ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការ​ដាក់​វានា​ជួយ​សង្គ្រោះ​របស់​ចិន​នៅ​សមុទ្រ​មាន​ជម្លោះ​បង្ហាញ​ពី​ការ​កើន​ឡើង​នៃ​ទំនាក់​ទំនង​សាធារណៈ


រូបឯកសារ៖ នាវា​ចម្បាំង​របស់​ចិន​បាញ់​កាំជ្រួច​មីស៊ីល​​ក្នុង​ពេល​ធ្វើ​សម​យុទ្ធ​មួយ នៅ​សមុទ្រ Bohai និង​សមុទ្រ​លឿង នៅ​ក្បែរ​ឆ្នេរ​របស់​សមុទ្រ​ចិន។

អ្នក​ជំនាញ​និយាយ​ថា ​ប្រទេស​ចិន​ប្រហែល​ជា​បាន​បញ្ជូន​និង​បាន​ផ្សព្វផ្សាយ​ជា​សាធារណៈ​នៃ​ការ​ដាក់​ពង្រាយ​នាវា​នេះ​ថា ​ជា​បំណង​ល្អ​របស់​ចិន​បន្ទាប់​ពី​ខ្លួន​បាន​ធ្វើ​ឲ្យ​ប្រទេស​នានា​មាន​ការ​ខឹង​សម្បា​ជុំវិញ​ការ​បំពាក់​សម្ភារៈ​យោធា​នៅ​លើ​ប្រជុំកោះ​ក្នុង​ដែន​សមុទ្រ​មាន​ជម្លោះ​នេះ។​

រដ្ឋាភិបាល​ក្រុងប៉េកាំង​បាន​ដាក់​នាវា​រុករក​និង​សង្គ្រោះ​អចិន្ត្រៃយ៍​មួយ​គ្រឿង​ជា​លើក​ទីមួយ​នៅ​ដែន​ទឹក​មាន​ជម្លោះ​នៃ​សមុទ្រ​ចិន​ខាង​ត្បូង​ស្រប​ពេល​បង្កើន​ទំនាក់​ទំនង​សាធារណៈ​ជាមួយ​ប្រទេស​ផ្សេងៗ​បន្ទាប់​ពី​ខ្លួន​បាន​ធ្វើ​ឲ្យ​ប្រទេស​តូចៗ​មួយ​ចំនួន​ដែល​ទាម​ទារ​ដែន​អធិបតេយ្យភាព​នៅ​សមុទ្រ​ចិន​ខាងត្បូង​ ភ្ញាក់​ផ្អើល​តាមរយៈ​ការ​បំពាក់​សម្ភារៈ​យោធា​នៅ​តំបន់​មាន​ជម្លោះ​នេះ។ នេះ​បើ​យោង​តាម​អ្នកវិភាគ។

ក្រសួង​ដឹក​ជញ្ជូន​ចិន​បាន​បញ្ជូន​នាវា​មាន​ឈ្មោះ​ថា​ នាវា​ជួយ​សង្រ្គោះ​សមុទ្រ​ខាងត្បូង​115 ​ទៅ​ប្រជុំ​កោះ ​Spratly​ កាល​ពី​ថ្ងៃទី២៧ ​ខែ​កក្កដា​កន្លង​ទៅ។ ​នេះ​បើ​យោង​តាម​របាយការណ៍​របស់​ទីភ្នាក់ងារ​សារព័ត៌មាន​ស៊ិនហួរ។ សារព័ត៌មាន​ស៊ិនហួរ​ក៏​បាន​រាយការណ៍​ផង​ដែរ​ថា​ នាវា​នេះ​អាច​បើក​នៅ​លើ​សមុទ្រ​ក្នុង​ស្ថានភាព​ព្យុះភ្លៀង និង​រលក​ធំៗ​មាន​កម្ពស់​ដល់​ទៅ​៦​ម៉ែត្រ។ វានា​នេះ​ក៏​មាន​កន្លែង​សម្រាប់​ឲ្យ​ឧទ្ធម្ភាគចក្រ​ចុះ​ចត​បាន​ផងដែរ។ ​របាយការណ៍​របស់​សារព័ត៌មាន​ស៊ិនហួរ​ក៏​បាន​រាយការណ៍​បន្ថែម​ថា​ នាវា​សង្គ្រោះ​ប្រភេទ​នេះ​នឹង​ត្រូវ​បង្កើត​ឡើង​បន្ថែម​ទៀត។

