ប្រជាជនរុស្ស៊ីបានប្រារព្ធពិធីរំឭកវិញ្ញាណក្ខន្ធជនរងគ្រោះនៃហេតុការណ៍ដ៏រន្ធត់ក្នុងសម័យសូវៀតកាលពីថ្ងៃទី ២៩ ខែតុលាកន្លងទៅនេះ ស្របពេលដែលរដ្ឋាភិបាលរុស្ស៊ីបន្តការបង្រ្កាបលើក្រុមប្រឆាំងនៅក្នុងប្រទេស។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
ព្រឹត្តិការណ៍ «Returning of the Names» ត្រូវបានរៀបចំឡើងដោយអង្គការសិទ្ធិមនុស្ស Memorial ដែលជាអង្គការឈ្នះពានរង្វាន់ណូបែលសន្តិភាព។
ពិធីរំឭកវិញ្ញាណក្ខន្ធនេះត្រូវបានប្រារព្ធឡើងជាប្រពៃណីនៅក្នុងទីក្រុងមូស្គូនៅរៀងរាល់ថ្ងៃទី ២៩ ខែតុលានៅបូជនីយដ្ឋាន Solovetsky Stone។ ពិធីនេះធ្វើឡើងមួយថ្ងៃមុនទិវាចងចាំជនរងគ្រោះនៃការគាបសង្កត់ផ្នែកនយោបាយក្នុងសម័យសូវៀតចូលមកដល់ និងផ្តោតលើការអានឈ្មោះបុគ្គលដែលត្រូវបានសម្លាប់ក្នុងហេតុការណ៍ដ៏រន្ធត់ដែលបង្កឡើងដោយលោក Joseph Stalin នៅចុងទសវត្សរ៍ ១៩៣០។
ចាប់តាំងពីឆ្នាំ ២០២០ មក អាជ្ញាធរក្រុងមូស្គូបានបដិសេធមិនផ្តល់ការអនុញ្ញាតឱ្យធ្វើបាតុកម្មនេះ។ ករណីនេះគឺអាចបណ្ដាលមកពី «ស្ថានភាពជំងឺរាតត្បាត [កូវីដ១៩]» កាលពីមុននិងការហាមឃាត់លើការប្រារព្ធពិធីសាធារណៈ បើទោះបីជាអ្នកគាំទ្រអង្គការ Memorial ជឿថា ការបដិសេធនេះមានហេតុផលនយោបាយក៏ដោយ។
អង្គការ Memorial ត្រូវបានអាជ្ញាធរក្រុងមូស្គូបញ្ជាឱ្យបិទក្នុងខែវិច្ឆិកា ឆ្នាំ ២០២១។ ទោះបីជាអង្គការនេះត្រូវបានបិទជានីតិបុគ្គលនៅក្នុងប្រទេសរុស្ស៊ីក៏ដោយ ក៏អង្គការនេះនៅតែធ្វើប្រតិបត្តិការនៅក្នុងប្រទេសផ្សេងទៀតនិងបានបន្តសកម្មភាពសិទ្ធិមនុស្សមួយចំនួននៅក្នុងប្រទេសរុស្ស៊ីផងដែរ។
ជំនួសឱ្យការធ្វើបាតុកម្ម កាលពីថ្ងៃអាទិត្យកន្លងទៅនេះ ពលរដ្ឋក្រុងមូស្គូនិងឯកអគ្គរដ្ឋទូតបស្ចិមប្រទេសមួយចំនួនបានដាក់ផ្កានៅបូជនីយដ្ឋាន Solovetsky Stone។ ព្រឹត្តិការណ៍ដ៏ស្រងេះស្រងោចនេះបានធ្វើឡើងក្រោមការឃ្លាំមើលរបស់ប៉ូលិស។
អង្គការ Memorial ក៏បានរៀបចំការផ្សាយបន្តផ្ទាល់នៃការអានឈ្មោះជនរងគ្រោះពីទីក្រុងមូស្គូនិងទីក្រុងផ្សេងទៀតរបស់រុស្ស៊ី ក៏ដូចជាពីបរទេសផងដែរ។
ព្រឹត្តិការណ៍ «Returning of the Names» នេះធ្វើឡើងនៅពេលដែលរដ្ឋអាជ្ញារុស្ស៊ីមានបំណងកាត់ទោសអ្នកធ្វើយុទ្ធនាការសិទ្ធិមនុស្សនិងសហប្រធានអង្គការ Memorial លោក Oleg Orlov ឱ្យជាប់ពន្ធនាគាររយៈពេល ៣ ឆ្នាំ។
លោក Orlov ត្រូវបានពិន័យជាប្រាក់ប្រហែល ១.៥០០ ដុល្លារអាមេរិកកាលពីដើមខែតុលា ហើយត្រូវបានកាត់ទោសពីបទ «បង្ខូចកិត្តិយស» យោធារុស្ស៊ីជាសាធារណៈ បន្ទាប់ពីលោកបានបង្ហោះសារតាមហ្វេសប៊ុក (Facebook) ថ្កោលទោសការឈ្លានពានរបស់រុស្ស៊ីលើអ៊ុយក្រែន។ នេះគឺជាចំណាត់ការថ្មីចុងក្រោយបង្អស់នៃការបង្រ្កាបឥតឈប់ឈររបស់រដ្ឋាភិបាលរុស្ស៊ីលើសកម្មជន អ្នកកាសែតឯករាជ្យ និងបុគ្គលប្រឆាំង។
អង្គការ Memorial ដែលជាអង្គការសិទ្ធិមនុស្សដ៏ចំណាស់ជាងគេនិងល្បីល្បាញបំផុតមួយរបស់រុស្ស៊ីបានទទួលពានរង្វាន់ណូបែលសន្តិភាពឆ្នាំ ២០២២ រួមជាមួយនឹងសកម្មជនបេឡារុសដែលជាប់ពន្ធនាគារលោក Ales Bialiatski និងមជ្ឈមណ្ឌលសម្រាប់សេរីភាពស៊ីវិលដែលជាអង្គការអ៊ុយក្រែនផងដែរ។
អង្គការ Memorial ត្រូវបានបង្កើតឡើងនៅក្នុងសហភាពសូវៀតក្នុងឆ្នាំ ១៩៨៧ ដើម្បីធានាថាជនរងគ្រោះនៃការគាបសង្កត់របស់បក្សកុម្មុយនិស្តនឹងត្រូវបានចងចាំ។ អង្គការនេះបានបន្តចងក្រងព័ត៌មានស្តីពីការរំលោភសិទ្ធិមនុស្ស និងតាមដានជោគវាសនារបស់អ្នកទោសនយោបាយនៅក្នុងប្រទេសរុស្ស៊ី ខណៈពេលដែលប្រឈមនឹងការបង្ក្រាបរបស់រដ្ឋាភិបាលរុស្ស៊ីក្នុងពេលប៉ុន្មានឆ្នាំថ្មីៗនេះ៕
