កាសែត The Washington Post បានរាយការណ៍កាលពីថ្ងៃអង្គារថា ក្នុងចំណោមឯកសារដែលទីភ្នាក់ងារសហព័ន្ធស៊ើបអង្កេត (FBI) បានរកឃើញនៅឯភូមិគ្រឹះរបស់អតីតប្រធានាធិបតីសហរដ្ឋអាមេរិកលោក Donald Trump នៅក្នុងរដ្ឋ Florida កាលពីខែមុន មានឯកសារមួយដែលរៀបរាប់អំពីការការពារផ្នែកយោធារបស់ប្រទេសមួយ ដែលក្នុងនោះរួមមានទាំងសមត្ថភាពនុយក្លេអ៊ែររបស់ប្រទេសនោះផងដែរ។
កាសែតនេះបានបញ្ជាក់ថា សេចក្ដីរាយការណ៍របស់ខ្លួនគឺផ្អែកលើព័ត៌មានដែលបានមកពីប្រភពដែលដឹងអំពីរឿងនេះ ប៉ុន្តែកាសែតនេះមិនបានលើកឡើងអំពីឈ្មោះប្រទេសដែលបានបញ្ជាក់ខាងលើនេះទេ។
សេចក្ដីរាយការណ៍របស់កាសែតនេះក៏បានបញ្ជាក់ផងដែរថា ឯកសារមួយចំនួនដែលរឹបអូសបាននៅក្នុងការឆែកឆេរកាលពីថ្ងៃទី ៨ ខែសីហា នៅឯភូមិគ្រឹះរបស់លោក Trump នោះ រៀបរាប់អំពីប្រតិបត្តិការរបស់សហរដ្ឋអាមេរិកដែលមានលក្ខណៈសម្ងាត់ខ្លាំង ដែលមន្ត្រីជាន់ខ្ពស់ផ្នែកសន្តិសុខជាតិជាច្រើនមិនដឹងអំពីរឿងនេះ។
ក្រសួងយុត្តិធម៌សហរដ្ឋអាមេរិកកំពុងស៊ើបអង្កេតលើករណីរក្សាទុកព័ត៌មានផ្នែកការពារជាតិទាំងនេះ និងលើករណីនៃការប្រឹងប្រែងដើម្បីបង្អាក់ការស៊ើបអង្កេតនេះ។
ក្នុងអំឡុងការឆែកឆេរកាលពីខែសីហានោះ ភ្នាក់ងារ FBI បានរឹបអូសឯកសារប្រហែល ១១.០០០ ដែលក្នុងនោះឯកសារចំនួនប្រហែល ១០០ មានដាក់ស្លាកថាជាឯកសារសម្ងាត់។
លោក Trump ដែលបានបញ្ចប់អាណត្តិជាប្រធានាធិបតីកាលពីខែមករា ឆ្នាំ ២០២១ បានប្រគល់ឯកសាររាប់រយជូនរដ្ឋាភិបាលវិញកាលពីខែមករានិងខែមិថុនានៅក្នុងឆ្នាំនេះ។ ប៉ុន្តែដោយមានការយល់ព្រមពីចៅក្រមសហព័ន្ធ រដ្ឋមន្ត្រីក្រសួងយុត្តិធម៌លោក Merrick Garland បានអនុញ្ញាតឱ្យមានការឆែកឆេរភូមិគ្រឹះរបស់លោក Trump កាលពីខែសីហា បន្ទាប់ពីក្រុមរដ្ឋអាជ្ញាបាននិយាយថាពួកគេទទួលបានព័ត៌មានពីប្រភពខាងក្នុងដែលថាមានឯកសារបន្ថែមទៀតដែលនៅរក្សាទុកនៅក្នុងភូមិគ្រឹះរបស់លោក Trump នោះ។
កន្លងមក លោក Trump បានជំទាស់ទៅនឹងការឆែកឆេរនេះ ហើយមេធាវីរបស់លោកបានស្នើចៅក្រមសហព័ន្ធឱ្យតែងតាំងអ្នកជំនាញពិសេសដើម្បីពិនិត្យលើបណ្ដុំឯកសារដែលរឹបអូសបានទាំងនោះដើម្បីកំណត់ថាតើឯកសារណាខ្លះដែលជាឯកសារបុព្វសិទ្ធិប្រធានាធិបតីដែលគួរតែប្រគល់ជូនលោកវិញ។
ចៅក្រមសហព័ន្ធបានយល់ព្រមតាមសំណើរបស់មេធាវីលោក Trump នេះកាលពីថ្ងៃចន្ទ និងបានកំណត់ថ្ងៃផុតកំណត់ត្រឹមថ្ងៃសុក្រសប្ដាហ៍នេះសម្រាប់ភាគីខាងលោក Trump និងភាគីខាងក្រសួងយុត្តិធម៌នៅក្នុងការផ្ដល់បញ្ជីឈ្មោះបេក្ខជនដែលអាចធ្វើជាអ្នកជំនាញពិសេសនេះ៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន Associated Press និងទីភ្នាក់ងារព័ត៌មាន Reuters។
សេចក្ដីរាយការណ៍៖ ក្នុងចំណោមឯកសារដែលរឹបអូសពីភូមិគ្រឹះលោក Trump មានឯកសារអំពីសមត្ថភាពនុយក្លេអ៊ែររបស់ប្រទេសមួយ
