មេដឹកនាំនៃប្រទេសចំនួន ៣ នៅទ្វីបអឺរ៉ុបបានធ្វើដំណើរទៅកាន់រដ្ឋធានីកៀវ ប្រទេសអ៊ុយក្រែនកាលពីថ្ងៃអង្គារម្សិលមិញ ស្របពេលដែលប្រទេសរុស្ស៊ីបានបាញ់ផ្លោងដាក់រដ្ឋធានីនិងទីក្រុងផ្សេងៗទៀតរបស់អ៊ុយក្រែននៅក្នុងការឈ្លានពានរបស់ខ្លួនជិត ៣ សប្តាហ៍កន្លងមកនេះ។
រុស្ស៊ីបានបាញ់ផ្លោងចូលរដ្ឋធានីកៀវកាលពីព្រឹកថ្ងៃអង្គារ ដែលក្នុងនោះការបាញ់ផ្លោងមួយបានត្រូវចំអាគារស្នាក់នៅរបស់ពលរដ្ឋ ដោយបានសម្លាប់មនុស្សយ៉ាងតិច ២ នាក់។ អភិបាលរដ្ឋធានីកៀវលោក Vitaly Klitschko បានប្រកាសបម្រាមគោចររយៈពេល ៣៦ ម៉ោងសម្រាប់ទីក្រុងកៀវដែលបានចាប់ផ្តើមកាលពីយប់ថ្ងៃអង្គារ។
នាយករដ្ឋមន្ត្រីប្រទេសឆែកលោក Petr Fiala បាននិយាយថា លោកបានធ្វើដំណើរទៅកាន់រដ្ឋធានីកៀវកាលពីថ្ងៃអង្គារម្សិលមិញជាមួយនឹងនាយករដ្ឋមន្ត្រីប៉ូឡូញលោក Mateusz Morawiecki និងនាយករដ្ឋមន្ត្រីស្លូវេនីលោក Janez Jansa ដើម្បីតំណាងឲ្យក្រុមប្រឹក្សាអឺរ៉ុបនៃសហភាពអឺរ៉ុបនៅក្នុងជំនួបជាមួយប្រធានាធិបតីអ៊ុយក្រែនលោក Volodymyr Zelenskyy និងនាយករដ្ឋមន្ត្រីអ៊ុយក្រែនលោក Denys Shmyhal។
លោក Fiala បានថ្លែងថា៖ «គោលបំណងនៃដំណើរទស្សនកិច្ចនេះគឺដើម្បីបញ្ជាក់អំពីការគាំទ្រច្បាស់លាស់របស់សហភាពអឺរ៉ុបទាំងមូលចំពោះអធិបតេយ្យភាពនិងឯករាជ្យភាពរបស់ប្រទេសអ៊ុយក្រែន។ គោលបំណងនៃដំណើរទស្សនកិច្ចនេះក៏បង្ហាញឱ្យឃើញផងដែរអំពីការគាំទ្រយ៉ាងទូលំទូលាយចំពោះប្រទេសនិងប្រជាពលរដ្ឋអ៊ុយក្រែន»។
សហភាពអឺរ៉ុបបានប្រកាសដាក់ទណ្ឌកម្មជុំថ្មីមួយទៀតប្រឆាំងនឹងប្រទេសរុស្ស៊ី។ ទណ្ឌកម្មទាំងនោះមានដូចជាការហាមឃាត់ការដោះដូរពាណិជ្ជកម្មជាមួយក្រុមហ៊ុនមួយចំនួនដែលកាន់កាប់ដោយរដ្ឋឬការវិនិយោគថ្មីនៅក្នុងផ្នែកថាមពលរបស់រុស្ស៊ី និងការរឹតបន្តឹងពាណិជ្ជកម្មឲ្យកាន់តែខ្លាំងជាងមុនលើទំនិញដែក ដែកថែប និងទំនិញប្រណិតៗផ្សេងទៀត។
ការឆ្លើយតបភាគច្រើនរបស់អន្តរជាតិលើការឈ្លានពានរបស់រុស្ស៊ីក្នុងពេលកន្លងមកបានផ្តោតលើការដាក់ទណ្ឌកម្មលើសេដ្ឋកិច្ចរុស្ស៊ី។ ប្រទេសជប៉ុនក៏បានប្រកាសទណ្ឌកម្មថ្មីផងដែរកាលពីថ្ងៃអង្គារ ដោយថាខ្លួនបានបង្កកទ្រព្យសម្បត្តិរបស់ជនជាតិរុស្ស៊ីចំនួន ១៧ នាក់ ដែលក្នុងនោះរួមមានទាំងសមាជិកសភារុស្ស៊ី ១១ នាក់ មហាសេដ្ឋី Viktor Vekselberg និងសមាជិកក្រុមគ្រួសាររបស់ធនាគារិក Yuri Kovalchukផងដែរ៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់ពីទីភ្នាក់ងារព័ត៌មាន Associated Press ទីភ្នាក់ងារព័ត៌មាន AFP និងទីភ្នាក់ងារព័ត៌មាន Reuters។
