អ្នកកាន់ទុក្ខគ្រប់ស្រទាប់វណ្ណៈបាននាំគ្នាឈរតម្រង់ជួរនៅថ្ងៃព្រហស្បតិ៍នេះដើម្បីដើរកាត់មឈូសរបស់ព្រះមហាក្សត្រិយានី Elizabeth ទី ២ ដែលកំពុងតម្កល់ជាផ្លូវរដ្ឋនៅក្នុងសាល Westminster នៃសភាចក្រភពអង់គ្លេស ដើម្បីគោរពព្រះសពរបស់ព្រះអង្គ មុនពេលព្រះរាជពិធីបញ្ចុះព្រះសពធ្វើឡើងនៅថ្ងៃចន្ទសប្ដាហ៍ក្រោយ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
មនុស្សបាននាំគ្នាឈរតម្រង់ជួរអស់រយៈពេលរាប់ម៉ោងកាលពីយប់មិញ។ មកទល់នឹងពាក់កណ្តាលព្រឹកនេះ ជួរមនុស្សបានកើនដល់ប្រវែងប្រហែល ៥ គីឡូម៉ែត្រ នៅតាមបណ្តោយមាត់ទន្លេ Thames កាត់តាមស្ពាន Lambeth ក្បែរសាល Westminster។
ព្រះមហាក្សត្រ Charles ទី ៣ បានយាងទៅកាន់ព្រះរាជដំណាក់ Highgrove របស់ព្រះអង្គវិញ បន្ទាប់ពីទ្រង់បានចូលរួមក្នុងព្រះរាជពិធីបុណ្យព្រះសពរបស់ព្រះមាតាដែលបានរៀបចំធ្វើឡើងអស់រយៈពេលប៉ុន្មានថ្ងៃមកនេះ។
មន្ត្រីនានារំពឹងថា មនុស្សប្រមាណ ៧៥០.០០០ នាក់ នឹងមកគោរពព្រះសពរបស់ព្រះមហាក្សត្រិយានី មុនការតម្កល់ព្រះសពជាផ្លូវរដ្ឋនេះចប់សព្វគ្រប់នៅវេលាម៉ោង ៦ កន្លះព្រឹកនៅថ្ងៃចន្ទសប្ដាហ៍ក្រោយ។
អ្នកខ្លះបានធ្វើដំណើរមកពីបរទេស ហើយទម្លាក់វ៉ាលីសនៅសណ្ឋាគារក្បែរៗនោះ និងបន្ទាប់មកនាំគ្នាទៅចូលរួមជាមួយអ្នកផ្សេងទៀត ដែលដើរយឺតៗក្នុងជួរដ៏វែងដើម្បីទៅគោរពព្រះសពរបស់ព្រះមហាក្សត្រិយានី។
អ្នកខ្លះទៀតបានរូតរះធ្វើដំណើរតាំងពីព្រឹកព្រលឹមស្រាងៗ ដើម្បីឱ្យបានទៅដល់មុនគេ មុនពេលមនុស្សជាច្រើនទៅដល់។ មនុស្សជាច្រើនបាននាំគ្នាជូតទឹកភ្នែក។
កម្រងរូបភាព៖ ព្រះសពព្រះមហាក្សត្រិយានី Elizabeth ទី ២ ត្រូវដង្ហែចេញពីរាជវាំងទៅតម្កល់នៅសភា
ព្រះសពរបស់ព្រះមហាក្សត្រិយានី Elizabeth ទី ២ ត្រូវបានដង្ហែពីទីក្រុង Edinburgh ទៅកាន់ទីក្រុងឡុងដ៏កាលពីថ្ងៃអង្គារ។ ព្រះអង្គបានសោយទិវង្គតកាលពីថ្ងៃព្រហស្បតិ៍សប្តាហ៍មុនក្នុងព្រះជន្ម ៩៦ ព្រះវស្សា ក្រោយពីទ្រង់បានសោយរាជ្យអស់រយៈពេល ៧០ ឆ្នាំ។
ព្រះរាជពិធីបុណ្យព្រះសពរបស់ព្រះអង្គគ្រោងនឹងធ្វើឡើងនៅថ្ងៃចន្ទសប្ដាហ៍ក្រោយនៅឯព្រះវិហារ Westminster Abbey។ បន្ទាប់មក មឈូសរបស់ព្រះអង្គនឹងត្រូវដង្ហែទៅកាន់ក្រុង Windsor ដើម្បីធ្វើព្រះរាជពិធីបញ្ចុះព្រះសព។ ព្រះសពរបស់ព្រះអង្គម្ចាស់ Philip ដែលជាព្រះស្វាមីរបស់ព្រះមហាក្សត្រិយានី Elizabeth ទី ២ ត្រូវបានបញ្ចុះនៅទីនោះកាលពីខែមេសា ឆ្នាំ ២០២១៕