មន្ត្រីរុស្ស៊ីបានរាយការណ៍ពីការវាយប្រហារដោយយន្តហោះដ្រូនអ៊ុយក្រែនជាច្រើនលើក កាលពីយប់មិញដោយសំដៅទៅលើតំបន់ជាច្រើនរបស់រុស្ស៊ី ខណៈពេលដែលប្រព័ន្ធការពារដែនអាកាសអ៊ុយក្រែន បានឆ្លើយតបទៅនឹងការវាយប្រហារតាមអាកាសមួយរបស់រុស្ស៊ីលើរដ្ឋធានីកៀវ នៅព្រឹកថ្ងៃពុធ។
ប្រធានរដ្ឋបាលយោធាតំបន់កៀវលោក Sergei Popko បាននិយាយតាមតេឡេក្រាមថា បំណែកបាក់បែកដែលធ្លាក់ពីលើ បានសម្លាប់មនុស្ស២នាក់ និងរបួសម្នាក់។ លោកបានពណ៌នាការវាយប្រហាររបស់រុស្ស៊ីលើរដ្ឋធានីអ៊ុយក្រែននោះថា ជាការវាយប្រហារដ៏ធំបំផុតមួយ ចាប់តាំងពីរដូវផ្ការីកដើមឆ្នាំនេះមក ដោយប្រព័ន្ធការពារដែនអាកាសអ៊ុយក្រែន បានបាញ់ទម្លាក់ដ្រូននិងមីស៊ីលរុស្ស៊ីប្រមាណជាង២០គ្រឿងក្នុងការវាយប្រហារនោះ។
អភិបាលក្រុងកៀវលោក Vitali Klitschko បាននិយាយតាមបណ្តាញតេឡេក្រាមថា កម្ទេចបាក់បែកដែលធ្លាក់ពីលើ បានបណ្តាលឱ្យឆេះនិងធ្វើឱ្យខូចខាតក្នុងសង្កាត់ជាច្រើនក្នុងរដ្ឋធានីនេះ។
ដោយឡែកក្នុងតំបន់ Pskov ដែលកាន់កាប់ដោយរុស្ស៊ី ដែលស្ថិតនៅជិតព្រំដែនប្រទេសអេស្តូនី និងប្រទេសឡេតូនី (Latvia) នោះ ក្រុមមន្ត្រីរុស្ស៊ីនិយាយថា យន្តហោះដ្រូនអ៊ុយក្រែន បានធ្វើឱ្យខូចខាតយន្តហោះដឹកជញ្ជូនយោធាចំនួន៤គ្រឿង នៅក្នុងការវាយប្រហារទៅលើព្រលានយន្តហោះមួយកន្លែង។
អភិបាលតំបន់លោក Mikhail Vedernikov បានបង្ហោះវីដេអូលើតេឡេក្រាម ដោយបង្ហាញពីភ្លើងឆេះដ៏ធំមួយនៅទីតាំងនោះ។ គេមិនឃើញមានសេចក្តីរាយការណ៍ពីការរងគ្រោះដល់មនុស្សឡើយ ហើយជើងហោះហើរនៅព្រលានយន្តហោះនោះត្រូវបានលុបចោល នៅថ្ងៃពុធនេះ ដើម្បីវាយតម្លៃពីការខូចខាត។
រុស្ស៊ីនិយាយថា យោធារបស់ខ្លួនបានបាញ់ទម្លាក់ដ្រូនអ៊ុយក្រែនជាច្រើនគ្រឿង នៅតំបន់ Oryol តំបន់ Kaluga តំបន់ Bryansk តំបន់ Rayazan និងតំបន់ក្រុងមូស្គូ។
យោធារុស្ស៊ីក៏បាននិយាយផងដែរថា កងកម្លាំងរបស់ខ្លួន បានកម្ចាត់ការវាយប្រហារដោយដ្រូនសមុទ្រមួយរបស់អ៊ុយក្រែន នៅលើទីក្រុងកំពង់ផែ Sevastopol នៃតំបន់ឧបទ្វីប Crimea ដែលជាមូលដ្ឋានយោធារបស់កងនាវាជើងទឹករុស្ស៊ីក្នុងសមុទ្រខ្មៅ។
ដោយមិនបញ្ជាក់ពីទីតាំងណាមួយពិតប្រាកដក្នុងសមុទ្រខ្មៅនោះ រុស្ស៊ីក៏បាននិយាយកាលពីថ្ងៃពុធនេះដែរថា ខ្លួនក៏បានបំផ្លាញទូកដឹកកងកម្លាំងយោធាអ៊ុយក្រែន៤គ្រឿងផងដែរ៕
ព័ត៌មានខ្លះនៅក្នុងសេចក្តីរាយការណ៍នេះមានប្រភពពីទីភ្នាក់ងារសារព័ត៌មាន The Associated Press, Agence France-Presse និង Reuters។
