ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រុស្ស៊ី​ហៅ​ការ​ដាក់​ទណ្ឌកម្ម​ថ្មី​របស់​ស.រ.អា.​លើ​ក្រុម​ហ៊ុន​រុស្ស៊ី​ ​ចិន​ និង​សិង្ហបុរី​ថា​ជា​«ការ​ឥត​ប្រយោជន៍»


រូបឯកសារ៖ គ្រឿង​ចក្រ​សម្រាប់​ស្ទួច​និង​រ៉ែ​ធ្យូង​ថ្ម​របស់​រុស្ស៊ី និង​កូរ៉េ​ខាង​ជើង​ឆ្ពោះ​ទៅ​ប្រទេស​ចិន ត្រូវ​បាន​គេ​ថត​នៅ​តំបន់​សេដ្ឋកិច្ច​ពិសេស​ Rason
រូបឯកសារ៖ គ្រឿង​ចក្រ​សម្រាប់​ស្ទួច​និង​រ៉ែ​ធ្យូង​ថ្ម​របស់​រុស្ស៊ី និង​កូរ៉េ​ខាង​ជើង​ឆ្ពោះ​ទៅ​ប្រទេស​ចិន ត្រូវ​បាន​គេ​ថត​នៅ​តំបន់​សេដ្ឋកិច្ច​ពិសេស​ Rason

ប្រទេស​រុស្ស៊ី​និយាយ​ថា​ ការ​ដាក់​ទណ្ឌកម្ម​ថ្មី​បំផុត​ដែល​ស.រ.អា.​ដាក់​កំហិត​លើ​ក្រុម​ហ៊ុន​រុស្ស៊ី​, ​ចិន ​និង​សិង្ហបុរី​ជា​ «ការ​បំផ្លិច​បំផ្លាញ»​និងជា​«ការ​ឥត​ប្រយោជន៍»។

ស.រ.អា.​បាន​ដាក់​ពិន័យ​លើ​ក្រុមហ៊ុន​បី​កាល​ពី​ថ្ងៃ​ពុធ ​ដោយ​ចោទ​ប្រកាន់​ក្រុមហ៊ុន​ទាំង​នេះ​ថា​ បាន​ជួយ​ប្រទេស​កូរ៉េខាង​ជើង​ឱ្យ​គេច​វេះ​ពីការ​ដាក់​ទណ្ឌ​កម្ម​អន្តរជាតិ។​

ក្រសួង​ការ​បរទេស​រុស្ស៊ី​បាន​និយាយ​កាល​ពី​ថ្ងៃ​ព្រហស្បតិ៍​ថា ​ការ​ដាក់​ទណ្ឌកម្ម​ថ្មីៗ​របស់​ស.រ.អា.​បាន​ធ្វើ​ឡើង​នៅ​ពេល​ដែល​គេ​ត្រូវ​ការ​«កិច្ច​ខិត​ខំប្រឹង​ប្រែង​អន្តរជាតិ​រួម​គ្នា​«ដើម្បី​ឱ្យ​មាន​ដំណោះ​ស្រាយ​មួយ​នៅ​ក្នុងប្រទេស​កូរ៉េ​ខាង​ជើង»។រដ្ឋាភិបាលក្រុង​មូស្គូ​និយាយ​ថា​ ការ​ដាក់​ទណ្ឌកម្ម​ទាំង​នេះ​អាច​ធ្វើ​ឱ្យ​អន្តរាយ​ដល់​កិច្ច​ចរចា​ស្តី​ពី​ការ​ធ្វើ​កុំ​ឱ្យ​ឧបទ្វីប​កូរ៉េ​មាន​អាវុធ​នុយក្លេអ៊ែរ។​

ស.រ.អា.​បាន​ចោទ​ប្រកាន់​ក្រុមហ៊ុន​ពាណិជ្ជកម្ម​ចិន​មួយ​និង​សាខា​ក្រុមហ៊ុន​នេះ​នៅក្នុង​ប្រទេស​សិង្ហបុរី​ថា ​បាន​កែ​បន្លំ​ឯកសារ​ដើម្បី​សម្រួល​ការ​ដឹក​ជញ្ជូនស្រា​និង​បារី​ចូល​ទៅ​ក្នុង​ប្រទេស​កូរ៉េខាង​ជើង។​ គេ​បាន​និយាយ​ថា​ ក្រុម​ហ៊ុន​នេះ​បាន​ទទួល​ប្រាក់​ចំណូល​ជាង​១​ពាន់​លាន​ដុល្លារ។​

ក្រុមហ៊ុន​រុស្ស៊ី​មួយ​ក៏​បានត្រូវ​ដាក់​ទណ្ឌកម្មដែរ​ដោយ​សារ​បាន​ផ្តល់​សេវា​កំពង់​ផែ​ឱ្យ​នាវា​ដោត​ទង់ជាតិ​កូរ៉េខាង​ជើង​ដឹក​ជញ្ជូន​ប្រេង​ដោយ​ខុស​ច្បាប់។​

ការ​ដាក់​ទណ្ឌកម្ម​ទាំង​នេះ​បង្កកធនធាន​ដែល​ក្រុម​ហ៊ុន​ទាំង​នេះ​មាន​នៅ​ក្នុង​ស.រ.អា.​ និង​រារាំង​ជនជាតិ​អាមេរិកាំង​មិន​ឱ្យ​ធ្វើ​ជំនួញ​ជា​មួយ​ក្រុម​ហ៊ុន​ទាំង​នេះ​ឡើយ៕

XS
SM
MD
LG