ប្រធានាធិបតីរុស្ស៊ីលោក Vladimir Putin បានប្រាប់អ្នកចូលរួមនៅក្នុងពិធីក្បួនព្យុហយាត្រាទិវាជ័យជម្នះប្រចាំឆ្នាំនៅថ្ងៃអង្គារនេះថា «សង្គ្រាមពិតប្រាកដ» ត្រូវបានធ្វើឡើងដោយក្រុមបស្ចិមប្រទេសប្រឆាំងនឹងរុស្ស៊ី។
នៅក្នុងសុន្ទរកថាខ្លីមួយនៅទីលាន Red Square ក្នុងទីក្រុងមូស្គូ ក្នុងពិធីប្រារព្ធជ័យជម្នះរបស់អតីតសហភាពសូវៀតលើពួកណាហ្ស៊ីអាល្លឺម៉ង់ក្នុងសម័យសង្គ្រាមលោកលើកទីពីរ លោក Putin បាននិយាយថា «ជាថ្មីម្ដងទៀត អរិយធម៌ស្ថិតនៅចំណុចរបត់ផ្ដាច់ព្រ័ត្រមួយ» និងថា សង្គ្រាមត្រូវបាន «ធ្វើឡើងប្រឆាំងនឹងមាតុភូមិរបស់យើង»។
នៅក្នុងសុន្ទរកថានោះ លោក Putin បានប្រៀបធៀបការទទួលបានជ័យជម្នះលើពួកណាហ្ស៊ីអាល្លឺម៉ង់ជាមួយនឹងការឈ្លានពានរយៈពេល ១៥ ខែកន្លងមករបស់រុស្ស៊ីលើអ៊ុយក្រែន។ លោកបានប្រើពាក្យ «ការប្រឆាំងនឹងលទ្ធិណាហ្ស៊ីរបស់អ៊ុយក្រែន» ម្ដងហើយម្ដងទៀត ដើម្បីធ្វើជាហេតុផលសម្រាប់ការធ្វើសង្គ្រាមនេះ។ លោកបានបញ្ចប់សុន្ទរកថាដោយការអបអរលើកទឹកចិត្តទាហានរុស្ស៊ីដែលប្រយុទ្ធនៅអ៊ុយក្រែនដែលមានវត្តមាននៅក្នុងពិធីនោះ ដោយលោកបាននិយាយថា ទាហានទាំងនោះគឺសំខាន់សម្រាប់អនាគតរបស់ប្រទេសរុស្ស៊ី។
លោកថ្លែងដូច្នេះថា៖ «ដើម្បីរុស្ស៊ី ដើម្បីកងទ័ពរបស់យើង ដើម្បីជ័យជម្នះ!»។
មេដឹកនាំនៃប្រទេសចំនួន ៦ ដែលធ្លាប់ស្ថិតក្រោមអតីតសហភាពសូវៀត បានអមដំណើរលោក Putin ទៅកាន់ក្បួនព្យុហយាត្រាទិវាជ័យជម្នះនេះ។
ក្បួនព្យុហយាត្រានៅថ្ងៃអង្គារនេះគឺជាការបង្ហាញអំពីព្រឹត្តិការណ៍រំឭកប្រចាំឆ្នាំដែលការប្រារព្ធជាទូទៅធ្វើឡើងនៅទូទាំងប្រទេសរុស្ស៊ី ដែលក្នុងនោះរួមមានទាំងការដើរក្បួនរបស់កងវរសេនាធំអមតៈរបស់រុស្ស៊ីផងដែរ ដោយពលរដ្ឋរុស្ស៊ីសាមញ្ញដើរក្បួនកាត់តាមដងផ្លូវនៃទីក្រុងនានាកាន់រូបថតសាច់ញាតិដែលត្រូវបានសម្លាប់នៅក្នុងសង្គ្រាមលោកលើកទីពីរ។
ប៉ុន្តែ ទីក្រុងយ៉ាងតិចចំនួន ២០ បានលុបចោល ឬក៏កាត់បន្ថយទំហំនៃព្រឹត្តិការណ៍ទិវាជ័យជម្នះនេះ ដោយលើកឡើងអំពី «ក្ដីបារម្ភផ្នែកសន្តិសុខ» ដែលមិនបញ្ជាក់ឱ្យបានច្បាស់ដែលទំនងជាពាក់ព័ន្ធទៅនឹងការចោទប្រកាន់របស់រុស្ស៊ីដែលថា អ៊ុយក្រែនបានធ្វើការវាយប្រហារដោយដ្រូនលើវិមានប្រធានាធិបតីរុស្ស៊ីកាលពីសប្ដាហ៍មុនដើម្បីប៉ុនប៉ងសម្លាប់លោក Putin។ អ៊ុយក្រែនបានច្រានចោលការចោទប្រកាន់នេះ៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន AP ទីភ្នាក់ងារព័ត៌មាន Reuters និងទីភ្នាក់ងារព័ត៌មាន AFP។
