលាលែងពីតំណែងមន្ត្រីជាន់ខ្ពស់ក្នុងក្រសួងការបរទេសសហរដ្ឋអាមេរិកនៅពេលថ្មីៗបំផុត ចាប់តាំងពីលោកប្រធានាធិបតី Donald Trump ចូលកាន់តំណែងជាងមួយឆ្នាំកន្លងមកនេះ។
លោក Thomas Shannon បានថ្លែងនៅក្នុងសេចក្តីថ្លែងការណ៍របស់លោកថា«ការសម្រេចចិត្តរបស់ខ្ញុំ គឺជាការសម្រេចចិត្តផ្ទាល់ខ្លួន និងដើម្បីចំណាយពេលឲ្យច្រើននៅជាមួយគ្រួសាររបស់ខ្ញុំ និងរៀបចំផែនការថ្មីសម្រាប់ជីវិតរបស់ខ្ញុំ»។
លោករដ្ឋមន្តី្រការបទេសសហរដ្ឋអាមេរិក Rex Tillerson បានប្រាប់សារពត៌មាន AP ថាលោកបានស្នើទៅលោក Shannon កុំឲ្យលោកលាលែងចេញពីតំណែង និងបានទទួលស្គាល់ថា ការចាកចេញរបស់លោក Shannon គឺជាការខាតបង់មួយ។
លោក Tillerson បានថ្លែងយ៉ាងដូច្នេះថា«លោកTom បានផ្តល់ការប្រឹក្សាល្អៗដល់រដ្ឋបាលជាច្រើនជំនាន់។ ខ្ញុំពិតជាមានការស្ងើចសសើរនូវចំណេះដឹង និងតួនាទីបំពេញការងាររបស់លោក ក្នុងអំឡុងពេលអន្តរកាល ដោយលោកបានធ្វើជារដ្ឋមន្រ្តីការបរទេសស្តីទីមុននឹងខ្ញុំចូលកាន់តំណែង និងបន្ទាប់មកបានធ្វើជាអនុរដ្ឋមន្រ្តីការបរទេសស្តីទីរបស់ខ្ញុំ និងការចូលរួមរបស់លោកនៅក្នុងដំណើរការយុទ្ធសាស្រ្តរបស់យើងកន្លងមកនេះ។ ការលះបង់របស់លោក Tom នឹងបន្តលើកទឹកចិត្តដល់សហការីនៅក្នុងក្រសួងការបរទេសជារៀងរហូត។
ក្រៅពីពាក្យសរសើររបស់លោក Tillerson ការចាកចេញរបស់លោក Shannonទំនង
ជានឹងបង្កឲ្យមានការរិះគន់ពីពួកអ្នករិះគន់រដ្ឋបាលលោកTrump ថាលោក Trump និងលោក Tillerson កំពុងជាន់ពន្លិចមុខមាត់ក្រសួងការបរទេស ដែលបានបង្កឲ្យមានបញ្ហាសីលធម៌ក្នុងចំណោមបុគ្គលិកជាន់ខ្ពស់នៅក្នុងក្រសួងនេះ៕