ទីភ្នាក់ងារ​សារព័ត៌មាន​ស៊ិនហួរ​បាន​ដក​ស្រង់​សម្តី​របស់​ប្រធាន​ការិយាល័យ​ជួយ​សង្គ្រោះ​ លោក​ Wang Zhenliang​ ដែល​បាន​ថ្លែង​ថា «ការិយាល័យ​ជួយ​សង្គ្រោះ​នៃ​ក្រសួង​ដឹក​ជញ្ជូន​នឹង​បង្កើន​យន្តការ​ឃ្លាំ​មើល​នៅ​តំបន់​នៃ​សមុទ្រ​ចិន​ខាង​ត្បូង​ដើម្បី​ធ្វើ​តាម​ភារកិច្ច​ និង​កាតព្វកិច្ច​ជួយ​សង្គ្រោះ​នៅ​តាម​សមុទ្រ​ឲ្យ​កាន់​តែ​ប្រសើរ​ឡើង​ដូច​ដែល​មាន​ចែង​នៅ​ក្នុង​សន្ធិ​សញ្ញា​អន្តរជាតិ»។

អ្នក​ជំនាញ​និយាយ​ថា ​ប្រទេស​ចិន​ប្រហែល​ជា​បាន​បញ្ជូន​និង​បាន​ផ្សព្វផ្សាយ​ជា​សាធារណៈ​នៃ​ការ​ដាក់​ពង្រាយ​នាវា​នេះ​ថា ​ជា​បំណង​ល្អ​របស់​ចិន​បន្ទាប់​ពី​ខ្លួន​បាន​ធ្វើ​ឲ្យ​ប្រទេស​នានា​មាន​ការ​ខឹង​សម្បា​ជុំវិញ​ការ​បំពាក់​សម្ភារៈ​យោធា​នៅ​លើ​ប្រជុំកោះ​ក្នុង​ដែន​សមុទ្រ​មាន​ជម្លោះ​នេះ។​

លោក ​Jonathan Spangler​ ដែល​ជា​នាយក​អង្គការ​វិភាគ​លើ​បញ្ហា​សមុទ្រ​ចិន​ខាងត្បូង​ឬ South China Sea Think Tank ​នៅក្នុង​ទីក្រុង​តៃប៉ិ​បាន​និយាយ​ថា «និយាយ​រួម​ទៅ​ការ​ប្រកាស​ជា​លក្ខណៈ​ទ្រង់​ទ្រាយ​ធំ​អំពី​សកម្មភាព​មនុស្សធម៌​នេះ​គឺ​គ្រាន់​តែ​ចង់​បិទបាំង​សកម្មភាព​បំពាក់​សម្ភារៈ​យោធា​របស់​ខ្លួន​ និង​ចង់​បង្វែរ​ការ​យល់​ឃើញ​របស់​សាធារណជន​តែ​ប៉ុណ្ណោះ‍»។

ការបំពាក់​សម្ភារៈ​យោធា

ប្រទេស​ប្រ៊ុយណេ​ ម៉ាឡេស៊ី​ ហ្វីលីពីន​ កោះ​តៃវ៉ាន់​ និង​ប្រទេស​វៀតណាម​បាន​តវ៉ា​ចំពោះ​ការទាមទារ​របស់​ក្រុង​ប៉េកាំង​ដែល​ចង់​កាន់​កាប់​៩០​ភាគ​រយ​នៃ​សមុទ្រ​ចិន​ខាង​ត្បូង​រួម​ទាំង​ប្រជុំ​កោះ​ Spratly​ ផងដែរ។ ដែន​សមុទ្រ​ដែល​លាត​សន្ធឹង​ប្រវែង​៣លាន​៥សែន​គីឡូម៉ែត្រការ៉េ​គឺ​ជា​ជង្រុក​ត្រី​ ប្រេង​ ឧស័្មន​ធម្មជាតិ​ និង​ជា​ផ្លូវ​នាវាចរណ៍​យ៉ាង​សំខាន់។

