ភ្ជាប់​ទៅ​គេហទំព័រ​ទាក់ទង

មន្រ្តី​សិទ្ធិ​មនុស្ស​៖ ជន​សង្ស័យ​លើ​ឃាតកម្ម​លោក​ Nemtsov ប្រហែល​សារភាព​ក្រោម​ទារុណ​កម្ម​


បុរស​ឈ្មោះ​​ Zaur Dadayev ដែល​ជា​ជន​សង្ស័យ​ម្នាក់​នៅ​ក្នុង​ចំណោម​ជន​សង្ស័យ​ប្រាំនាក់​ពាក់ព័ន្ធ​នឹង​ការ​សម្លាប់​លោក​ Boris Nemtsov កំពុង​ឈរ​នៅក្នុង​បន្ទប់​តុលាការ​ក្រុង​មូស្គូ​ ប្រទេស​រុស្ស៊ី​ នា​ថ្ងៃអាទិត្យ​ ទី០៨ ខែ​មីនា​ ឆ្នាំ​២០១៥។

សមាជិក​ម្នាក់​របស់​ក្រុម​ប្រឹក្សា​សិទ្ធិ​មនុស្សរបស់​រដ្ឋាភិបាល​វិមាន​ក្រឹមឡាំង​ និយាយ​ថា ​មាន​ហេតុ​ផល​ជឿ​ថា ​ជនសង្ស័យ​ដ៏​សំខាន់​នៅ​ក្នុង​ការ​សម្លាប់​លោក Boris Nemtsov ​មេដឹកនាំ​គណបក្ស​ប្រឆាំង​រុស្ស៊ី ​បាន​សារ​ភាព​នៅក្រោម​ការ​ធ្វើ​ទារុណ​កម្ម។

លោក Andrei Babushkin ​បាន​ប្រាប់​ក្រុម​អ្នក​យក​ព័ត៌មាន​នៅ​ថ្ងៃ​ពុធ​នេះ​ថា ​លោក ​បាន​ឃើញ​ស្នាម​របួស​ជា​ច្រើន​នៅលើ​ខ្លួន​ប្រាណរបស់ Zaur Dadayev ​ក្នុង​អំឡុងពេល​ចុះ​ទៅមើល​បន្ទប់ក្នុង​គុក​របស់​ជន​សង្ស័យ​កាល​ពី​ថ្ងៃ​អង្គារ។

​ក្នុង​ខណៈ​នោះ​ដែរ ​កាសែតមួយ​នៅ​ក្នុង​ទីក្រុងមូស្គូ ​ប្រាប់​ឲ្យ​ដឹង​ថាDadayev ​បានបដិសេធ​ពី​ការ​សារភាព​របស់​ខ្លួន​ដល់​ការ​សម្លាប់​នេះ ​ដោយ​ប្រាប់​កាសែត Moskovsky Komsomoletsថា ​លោក ​បាន​ប្រាប់​ក្រុម​រដ្ឋ​អំណាច​ថា ​គាត់​មិន​បាន​សម្លាប់​លោក Nemtsov ហើយ​មាន​គម្រោង​ឆ្លើយ​ថា​ ជា​ជនគ្មាន​កំហុសនៅពេល​ដែល​លោក​ត្រូវ​គេនាំ​ទៅ​មុខ​ចៅក្រម​។ ​ក៏​ប៉ុន្តែ​លោក​បាន​និយាយ​ថា ​នៅពេល​ដែល​លោក​ ​ត្រូវ​បាន​គេ​នាំ​ទៅ​កាន់​តុលាការ​គេ​មិន​បាន​ផ្តល់ឱកាស​ឲ្យ​លោក​ដើម្បី​និយាយ​ទេ។

កាសែត​នោះ ​ក៏​បាន​ដកស្រង់​សម្តី​លោក Dadayevមក​ចុះ​ផ្សាយ​ដែរ​ថា ​លោក ​បាន​ផ្តល់​ចម្លើយសារភាព​មិន​ពិត ​ការ​ធ្វើ​ដូច្នេះ​ប៉ូលិស​នឹង​ដោះ​លែង​មិត្ត​ភក្តិ​ម្នាក់​ដែល​បាន​នៅ​ជាមួយ​លោក​នៅពេល​ដែល​លោក​ត្រូវ​ចាប់​ខ្លួន។

កាល​ពី​ថ្ងៃ​អាទិត្យ​ ​ចៅក្រម​រុស្ស៊ី​ម្នាក់​បាន​ប្រកាស​ពី​ការ​សារភាព​របស់​លោក Dadayev ​ខណៈ​ដែល​ចៅ​ក្រម​នោះ​និយាយ​ថា ​ក្រុម​អាជ្ញា​ធរ​បន្តការ​ស៊ើប​អង្កេត​របស់​ខ្លួនលើ​ជន​សង្ស័យ​៤​នាក់​ផ្សេង​ទៀត។

ជន​សង្ស័យ​ទាំង​៥​នាក់ ​បាន​បង្ហាញ​ខ្លួនក្នុង​តុលាការ​ទីក្រុង​មូស្គូ ហើយ​បាន​ត្រូវ​ចាប់​ខ្លួននៅ​ពេល​ដែល​ក្រុម​មន្រ្តី ​បាន​សាក​សួរ​ពួកគេអំពី​ការ​បាញ់​សម្លាប់​លោក Nemtsovកាល​ពី​ថ្ងៃ​ទី​២៧ ​ខែ​កុម្ភៈ។​លោក Nemtsovជាសត្រូវ​ស៊ី​សាច់​ហុត​ឈាម​របស់​លោក​ប្រធានា​ធិបតីរុស្ស៊ី Vladimir Putin។ លោក Nemtsov ​បាន​ត្រូវ​គេ​បាញ់ពី​ខាង​ក្រោយចំនួន​បួន​លើក​នៅពេល​ដែល​លោក ​ដើរ​ឆ្លង​ស្ពានមួយ​ជាមួយ​មិត្ត​ស្រី​របស់​លោក​នៅ​ជិត​វិមាន​ក្រឹមឡាំង។

ចៅក្រម Nataliya Mushnikova ​បាន​និយាយ​ថា លោក DAdayevបាន​ចុះ​ហត្ថលេខា​លើ​ចម្លើយ​សារភាព ​ទោះ​ជា​យ៉ាង​ណា​ក៏ដោយ​គ្មាន​សេចក្តី​លម្អិត ​បាន​បញ្ចេញ​អំពី​តួនាទី​របស់​លោក​ទេ៕

XS
SM
MD
LG