ប្រទេសស៊ីរី និងរុស្ស៊ីនៅថ្ងៃពុធនេះបានចោទប្រកាន់សហរដ្ឋអាមេរិកពីការភូតកុហកអំពីការវាយប្រហារដោយប្រើអាវុធគីមីនៅក្នុងសង្គ្រាមប្រទេសស៊ីរីថា ជាវិធីធ្វើឲ្យបរាជ័យនូវការខំប្រឹងប្រែងដើម្បីបញ្ចប់ការប្រយុទ្ធគ្នា។
ទីភ្នាក់ងារព័ត៌មាន SANA របស់រដ្ឋស៊ីរីបានធ្វើអត្ថាធិប្បាយដោយដកស្រង់ប្រភពពីក្រសួងការបរទេសដែលបានថ្កោលទោសអ្វីដែលខ្លួនបានហៅថា «ការចោទប្រកាន់ភូតកុហក»ដោយលោករដ្ឋមន្រ្តីការបរទេសអាមេរិក Rex Tillerson និងលោករដ្ឋមន្រ្តីការបរទេសបារាំង Jean-Yves Le Drian។
លោក Sergei Ryabkov អនុរដ្ឋមន្រ្តីការបរទេសរុស្ស៊ី បានប្រាប់ទីភ្នាក់ងារព័ត៌មានរុស្ស៊ី Interfax ថា នៅពេលដែលការខំប្រឹងប្រែងសន្តិភាពជឿនលឿនទៅមុខ សហរដ្ឋអាមេរិកបានផ្សព្វផ្សាយព័ត៌មានដែលមិនមានការផ្ទៀងផ្ទាត់អំពីការវាយប្រហារដោយប្រើអាវុធគីមីនៅក្នុងប្រទេសស៊ីរី។
អត្ថាធិប្បាយទាំងនេះបានកើតមានឡើងមួយថ្ងៃបន្ទាប់ពីសហរដ្ឋអាមេរិកបានចូលរួមជាមួយសម្ព័ន្ធមិត្តអង្គការអូតង់របស់ខ្លួននៅក្នុងការចាប់ផ្តើមធ្វើយុទ្ធនាការដាក់ការគៀបសង្កត់ប្រឆាំងនឹងការប្រើអាវុធគីមីនៅក្នុងប្រទេសស៊ីរី ខណៈដែល លើកឡើងចំៗថាប្រទេសរុស្ស៊ីការពាររដ្ឋាភិបាលរបស់ប្រធានាធិបតី Bashar al-Assad នៃប្រទេសស៊ីរី។
លោករដ្ឋមន្រ្តីការបរទេសអាមេរិក Tillerson បាននិយាយនៅឯសន្និសីទក្រុងប៉ារីសដែលរៀបចំឡើងដោយលោករដ្ឋមន្រ្តីការបរទេសបារាំង Le Drian ថា «ការ វាយប្រហារកាលពីពេលថ្មីៗនេះនៅក្នុងតំបន់ East Ghouta បានបង្កើននូវការព្រួយកង្វល់យ៉ាងខ្លាំងថា របបរបស់ Bashar al-Assad នៃប្រទេសស៊ីរីប្រហែលបន្តប្រើអាវុធគីមីប្រឆាំងប្រជាពលរដ្ឋខ្លួនឯង»។
លោករដ្ឋមន្រ្តីការបរទេសអាមេរិក Tillerson បានមានប្រសាសន៍ទៀតថា មនុស្សយ៉ាងហោចណាស់ក៏២០នាក់ដែរបានស្លាប់កាលពីថ្ងៃចន្ទដែលទំនងមកពីការវាយប្រហារដោយប្រើឧស្ម័នក្លរីននៅក្នុងតំបន់ East Ghouta ដែលពួកឧទ្ទាមកាន់កាប់ នៅជិតរដ្ឋធានីដាម៉ាស៕