ប្រទេស​ចិន​បាន​លើក​ឡើង​ពី​កំណត់​ត្រា​ប្រវត្តិសាស្រ្ត​នានា​ដើម្បី​គាំទ្រ​ដល់​ការ​ទាមទារ​របស់​ខ្លួន។ ជាង​មួយ​ទសវត្សរ៍​កន្លង​ទៅ​ប្រទេស​ចិន​បាន​ចាក់​ពង្រីក​កោះ​តូចៗ​មួយ​ចំនួន។ ​ការ​ចាក់​ពង្រីក​នេះ​ធ្វើ​ឡើង​ជា​បន្តបន្ទាប់​ស្រប​ពេល​មាន​ការ​បំពាក់​សម្ភារៈ​យោធា​ បង្ក​ឲ្យ​ប្រទេស​ដែល​ទាមទារ​ដែន​អធិបតេយ្យ​ផ្សេង​ទៀតខឹងសម្បា​ ដោយ​សារ​តែ​ចិន​មាន​កម្លាំង​យោធា​ខ្លាំង​ជាង​គេ​នៅ​ក្នុង​តំបន់។

លោក​ Euan Graham​ នាយក​ផ្នែក​សន្តិសុខ​អន្តរជាតិ​នៃ​វិទ្យាស្ថាន​ Lowy ​សម្រាប់​គោល​នយោបាយ​អន្តរជាតិ​នៅ​ក្នុង​ទីក្រុង​ស៊ីដនី​ ប្រទេស​អូស្រា្តលី​ បាន​ថ្លែង​ថា «ប្រទេស​ចិន​ប្រហែល​ជា​ចង់​បន្ធូរ​បន្ថយ​កម្តៅ​នៃ​សកម្មភាព​យោធា​របស់ខ្លួន​ តាម​រយៈ​ការ​ផ្សព្វផ្សាយ​ពី​សកម្មភាព​រុករក​និង​ជួយ​សង្គ្រោះ​ ប៉ុន្តែ​ខ្ញុំ​មិន​គិត​ថា​ ការណ៍​នេះ​នឹង​អាច​ជួយ​បង្វែរ​ទស្សនៈ​របស់​សាធារណជននោះ​ទេ។ ​សង្គ្រាម​ផ្នែក​ទំនាក់​ទំនង​សាធារណៈ​កំពុង​បន្ត​កើត​ឡើង ប៉ុន្តែ​ខ្ញុំ​គិត​ថា ​ប្រទេស​ចិន​អាច​មាន​លទ្ធភាព​តិចតួច​ប៉ុណ្ណោះ​ដើម្បី​ទទួល​ជ័យជម្នះ​លើ​សង្គ្រាម​នេះ​ បើធៀប​ទៅ​នឹង​កាល​ពី​ពីរបី​ឆ្នាំ​មុន។ ​នេះ​ក៏​ដោយសារ​តែ​ខ្ញុំ​គិត​ថា​ វិស័យ​យោធា​កាន់​តែ​បើក​ចំហរ​ជាង​មុន​ និង​ពិបាក​លាក់​បាំង​ជាង​មុន‍»។

លោក​ក៏​បាន​គូស​បញ្ជាក់​បន្ថែម​ថា​ ប្រទេស​ចិន​បាន​ដាក់​នាវា​យោធា​ និង​យន្តហោះ​ចម្បាំង​មុន​នឹង​បញ្ជូន​នាវា​សម្រាប់​ការងារ​រុករក​និង​សង្គ្រោះ​នេះ។ ដូច្នេះ​ចិន​ធ្វើ​ផ្ទុយ​គ្នា​ហើយ»។

