សមាជិកព្រឹទ្ធសភាសហរដ្ឋអាមេរិកលោក Tim Scott មានប្រសាសន៍ថា លោកប្រធានាធិបតី Joe Biden បានបរាជ័យក្នុងការបង្រួបបង្រួមជាតិ ហើយថាសំណើរបស់លោកសម្រាប់ការចំណាយលើហេដ្ឋារចនាសម្ព័ន្ធនិងកញ្ចប់ថវិកាដែលបានប្រកាសថ្មីសម្រាប់វិស័យអប់រំនិងគ្រួសារនានាកំពុងធ្វើឱ្យប្រទេសជាតិបែកបាក់។
ការផ្តល់ការឆ្លើយតបរបស់គណបក្សសាធារណរដ្ឋចំពោះសុន្ទរកថារួមលើកទីមួយរបស់លោកប្រធានាធិបតីខាងគណបក្សប្រជាធិបតេយ្យទៅកាន់សភានៅយប់ថ្ងៃពុធ លោក Scott មានប្រសាសន៍ថា «ប្រជាជាតិរបស់យើងកំពុងខ្វះខាតខ្លាំងជាងគំនិតអត់បានការនេះ»។
សុន្ទរកថារបស់លោកBidenមួយផ្នែកអបអរការជឿនលឿនក្នុងការប្រយុទ្ធប្រឆាំងនឹងជំងឺរាត ត្បាតដែលសម្រេចគោលដៅលើផែនការរបស់រដ្ឋបាលលោកក្នុងការចាក់វ៉ាក់សាំងនៅពេលនេះក្នុងតំណែងប្រធានាធិបតីរបស់លោក។ លោក Scott បាននិយាយថាលោក Biden បានទទួលកេរ្តិ៍ឈ្មោះដែលជារបស់កម្មវិធីរបស់រដ្ឋបាលលោក Trump ដើម្បីពន្លឿនការផលិតវ៉ាក់ សាំងនិងកញ្ចប់ថវិកាជាច្រើនដែលសភាបានអនុម័តកាលពីឆ្នាំមុនដើម្បីផ្តល់ប្រាក់រាប់ពាន់លានដុល្លារជាជំនួយដល់ក្រុមហ៊ុន រដ្ឋាភិបាលថ្នាក់រដ្ឋនិងការផ្តល់ថវិកាដោយផ្ទាល់ដល់ពលរដ្ឋ។
លោក Scott បាននិយាយថា គណបក្សប្រជាធិបតេយ្យមិនមានឆន្ទៈធ្វើការជាមួយគណបក្សសាធារណរដ្ឋដើម្បីផ្តល់ជំនួយបន្ថែមទៀតនោះទេ ខណៈក្រុមគណបក្សប្រជាធិបតេយ្យបានអនុម័តជំនួយថ្មីសម្រាប់ទប់ទល់ការឆ្លងវីរុសបន្ទាប់ពីលោក Biden បានចូលកាន់តំណែង។
គណបក្សទាំងពីរខ្វែងគំនិតគ្នាអំពីទំហំនៃវិធានការនេះដោយគណបក្សប្រជាធិបតេយ្យបានលើកឡើងថា រដ្ឋាភិបាលចាំបាច់ត្រូវចាត់វិធានការបន្ថែមទៀត រីឯគណបក្សសាធារណរដ្ឋបានទាមទារឲ្យការចំណាយមានគោលដៅជាក់លាក់។
លោក Scott ក៏បានសម្តែងការជំទាស់នឹងល្បឿននៃការបើកសាលារៀនឡើងវិញចំពេលមានការរាលដាលនៃជំងឺរាតត្បាតនេះដោយសំអាងថា ប្រទេសផ្សេងទៀតបានអនុញ្ញាតឱ្យកូនសិស្សរបស់ពួកគេត្រឡប់ទៅសាលារៀនវិញហើយ។ លោកបានមានប្រសាសន៍ថា« វិទ្យាសាស្ត្របានបង្ហាញជាច្រើនខែមកហើយថាសាលារៀនមានសុវត្ថិភាព» ។
ឆ្លើយតបទៅនឹងសំណើថ្មីរបស់លោកBiden ដំឡើងពន្ធលើសាជីវកម្មនិងអ្នកមានដើម្បីចំណាយសម្រាប់សាលាមត្តេយ្យ មហាវិទ្យាល័យសហគមន៍ ការមើលថែកុមារ និងចំណាយសម្រាប់ការឈប់សម្រាកដើម្បីគ្រួសារដោយមានប្រាក់ខែ លោក Scottបានហៅផែនការនេះថាវាធ្វើឲ្យរដ្ឋាភិបាលសហព័ន្ធ «ទទួលខុសត្រូវតាំងពីទារកនៅក្នុងអង្រឹងដល់ចូលរៀននៅមហាវិទ្យាល័យ»៕
