ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ចៅក្រម​អនុញ្ញាត​ឱ្យ​មាន​ការពិនិត្យ​ដោយ​ឯករាជ្យ​លើ​ឯកសារ​ដែល​រក​ឃើញ​នៅ​ភូមិគ្រឹះ​លោក Trump


ឯកសារមួយសន្លឹកនៃបទបញ្ជារបស់ចៅក្រមនេះផ្ដល់ការយល់ព្រមតាមសំណើរបស់ក្រុមមេធាវីរបស់អតីតប្រធានាធិបតីសហរដ្ឋអាមេរិកលោក Donald Trump ដែលស្នើឱ្យមានការតែងតាំងអ្នកជំនាញពិសេសដើម្បីពិនិត្យលើឯកសារដែលទីភ្នាក់ងារ FBI បានរឹបអូសពីភូមិគ្រឹះ Mar-a-Lago របស់លោក Trump ថតនៅថ្ងៃទី៥ ខែកញ្ញា ឆ្នាំ២០២២។
ឯកសារមួយសន្លឹកនៃបទបញ្ជារបស់ចៅក្រមនេះផ្ដល់ការយល់ព្រមតាមសំណើរបស់ក្រុមមេធាវីរបស់អតីតប្រធានាធិបតីសហរដ្ឋអាមេរិកលោក Donald Trump ដែលស្នើឱ្យមានការតែងតាំងអ្នកជំនាញពិសេសដើម្បីពិនិត្យលើឯកសារដែលទីភ្នាក់ងារ FBI បានរឹបអូសពីភូមិគ្រឹះ Mar-a-Lago របស់លោក Trump ថតនៅថ្ងៃទី៥ ខែកញ្ញា ឆ្នាំ២០២២។

កាលពី​ថ្ងៃ​ចន្ទ ចៅក្រម​សហព័ន្ធ​សហរដ្ឋ​អាមេរិក​បាន​យល់ព្រម​តាម​សំណើ​របស់​អតីត​ប្រធានាធិបតី​សហរដ្ឋ​អាមេរិក​លោក Donald Trump ដែល​ស្នើ​ឱ្យ​មាន​ការ​តែងតាំង​អ្នក​ជំនាញ​ពិសេស​ឯករាជ្យ​ដើម្បី​ពិនិត្យ​លើ​ឯកសារ​ផ្នែក​សន្តិសុខ​ជាតិ​រាប់​ពាន់​ទំព័រ​និង​ឯកសារ​ផ្សេងៗ​ទៀត​ដែល​រឹបអូស​បាន​ពី​ភូមិគ្រឹះ Mar-a-Lago របស់​លោក​នៅ​ក្នុង​រដ្ឋ Florida ដើម្បី​កំណត់​ថា​តើ​ឯកសារ​មួយ​ចំនួន​ក្នុង​ចំណោម​នោះ​គួរតែ​ប្រគល់​ជូន​លោក​វិញ ​ឬ​ក៏​យ៉ាង​ណា​នោះ។

ចៅក្រម​សហព័ន្ធ​អ្នកស្រី Aileen Cannon នៅ​ក្នុង​រដ្ឋ Florida បាន​អនុញ្ញាត​ឱ្យ​មាន​ការ​តែងតាំង​អ្នក​ជំនាញ​ពិសេស​នេះ បើ​ទោះបីជា​ក្រសួង​យុត្តិធម៌​ធ្លាប់​បាន​ជំទាស់​ក៏ដោយ។ ក្រសួង​យុត្តិធម៌​បាន​ប្រាប់​អ្នកស្រី​ចៅក្រម Cannon កាលពី​សប្ដាហ៍​មុន​ថា ខ្លួន​បាន​បញ្ចប់​រួចរាល់​ហើយ​នូវ​ការ​ពិនិត្យ​លើ​ឯកសារ​សម្ងាត់​ខ្លាំង​និង​ឯកសារ​ផ្សេងៗ​ទៀត​ដែល​បាន​រឹបអូស​ពី​ភូមិគ្រឹះ​របស់​លោក Trump តាម​ដីកា​ឆែកឆេរ​របស់​តុលាការ​កាលពី​ថ្ងៃ​ទី ៨ ខែ​សីហា។