ជំនួយ​ពី​ប្រទេស​នានា

អ្នកវិភាគ​ជឿ​ថា​ រដ្ឋាភិបាល​ក្រុង​ប៉េកាំង​សង្ឃឹម​ថា ​នាវា​រុករក​និង​សង្គ្រោះ​នេះ​នឹង​ជួយ​ប្រទេស​ចិន​ឲ្យ​មាន​មុខ​មាន​មាត់​ក្នុង​ការងារ​មនុស្សធម៌​ដូច​នឹង​ប្រទេស​ផ្សេង​ទៀត​ដែរ។កោះ​តៃវ៉ាន់​ដែល​ជា​គូប្រជែង​ផ្នែក​នយោបាយ​របស់​ចិន​បាន​ដាក់​ស្ថានីយ៍​សម្រាប់​ការងារ​រុករក​និង​ជួយ​សង្គ្រោះ​នៅ​ជិតប្រជុំ Spratly។ មន្រ្តីឆ្មាំ​សមុទ្រ​កោះ​តៃវ៉ាន់​បាន​ថ្លែង​ថា​ កាល​ពីឆ្នាំ​២០១៥ ភ្នាក់ងារ​របស់​លោក​បាន​ជួយ​សង្គ្រោះ​អ្នកនេសាទ​ដែល​មិន​មែន​ជា​ជនជាតិ​តៃវ៉ាន់​ពី​ខ្យល់​ព្យុះ​នៅ​ប្រជុំកោះ ​Spratlys។ កាល​ពី​ឆ្នាំមុន​កងទ័ព​អូស្រា្តលី​បាន​ហាត់​សម​ជួយ​សង្គ្រោះ​ពេល​មាន​គ្រោះ​មហន្តរាយ​ជាមួយ​កងទ័ព​ហ្វីលីពីន​នៅ​តាម​ឆ្នេរសមុទ្រ​ចិន​ខាង​ត្បូង។

លោក ​Collin Koh​ អ្នកស្រាវជ្រាវ​ផ្នែក​សន្តិសុខ​តាម​សមុទ្រ​នៃ​សាកល​វិទ្យាល័យ​បច្ចេកវិទ្យា​ Nanyang ​ក្នុង​ប្រទេស​សិង្ហបុរី​បាន​ថ្លែង​ថា​ នាវា​ចម្បាំង​ដឹក​ឧទ្ធម្ភាគចក្រ​របស់​ប្រទេស​ជប៉ុន​ឈ្មោះ Izumo​ ក៏​ជួយ​ធ្វើ​ការងារ​មនុស្សធម៌​ព្រម​ទាំង​ការងារ​ជួយ​សង្គ្រោះ​ផងដែរ។ ប្រទេស​ជប៉ុន​បាន​បញ្ជូន​នាវា​នេះ​ទៅ​សមុទ្រ​ចិន​ខាងត្បូង​កាល​ពី​ពាក់​កណ្តាល​ឆ្នាំ​២០១៧។

ប្រទេសអូស្តា្រលី​និង​ជប៉ុន​មិន​បាន​ទាមទារ​ផ្នែក​ណា​មួយ​នៃ​សមុទ្រ​ចិន​ខាងត្បូង​ទេ ប៉ុន្តែ​បាន​ប្រឆាំង​ទៅ​នឹង​ការទន្ទ្រាន​យក​របស់​ចិន​នៅក្នុង​តំបន់​នេះ។​

ការ​ឃ្លាំ​មើល​របស់​ប្រទេសហ្វីលីពីន

អ្នកស្រី ​Maria Ela Atienza​ សាស្រ្តាចារ្យ​វិទ្យាសាស្រ្ត​នៃ​សាកលវិទ្យាល័យ ​Diliman ហ្វីលីពីន​បាន​ថ្លែង​ថា​ ប្រទេស​ហ្វីលីពីន​គ្រប់គ្រង​កោះ​តូចៗ​ចំនួន​៩​នៅ​ជិត​ប្រជុំកោះ​Spratly។ ក្រុម​អ្នក​តាក់​តែង​ច្បាប់​ប្រហែល​ជា​មើល​ឃើញ​ថា​ នាវា​រុករក​និង​សង្គ្រោះ​របស់​ចិន​នេះ​នៅ​មាន​ភាព​មន្ទិល​សង្ស័យ។​

ប្រទេស​ទាំង​ពីរ​មាន​ទំនាក់​ទំនង​ល្អ​ជាមួយ​គ្នា​ក្នុង​រយៈ​ពេល​២​ឆ្នាំ​កន្លង​ទៅប៉ុន្តែ​គេហទំព័រ​សារព័ត៌មាន​ Philippine Star ​របស់​ហ្វីលីពីន​បាន​ផ្សាយ​ថា​ កាល​ពី​ខែឧសភា​ប្រទេសចិន​បាន​ព្រមាន​ហ្វីលីពីន​ថា​កោះ​តូចៗ​ដែល​គ្មាន​មនុស្ស​នៅ​គួរ​តែ​ទុក​ឲ្យ​នៅ​ស្ថានភាព​ដដែល។

