ពួកមន្ត្រីបាននិយាយកាលពីថ្ងៃអង្គារថា មានពួកជនទេសន្តរប្រវេសន៍ច្រើននាក់បានចូលក្នុងប្រទេសហុងគ្រី (Hungary) និងផ្នែកជាច្រើនទៀតនៃទ្វីបអឺរ៉ុប។ ទីភ្នាក់ងារអ.ស.ប.ខាងជនភៀសខ្លួនបានអំពាវនាវដល់រដ្ឋាភិបាលទាំងអស់ឱ្យឆ្លើយតបដោយមេត្តាធម៌ដល់មនុស្សជាច្រើននាក់ទាំងនេះដែលបានខ្ចាត់ព្រាត់ពីប្រទេសពួកគេ ហើយដែលនៅពេលនេះកំពុងស្វះស្វែងរកកន្លែងមានសុវត្ថិភាព។
ប្រទេសហុងគ្រី បានចុះឈ្មោះក្រុមជនចំណាកស្រុកជាងមួយសែននាក់ក្នុងឆ្នាំ២០១៥នេះ គឺមានជាងពីរដងនៃចំនួនកាលពីឆ្នាំទៅមិញ។ អាជ្ញាធរបាននិយាយថា មានមនុស្សជិត២.១០០នាក់បានឆ្លងកាត់ព្រំដែនកាលពីថ្ងៃចន្ទ ដែលជាចំនួនច្រើនបំផុតដែលបានឆ្លងកាត់ព្រំដែនក្នុងពេលមួយថ្ងៃ។
ប្រទេសហុងគ្រីដែលជាសមាជិកមួយនៃសហហភាពអឺរ៉ុបកំពុងប្រញាប់ប្រញាល់បញ្ចប់ការកសាងកំផែងមួយដើម្បីត្រួតត្រាការហូរចូលនៃក្រុមជនទេសន្តរប្រវេសន៍ដែលបានចូលក្នុងប្រទេសស៊ែបប៊ី ដើម្បីឱ្យបានទៅដល់ព្រំដែននៃរដ្ឋមួយរបស់សហភាពអឺរ៉ុប ដែលនៅទីនោះពួកគេសង្ឃឹមថានឹងមានជំនួយ ទីជម្រកនិងការងារធ្វើ។
ពួកជនចំណាកស្រុករាប់ពាន់នាក់ដែលភាគច្រើនបំផុតមកពីប្រទេសស៊ីរី អ៊ីរ៉ាក់និងប្រទេសអាហ្វហ្គានីស្ថាន(Afghanistan) បានដើរតាមមាគារនោះក្រោយពីបានឆ្លងកាត់សមុទ្រមេឌីទែរានេ (Mediterranee) ដើម្បីឡើងគោកក្នុងប្រទេសក្រិក។ ជាដំបូងឡើយពួកប៉ូលិសក្នុងប្រទេសម៉ាសេដូនី (Macedoine) បានរារាំងពួកជនទាំងនេះមិនឱ្យឆ្លងកាត់ប្រទេសនេះទេ ក៏ប៉ុន្តែនៅក្រោយមានការប៉ះទង្គិចគ្នាកាលពីថ្ងៃសុក្រនិងថ្ងៃសៅរ៍មក ពួកជនទេសន្តរប្រវេសន៍ទាំងនោះបានបន្តទៅមុខកាត់ពួកប៉ូលិស ហើយបានបន្តដំណើរទៅដល់ប្រទេសស៊ែបប៊ី៕
