ប្រធានាធិបតីរុស្ស៊ី Vladimir Putin បានចេញបង្ហាញខ្លួនជាសាធារណៈកាលពីថ្ងៃច័ន្ទនៅក្រោយមានពាក្យចចាមអារាមជាច្រើនថ្ងៃមកហើយថា លោកមានជំងឺ បានស្លាប់ ឬមួយបានត្រូវបណ្តេញចេញពីតំណែងក្នុងរដ្ឋប្រហារមួយ។
លោក Putin បានចេញបង្ហាញខ្លួននៅចំពោះមុខក្រុមអ្នកកាសែតជាមួយលោកប្រធានាធិបតី Almazbek Atambayev នៃប្រទេសកៀហ្ស៊ីស៊ីស្ថាន (Kyrgyzstan) នៅវិមានកុងស្តង់ទីន (Konstantin) ក្នុងក្រុងសេនភីធឺស្បឺគ (St. Petersburg) នៅមុនពេលមេដឹកនាំទាំងពីរនាក់នេះធ្វើការចរចាគ្នា។
លោក Atambayev បានថ្លែងថា គួរមាន«ការនិយាយរសឹបរសៀវ»តិចជាងមុនអំពីមេដឹកនាំរុស្ស៊ីរូបនេះ ហើយថាលោក Putin បានបើកទ្បានដឹកលោកនៅជុំវិញវិមាននោះដែលបង្ហាញថា លោក Putin«មិនមែនគ្រាន់តែដើរទេ ក៏ប៉ុន្តែលោកបានបើកទ្បានយ៉ាងលឿនទៀតផង»។
ក៏ប៉ុន្តែ លោក Putin បានឆ្លើយតបទាំងញញឹមថា៖«វាគួរឲ្យធុញទ្រាន់បើគ្មានការនិយាយចចេចចចូចទេនោះ»។
នៅមុនពេលប្រធានាធិបតីរុស្ស៊ីចេញបង្ហាញខ្លួនកាលពីថ្ងៃច័ន្ទ គេមិនបានឃើញលោកជាសាធារណៈទេចាប់តាំងពីថ្ងៃទី៥ ខែមីនាមក នៅពេលលោកបានជួបជាមួយលោកនាយករដ្ឋមន្ត្រីប្រទេសអ៊ីតាលី Matteo Renzi នៅក្នុងក្រុងម៉ូស្គូ៕