អ្នកស្រី ​Atienza​ បាន​ថ្លែង​បន្ត​ថា​ ប្រទេសចិន​អាច​ដើរ​តួនាទី​ធំ​ជាង​នេះ​នៅក្នុង​តំបន់ នៅ​ពេល​ណា​មាន​មនុស្ស​រង​គ្រោះ។ អ្នក​ស្រី​បាន​ថ្លែង​បន្ថែម​ថា​ ជនជាតិ​ហ្វីលីពីន​បាន​ស្តី​បន្ទោស​ប្រទេស​ចិន​ដែល​ខ្វះ​ខាត​ជំនួយ​បន្ទាប់​ពី​ខ្យល់​ព្យុះ​Yolanda​ បាន​សម្លាប់​មនុស្ស​ជាង​៦​ពាន់​នាក់​នៅ​ក្នុង​ប្រទេស​ហ្វីលីពីន​កាល​ពី​ឆ្នាំ​២០១៣។
អ្នកស្រី ​Atienza​ បាន​ថ្លែង​ដូច្នេះ​ថា៖ «បើ​គិត​ពី​ផ្នែក​ការទូត​វិញ​ ប្រទេស​ចិន​អាច​ជា​ប្រទេស​ជិត​ខាង​ល្អ​មួយ។ ចិន​មិន​បាន​បំពេញ​តួនាទី​ជា​អ្នក​ផ្តល់​ជំនួយ​មនុស្សធម៌​ទេ​ចំពោះ​ករណី​ថ្មីៗ​នេះ​ដែល​ត្រូវការ​ប្រតិបត្តិការ​ជួយ​សង្គ្រោះ​នោះ»។

ជំនួយ​សេដ្ឋកិច្ច

រដ្ឋាភិបាល​ក្រុង​ប៉េកាំង​បាន​ដឹង​ពី​ក្តី​បារម្ភ​នេះ​តាំង​ពី​ឆ្នាំ​២០១៦ នៅ​ពេល​ដែល​ខ្លួន​បាន​ចាញ់​ក្តី​នៅ​ឯតុលាការ​អាជ្ញា​កណ្តាល​អន្តរជាតិ​ជុំវិញ​ការ​ទាមទារ​កាន់​កាប់​សមុទ្រ​ចិន​ខាង​ត្បូង។ ប្រទេស​ចិន​បាន​ច្រាន​ចោល​សាលក្រម​នោះ​ ប៉ុន្តែ​បាន​ចាប់​ផ្តើម​បង្កើន​ទំនាក់​ទំនង​ជាមួយ​នឹង​ប្រទេស​អាស៊ី​អាគ្នេយ៍​ផ្សេង​ទៀត​ដែល​ទាម​ទារ​កាន់កាន់​ដែន​សមុទ្រ​ តាម​រយៈ​ជំនួយ​អភិវឌ្ឍ​និង​ការវិនិយោគ​នៅ​ក្នុង​វិស័យ​ហេដ្ឋារចនា​សម្ព័ន្ធ។

ប្រទេស​ចិន​គឺ​ជា​ប្រទេស​មាន​សេដ្ឋកិច្ច​ធំ​ជាងគេ​ទី២​នៅ​ក្នុង​ពិភពលោក​ដែល​មាន​ឥទ្ធិពល​យ៉ាងខ្លាំង​លើ​ប្រទេសនានា​នៅ​តំបន់​អាស៊ីអាគ្នេយ៍។

លោក ​Jonathan Spangler​ បាន​ថ្លែង​ថា​ទាំង​ប្រទេស​នានា​ដែល​មាន​អំណាច​ព្រម​ទាំង​ប្រទេស​ចិន​ផង​ដែរ​ អាច​ដើរ​តួនាទី​យ៉ាង​សំខាន់​ក្នុង​ការ​ផ្តល់​ជំនួយ​មនុស្សធម៌​ទាំង​នេះ។​

ប្រែសម្រួលដោយ ស៊ូ ពេជ្រចិន្តា

អត្ថបទ​ទាក់ទង

XS
SM
MD
LG