ប្រទេសកាតាបានប្រកាសនៅថ្ងៃចន្ទនេះអំពីការជួបជុំឡើងវិញរបស់កុមារអ៊ុយក្រែនមួយក្រុមជាមួយនឹងក្រុមគ្រួសាររបស់ពួកគេ ដែលនេះគឺជាការចាប់ផ្ដើមត្រឡប់មកវិញរបស់កុមាររាប់ពាន់នាក់ដែលអ៊ុយក្រែនបានបញ្ជាក់ថារុស្ស៊ីបានចាប់យកទៅទាំងបង្ខំបន្ទាប់ពីបានបើកការឈ្លានពានលើខ្លួនកាលពីខែកុម្ភៈឆ្នាំ ២០២២ មក។
ដំណើរមាតុភូមិនិវត្តន៍នេះបានកើតឡើងបន្ទាប់ពីមានការចរចារាប់ខែដែលសម្របសម្រួលដោយប្រទេសកាតា។
មន្ត្រីដែលដឹងអំពីរឿងនេះបាននិយាយថា កុមារ ៤ នាក់អាយុពី ២ ទៅ ១៧ ឆ្នាំបានជួបជុំឡើងវិញជាមួយក្រុមគ្រួសាររបស់ពួកគេនៅក្រោមការរៀបចំមួយដែលនឹងឈានទៅដល់ការធ្វើមាតុភូមិនិវត្តន៍បន្ថែមទៀត។
ក្រសួងការបរទេសកាតាបានបញ្ជាក់នៅក្នុងសេចក្ដីថ្លែងការណ៍មួយថា៖ «ក្រសួងការបរទេសកាតាបានសម្របសម្រួលការរៀបចំទទួលស្វាគមន៍កុមារទាំងនេះនិងក្រុមគ្រួសាររបស់ពួកគេនៅឯស្ថានទូតកាតាប្រចាំទីក្រុងមូស្គូនៃប្រទេសរុស្ស៊ីក្នុងអំឡុងប្រតិបត្តិការនេះ ហើយនឹងអមដំណើរពួកគេទៅកាន់ទិសដៅរបស់ខ្លួន ធានាសុវត្ថិភាព សេចក្ដីសុខស្រួល និងសុខុមាលភាពជូនពួកគេ»។
តុលាការព្រហ្មទណ្ឌអន្តរជាតិ (ICC) បានចេញដីកាចាប់ខ្លួនប្រធានាធិបតីរុស្ស៊ីលោក Vladimir Putin កាលពីខែមីនា ដោយបានចោទប្រកាន់លោកថាបាន «ទទួលខុសត្រូវលើឧក្រិដ្ឋកម្មសង្គ្រាមនៃការចាប់យកទៅដោយខុសច្បាប់» នូវកុមារពីប្រទេសអ៊ុយក្រែន។
សម្រាប់ព័ត៌មានដាច់ដោយឡែកមួយទៀត ក្រសួងការពារជាតិអ៊ុយក្រែនបានបញ្ជាក់នៅថ្ងៃចន្ទនេះថា រុស្ស៊ីបានវាយប្រហារលើអ៊ុយក្រែនកាលពីយប់មិញដោយប្រើមីស៊ីល ៥ គ្រាប់ និងដ្រូន ១២ គ្រឿង។
កងទ័ពអាកាសអ៊ុយក្រែនបានលើកឡើងថា ខ្លួនបានបាញ់ទម្លាក់មីស៊ីលចំនួន ២ គ្រាប់ក្នុងចំណោមនោះ ដែលបានបាញ់សំដៅតំបន់ភាគខាងជើងនិងភាគខាងកើតប្រទេសអ៊ុយក្រែន ក៏ដូចជាដ្រូនចំនួន ១១ គ្រឿងផងដែរ។
លោក Pilip Pronin អភិបាលតំបន់ Poltava នៅភាគខាងកើតប្រទេសអ៊ុយក្រែន បានបញ្ជាក់តាម Telegram ថា កម្ទេចកម្ទីបាក់បែករបស់មីស៊ីលទាំងនេះបានធ្លាប់ចំផ្ទះសម្បែងជាច្រើនខ្នងនិងធ្វើឱ្យមនុស្សយ៉ាងតិច ៣ នាក់រងរបួស៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន Reuters។
