ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ ត្រាំ​ មាន​ជម្លោះ​​ជាថ្មី​ជាមួយ​លោក ​Roberts ​ប្រធាន​​ចៅ​ក្រម​តុលាការ​កំពូល​


រូបឯកសារ៖ លោក ត្រាំ (ស្ដាំ) និយាយ​ជាមួយ​លោក John Roberts ប្រធាន​ចៅក្រមតុលាការ​កំពូល​ កាល​ពី​ខែ​មករា ២០១៨ នៅ​វិមាន​កាពីតូល រដ្ឋ​ធានី​វ៉ាស៊ីនតោន។

ប្រធានាធិបតី​ស.រ.អា. ដូណាល់ ត្រាំ​ បាន​ចាប់​ផ្តើម​ថ្ងៃ​ឈប់​សម្រាក​របស់​លោក​ក្នុង​ពិធី​​បុណ្យ​Thanksgiving ដោយ​ធ្វើ​ការ​ជជែក​ដេញ​ដោល​ជា​សាធារណៈ​ជា​ថ្មី​របស់​លោក​អំពី​ឯករាជ្យភាព​នៃ​ប្រព័ន្ធ​តុលាការ​របស់​ប្រទេស​អាមេរិក។​

លោកប្រធានាធិបតី​ស.រ.អា. ដូណាល់ ត្រាំ​ បាន​ចាប់​ផ្តើម​ថ្ងៃ​ឈប់​សម្រាក​របស់​លោក​ក្នុង​ពិធីបុណ្យ​អំណរ​គុណ​ព្រះ​ ឬ​ Thanksgiving ដោយ​ធ្វើ​ការ​ជជែក​ដេញ​ដោល​ជា​សាធារណៈ​ជា​ថ្មី​របស់​លោក​អំពី​ឯករាជ្យភាព​នៃ​ប្រព័ន្ធ​តុលាការ​របស់​ប្រទេស​អាមេរិក។​

នៅ​ក្នុងសន្និសីទ​មួយតាម​ទូរស័ព្ទ​ជាមួយ​ពួក​ទាហាន​អាមេរិកាំង​នៅ​ឯ​បរទេស​ លោក ត្រាំ​ បាន​និយាយ​ថា​ តុលាការ​ឧទ្ធរណ៍សហព័ន្ធ​មួយក្នុង​រដ្ឋ​កាលីហ្វ័រញ៉ា ​បាន​ក្លាយ​ទៅ​ជា«អ្វីមួយ​ដែល​ធ្វើ​ឱ្យ​មាន​ការ​ឈឺ​ចាប់​ខ្លាំង»។

កំណត់​សម្គាល់​របស់​ប្រធានាធិបតីអាមេរិកាំង​រូប​នេះ​មាន​ឡើង​មួយ​ថ្ងៃ​ក្រោយ​ពី​លោក​និង​លោក​ John Roberts ​ប្រធាន​ចៅក្រម​នៃ​តុលាការ​កំពូល​ស.រ.អា.​បាន​ឆ្លើយ​ឆ្លង​មតិ​គ្នា​អំពី​ឯករាជ្យភាព​នៃ​ប្រព័ន្ធ​តុលាការ​សហព័ន្ធ ​ដោយ​លោក​ Roberts ​បាន​ព្រមាន​ដាស់​តឿន​លោក​ ត្រាំ​ ដែល​បាន​រិះ​គន់​ចៅ​ក្រម​ម្នាក់​ដែល​បាន​ធ្វើ​សេចក្តី​សម្រេច​មួយ​ប្រឆាំង​នឹង​រដ្ឋបាល​លោក។ លោក​ប្រធានាធិបតី​បាន​ហៅ​ចៅ​ក្រម​នេះ​ថា​ជា​«ចៅ​ក្រម​របស់​លោក ​អូបាម៉ា»។

លោក​ Roberts​ ដែល​បាន​ត្រូវ​តែង​តាំង​ដោយ​លោក​ប្រធានាធិបតី​ George W. Bush​ ខាង​គណបក្ស​សាធារណរដ្ឋ បាន​ឆ្លើយ​តប​ដោយ​មាន​ទាំងការ​ស្តី​បន្ទោស​ជា​សាធារណៈ​មួយដល់​ប្រធានាធិបតី ដោយ​លោក​បាន​មាន​ប្រសាសន៍​ថា​អត្ថា​ធិប្បាយ​របស់​លោក​ ត្រាំ​ ឆ្លុះ​បញ្ចាំង​ឱ្យ​ឃើញ​ថា​ លោក​យល់​ខុស​អំពី​មុខ​នាទី​របស់​អង្គ​តុលាការ។​

លោក ​Roberts​ បាន​មាន​ប្រសាសន៍​នៅ​ក្នុង​សេចក្តី​ថ្លែង​ការណ៍​មួយ​ប្រើ​ពាក្យ​ចំៗ​ថា​ «យើង​គ្មាន​ពួក​ចៅក្រម​របស់​លោក ​អូបាម៉ា​ ឬ​ពួក​ចៅក្រម​របស់​លោក ត្រាំ​ ឬ​ពួក​ចៅក្រម​របស់​លោក​ Bush ឬ​ពួក​ចៅ​ក្រម​របស់​លោក ​គ្លីនតុន​ ទេ។

អ្វី​ដែល​យើង​មាន​គឺ​ពួក​ចៅក្រម​មួយ​ក្រុម​ដ៏​អស្ចារ្យ​ដែល​បំពេញ​ការងារដោយ​យក​ចិត្ត​ទុក​ដាក់​បំផុត​ក្នុង​ការ​ផ្តល់​សិទ្ធិ​ស្មើ​គ្នាដល់​ពួក​ជន​ដែល​ចេញ​បង្ហាញ​ខ្លួន​នៅ​ចំពោះ​មុខ​ពួក​គេ។ ប្រព័ន្ធ​តុលាការ​ឯករាជ្យ​នេះ​ជា​អ្វី​ដែល​យើង​ទាំង​អស់​គ្នា​គួរ​តែ​អរគុណ»៕

XS
SM
MD
LG