សេរីភាពសារព័ត៌មានកំពុងស្ថិតក្រោមការវាយប្រហារនៅទូទាំងពិភពលោក ដោយសារតែអាជ្ញាធរព្យាយាមបំបិទការរាយការណ៍ព័ត៌មានសំខាន់ៗនានា តាមរយ:ការចាប់អ្នកកាសែតដាក់ពន្ធនាគារ។ នេះបើយោងតាមរបាយការណ៍ថ្មីមួយរបស់គណៈកម្មាធិការការពារអ្នកសារព័ត៌មាន (CPJ)។
របាយការណ៍ប្រចាំឆ្នាំរបស់អង្គការ CPJ នេះ បានបង្ហាញថា អ្នកកាសែតចំនួន ២៧៤ នាក់កំពុងជាប់ពន្ធនាគារនៅទូទាំងពិភពលោក ដោយប្រទេសចិន ទួរគី អេហ្ស៊ីប និងអារ៉ាប៊ីសាអូឌីត នាំមុខគេក្នុងនាមជាអ្នកបំពានខ្លាំងក្លាបំផុត។ នេះជាឆ្នាំទី ៥ ជាប់ៗគ្នាហើយ ដែលមានអ្នកសារព័ត៌មានលើសពី ២៥០ នាក់ក្នុងមួយឆ្នាំ ត្រូវបានគេចាប់ដាក់ពន្ធនាគារ។
អ្នកស្រី Courtney Radsch ប្រធានផ្នែកតស៊ូមតិនៃអង្គការ CPJ បានប្រាប់ VOA ថា ឆ្នាំ ២០២០ នេះ គឺជាឆ្នាំដែលមាន «កំណត់ត្រាអាក្រក់បំផុត» ដោយសារមូលហេតុពីរ។
អ្នកស្រី Radsch បញ្ជាក់ដូច្នេះថា៖ «មូលហេតុទីមួយគឺការឆ្លើយតបចំពោះជំងឺកូវីដ១៩ នៅលើពិភពលោក ដែលបានធ្វើឲ្យមានការកើនឡើងនៃការប្រើការចោទប្រកាន់ប្រឆាំងនឹងអ្នកកាសែតពីបទផ្សព្វផ្សាយព័ត៌មានមិនពិត និងការសងសឹងចំពោះការផ្សាយព័ត៌មានឯករាជ្យ។ ហើយ [មូលហេតុមួយទៀត] គឺតាមរយ:ការបង្ក្រាបទាក់ទិននឹងការតវ៉ានានា។ យើងបានសង្កេតឃើញថា អ្នកកាសែត ជាទូទៅជាមនុស្សដំបូងដែលត្រូវបានគេចាប់ខ្លួន ដាក់ឃុំ និងជាគោលដៅមុនគេ នៅក្នុងការតវ៉ាទាំងនោះ»៕
