ពួកអ្នកជួយសង្គ្រោះនៅក្នុងទីក្រុង Pokrovsk ភាគខាងកើតប្រទេសអ៊ុយក្រែនកំពុងជីកកកាយកម្ទេចបាក់បែករបស់អគារជាច្រើនដែលត្រូវបានបំផ្លាញដោយការវាយប្រហារកាំជ្រួចមីស៊ីលរុស្ស៊ី២គ្រាប់ជាប់ៗគ្នាកាលពីថ្ងៃចន្ទម្សិលមិញដែលបានសម្លាប់មនុស្សយ៉ាងតិចណាស់ក៏៧នាក់ដែរ។
ទីក្រុង Pokrovsk ស្ថិតនៅក្នុងតំបន់ Donetsk បានក្លាយជាទីកន្លែងមួយនៃការប្រយុទ្ធដ៏តានតឹងបំផុតចាប់តាំងពីរុស្ស៊ីបានចាប់ផ្តើមការឈ្លានពានរបស់ខ្លួននៅក្នុងខែកុម្ភៈ ឆ្នាំ២០២២ មក។
លោក Pavlo Kyrylenko អភិបាលក្រុង Donetsk និយាយថា មីស៊ីល២គ្រាប់បានធ្លាក់៤០នាទីពីគ្នា ដោយបានបំផ្លាញអគារលំនៅដ្ឋាន ភោជនីយដ្ឋាន កន្លែងលក់ដូរនិងអគាររដ្ឋបាលនិងសណ្ឋាគារដ៏មានប្រជាប្រីយ៍ភាពមួយដែលពួកអ្នកកាសែតបរទេសស្នាក់នៅ។
អ្នកស្លាប់នោះរួមមានមន្ត្រីជួយសង្គ្រោះបន្ទាន់ដែលធ្វើការជាមួយរដ្ឋាភិបាលតំបន់ Donetsk។ មនុស្សយ៉ាងតិចណាស់ក៏២៥នាក់ដែរបានរងរបួសនៅក្នុងការវាយប្រហារដោយមីស៊ីល២គ្រាប់នោះ។
ក្នុងខណៈនោះដែរ មនុស្ស២នាក់បានត្រូវសម្លាប់ដោយការវាយប្រហារមីស៊ីល២គ្រាប់របស់រុស្ស៊ីនៅក្នុងភូមិ Kruhliakivka ស្រុក Kupiansk។ នេះបើតាមលោក Andriy Yermak នាយកខុទ្ទកាល័យរបស់ប្រធានាធិបតីអ៊ុយក្រែន។
នៅក្នុងព្រឹត្តិការណ៍មួយផ្សេងទៀត សហរដ្ឋអាមេរិកបានចាត់ទុកការចូលរួមរបស់ចិនជាផ្លែផ្កាមួយនៅឯសន្និសីទកំពូលសន្តិភាពក្រុង Jeddah នៃប្រទេសអារ៉ាប៊ីសាអូឌីតស្តីពីប្រទេសអ៊ុយក្រែននៅចុងសប្តាហ៍នេះ។
អ្នកនាំពាក្យក្រសួងការបរទេសសហរដ្ឋអាមេរិកលោក Matthew Miller បានប្រាប់ពួកអ្នកយកព័ត៌មានថា ទីប្រឹក្សាសន្តិសុខជាតិសហរដ្ឋអាមេរិកលោក Jake Sullivan និងអនុរដ្ឋមន្ត្រីការបរទេសអាមេរិកលោកស្រី Victoria Nuland បានជួបប្រជុំរយៈពេលខ្លីនៅខាងក្រៅសន្និសីទកំពូលក្នុងទីក្រុង Jeddah ជាមួយលោក Li Hui បេសកជនពិសេសទទួលបន្ទុកកិច្ចការតំបន់អាស៊ីអឺរ៉ុបនិងជាអតីតឯកអគ្គរដ្ឋទូតចិនប្រចាំនៅប្រទេសរុស្ស៊ី។
រដ្ឋមន្ត្រីការបរទេសចិនលោក Wang Yi បាននិយាយនៅក្នុងការសន្ទនាតាមទូរស័ព្ទជាមួយរដ្ឋមន្ត្រីការបរទេសរុស្ស៊ីលោក Sergei Lavrov ថា រដ្ឋាភិបាលក្រុងប៉េកាំងនឹងប្រកាន់ជំហរឯករាជ្យនិងមិនលម្អៀងស្តីពីដំណោះស្រាយសន្តិភាពនេះ។
លោក Wang បាននិយាយថា ចិននឹងធ្វើជា«សំឡេងដោយមិនលម្អៀងនិងប្រកបដោយវិចារណញ្ញាណ»នៅឯគ្រប់វេទិកាអន្តរជាតិនិង«ចរចាយ៉ាងសកម្មដើម្បីលើកស្ទួយសន្តិភាព»៕
ព័ត៌មានខ្លះនៃសេចក្តីរាយការណ៍នេះដកស្រង់ពីអ្នកស្រី Margaret Besheer អ្នកឆ្លើយឆ្លងព័ត៌មានរបស់ VOA និងទីភ្នាក់ងារសារព័ត៌មាន AP, AFP និង Reuters។
