អតីតប្រធានាធិបតីសហរដ្ឋអាមេរិកលោក Donald Trump បានចាកចេញពីរដ្ឋធានីវ៉ាស៊ីនតោនដោយយកទៅជាមួយនូវឯកសារសម្ងាត់ចំនួនជាង ៧០០ ទំព័រ ដែលក្នុងនោះរួមមានទាំងឯកសារសម្ងាត់បំផុតរបស់រដ្ឋាភិបាលមួយចំនួនផងដែរ នៅពេលលោកបញ្ចប់អាណត្តិជាប្រធានាធិបតីរបស់លោកកាលពីខែមករាឆ្នាំមុន។ នេះបើតាមការបង្ហាញឱ្យដឹងរបស់ប័ណ្ណសារដ្ឋានជាតិសហរដ្ឋអាមេរិកកាលពីថ្ងៃអង្គារ។
ការបង្ហាញនេះបានធ្វើឡើងនៅក្នុងលិខិតមួយច្បាប់ចុះថ្ងៃទី ១០ ខែឧសភារបស់អ្នកស្រី Debra Steidel Wall នាយិកាស្ដីទីនៃប័ណ្ណសារដ្ឋានជាតិសហរដ្ឋអាមេរិក ដែលផ្ញើទៅកាន់លោក Evan Corcoran ដែលជាមេធាវីមួយរូបរបស់លោក Trump។
អ្នកស្រី Wall បានច្រានចោលការអះអាងរបស់ក្រុមមេធាវីលោក Trump ដែលថាលោក Trump គួរត្រូវបានអនុញ្ញាតិឲ្យរក្សាទុកឯកសារសម្ងាត់ខ្លះតាមរយៈបុព្វសិទ្ធិរបស់លោកជាប្រធានាធិបតីនៅពេលលោកកាន់តំណែងនៅសេតវិមាន។
អ្នកស្រី Wall បានបញ្ជាក់ទៀតថា មានការព្រួយបារម្ភបន្ទាន់កាន់តែខ្លាំងនៅផ្នែកសន្តិសុខជាតិនៃក្រសួងយុត្តិធម៌អំពី «ការខូចខាតដែលអាចកើតឡើង ដោយសារតែឯកសារទាំងនេះត្រូវបានប្រមូលទុកនិងបញ្ជូន» ទៅកាន់ភូមិគ្រឹះ Mar-a-Lago របស់លោក Trump ជាជាងបញ្ជូនទៅកាន់ប័ណ្ណសារដ្ឋានជាតិដូចដែលច្បាប់តម្រូវ នៅពេលដែលលោក Trump បញ្ចប់អាណត្តិរបស់លោកជាប្រធានាធិបតី។
លិខិតរបស់អ្នកស្រី Wall បានបញ្ជាក់ថាមាន «ឯកសារជាង ១០០ ដែលមានដាក់ស្លាកថាជាឯកសារសម្ងាត់» នៅក្នុងប្រអប់ចំនួន ១៥ ដែលរដ្ឋាភិបាលបានដកហូតពីភូមិគ្រឹះរបស់លោក Trump កាលពីខែមករា។
លោក Trump និងជំនួយការរបស់លោកបានប្រគល់ឯកសារបន្ថែមទៀតជូនប័ណ្ណសារដ្ឋានជាតិកាលពីខែមិថុនា ហើយបន្ទាប់មក ទីភ្នាក់ងារស៊ើបអង្កេតសហព័ន្ធ (FBI) បានបំពេញកិច្ចការតាមដីកាឆែកឆេររបស់តុលាការ ដោយបានរកឃើញឯកសារជាង ២០ ប្រអប់ទៀតកាលពីថ្ងៃទី ៨ ខែសីហានៅភូមិគ្រឹះរបស់លោក Trump ដែលក្នុងនោះប្រអប់ចំនួន ១១ មានផ្ទុកឯកសារសម្ងាត់។
កន្លងមក លោក Trump បានអះអាងថា លោកបានចាត់ទុកឯកសារទាំងនោះថាលែងជាឯកសារសម្ងាត់នៅមុនពេលដែលអាណត្តិជាប្រធានាធិបតីរបស់លោកបានបញ្ចប់នៅថ្ងៃទី ២០ ខែមករា ឆ្នាំ ២០២១ ប៉ុន្តែទាំងលោក Trump និងទាំងជំនួយការរបស់លោកមិនបានផ្ដល់ភស្តុតាងជាលាយលក្ខណ៍អក្សរណាមួយអំពីការអះអាងរបស់លោកនេះទេ៕
