ការបោះឆ្នោតមួយទៅលើការធ្វើវិសោធនកម្មរដ្ឋធម្មនុញ្ញរបស់រុស្ស៊ី ដែលអាចអនុញ្ញាតឲ្យលោកប្រធានាធិបតី Vladimir Putin កាន់អំណាចរហូតដល់ឆ្នាំ ២០៣៦ បានឈានដល់ថ្ងៃចុងក្រោយហើយកាលពីថ្ងៃពុធម្សិលមិញនេះ ស្របពេលដែលមានសេចក្ដីរាយការណ៍កាន់តែច្រើនអំពីការដាក់សម្ពាធទៅលើអ្នកបោះឆ្នោតនិងភាពមិនប្រក្រតីនានា។
ជាលើកដំបូងនៅក្នុងប្រទេសរុស្ស៊ី ការបោះឆ្នោតបានប្រព្រឹត្តទៅរយៈពេលមួយសប្ដាហ៍ក្នុងអំឡុងពេលដែលមានការឆ្លងរាតត្បាតជំងឺកូវីដ១៩។ ក្រុមអ្នករិះគន់វិមានក្រឹមឡាំងបានថ្កោលទោសរដ្ឋាភិបាលវិមានក្រឹមឡាំងថា យកពេលឆ្លងរាតត្បាតជំងឺកូវីដ១៩នេះជាលេសបន្ថែមទៀតដើម្បីកេងចំណេញពីលទ្ធផលនៃការបោះឆ្នោតនេះ។
លោក Putin រំពឹងថា នឹងទទួលបានលទ្ធផលដូចដែលលោកចង់បាន ក្រោយពីមានយុទ្ធនាការឃោសនារបស់រដ្ឋដ៏ធំមួយ និងការបរាជ័យរបស់ក្រុមប្រឆាំងក្នុងការស្រុះស្រួលគ្នាប្រឆាំងនឹងរឿងនេះ។ ក៏ប៉ុន្តែ វិធីសាស្ត្រក្នុងការក្ដោបក្ដាប់អំណាចរបស់លោក Putin អាចនឹងធ្វើឲ្យប៉ះពាល់ដល់ជំហររបស់លោកទៅវិញ ដោយសារតែវិធីសាស្ត្របែបចាស់គំរិលដែលត្រូវបានប្រើប្រាស់ដើម្បីបង្កើនចំនួនអ្នកទៅបោះឆ្នោត និងមូលដ្ឋានច្បាប់ស្រពេចស្រពិលសម្រាប់ការបោះឆ្នោតនេះ។
ត្រឹមព្រឹកថ្ងៃពុធម្សិលមិញនេះ ចំនួនអ្នកទៅបោះឆ្នោតបានកើនលើស ៥៥% ទៅហើយ។ នេះបើយោងតាមក្រុមមន្ត្រីរៀបចំការបោះឆ្នោត។ តួលេខអ្នកទៅបោះឆ្នោតនេះនឹងបន្ដកើនឡើងរហូតដល់ជិត ៩០% នៅក្នុងតំបន់មួយចំនួន។ បន្ទាប់ពីការបោះឆ្នោតបានបិទបញ្ចប់នៅតំបន់ Far East ដែលមានល្វែងម៉ោងដើរមុនទីក្រុងមូស្គូ ក្រុមមន្ត្រីបានរាយការណ៍យ៉ាងរហ័សថា លទ្ធផលបឋមបង្ហាញថា អ្នកបោះឆ្នោត ៧០% គាំទ្រការកែប្រែនេះ។ ក៏ប៉ុន្តែ ក្រុមអ្នករិះគន់វិមានក្រឹមឡាំង និងអ្នកឃ្លាំមើលការបោះឆ្នោតឯករាជ្យចោទសួរចំពោះតួលេខផ្លូវការនេះ៕