ក្រសួង​យុត្តិធម៌​បាន​បញ្ជាក់​ថា ក្នុង​ចំណោម​ឯកសារ​ទាំង ១១.០០០ ទំព័រ ដែល​ខ្លួន​បាន​រឹបអូស ខ្លួន​បាន​រក​ឃើញ​ឯកសារ​ចំនួន​ប្រហែល ៥០០ ទំព័រ​ដែល​អាច​ជា​ឯកសារ​បុព្វសិទ្ធិ​ប្រធានាធិបតី​ដែល​គួរតែ​អាច​ប្រគល់​ជូន​លោក Trump វិញ។ អ្នកស្រី​ចៅក្រម Cannon បាន​បញ្ជាក់​នៅ​ក្នុង​សេចក្ដី សម្រេច​ថា ឯកសារ​បុព្វសិទ្ធិ​ទាំង​នោះ​រួម​មាន​ព័ត៌មាន​ផ្នែក​សុខភាព ព័ត៌មាន​ផ្នែក​គណនេយ្យ និង​សារ​ឆ្លើយឆ្លង​ពាក់ព័ន្ធ​នឹង​ពន្ធ​ជាដើម។

អ្នកស្រី Cannon បាន​បញ្ជា​មេធាវី​របស់​ក្រសួង​យុត្តិធម៌​និង​មេធាវី​របស់​លោក Trump ឱ្យ​ប្រគល់​ជូន​អ្នកស្រី​នៅ​ត្រឹម​ថ្ងៃ​សុក្រ​សប្ដាហ៍​នេះ​នូវ​បញ្ជី​ឈ្មោះ​បេក្ខជន​ដែល​អាច​ធ្វើ​ជា​អ្នក​ជំនាញ​ពិសេស​ឯករាជ្យ​ដើម្បី​ពិនិត្យ​លើ​ឯកសារ​ដែល​រឹបអូស​បាន​ពី​ភូមិគ្រឹះ​របស់​លោក Trump។

អ្នកស្រី​បាន​បន្ថែម​ថា មេធាវី​ភាគី​ទាំង​សង​ខាង​ក៏​គួរតែ​ចរចា​ផងដែរ​អំពី «កាតព្វកិច្ច​និង​លក្ខខណ្ឌ​កំណត់» សម្រាប់​អ្នក​ជំនាញ​ពិសេស​ដែល​ត្រូវ​តែងតាំង​នោះ និង​គួរតែ​ស្នើ​នូវ​ពេលវេលា​ជាក់លាក់​សម្រាប់​ការ​បញ្ចប់​ការ​ត្រួត​ពិនិត្យ​នេះ។

ដោយ​តម្រូវ​ឱ្យ «រង់ចាំ​ឱ្យ​មាន​ការ​បញ្ចប់​រួចរាល់​ជា​មុន​សិន​នូវ​ការ​ពិនិត្យ​របស់​អ្នក​ជំនាញ​ពិសេស» ឬ​ក៏​បទ​បញ្ជា​ថ្មី​ពី​តុលាការ អ្នកស្រី​ចៅក្រម Cannon ក៏​បាន​បញ្ជា​ផង​ដែរ​ឱ្យ​ក្រសួង​យុត្តិធម៌​បញ្ឈប់​ការ​ស៊ើប​អង្កេត​ព្រហ្មទណ្ឌ​របស់​ខ្លួន​លើ​ករណី​ថា​តើ​ហេតុអ្វី​បាន​ជា​លោក Trump យក​ឯកសារ​សម្ងាត់​ខ្លាំង​ទៅ​ជាមួយ​លោក​នៅ​ពេល​លោក​បញ្ចប់​អាណត្តិ​ជា​ប្រធានាធិបតី​កាលពី​ខែ​មករា ឆ្នាំ ២០២១ ជា​ជាង​ប្រគល់​ឯកសារ​ទាំង​នោះ​ជូន​ប័ណ្ណសារដ្ឋាន​ជាតិ​ដូច​ដែល​ច្បាប់​តម្រូវ។

ប៉ុន្តែ អ្នកស្រី​បាន​និយាយ​ថា ទោះបីជា​មាន​ការ​ផ្អាក​រឿង​ការ​ស៊ើប​អង្កេត​ព្រហ្មទណ្ឌ​នេះ​ក៏ដោយ ក៏​អ្នក​ជំនាញ​ផ្នែក​ស៊ើបការណ៍​សម្ងាត់​របស់​រដ្ឋាភិបាល​នៅតែ​អាច​បន្ត​ពិនិត្យ​ថា​តើ​ផល​ប្រយោជន៍​សន្តិសុខ​ជាតិ​របស់​សហរដ្ឋ​អាមេរិក​មាន​បាន​រង​ការ​ប៉ះពាល់​ដោយសារ​ការ​រក្សាទុក​របស់​លោក Trump នូវ​ឯកសារ​ទាំង​នេះ​នៅ​ឯ​ភូមិគ្រឹះ​របស់​លោក​ឬ​ក៏​អត់៕

អត្ថបទ​ទាក់ទង

XS
SM
MD
LG