ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃចន្ទនេះថា កងទ័ពរុស្ស៊ីនៅអ៊ុយក្រែននឹងត្រូវបរាជ័យដូចពួកណាហ្ស៊ីអាល្លឺម៉ង់ដែលត្រូវបានបរាជ័យនៅក្នុងសម័យសង្គ្រាមលោកលើកទីពីរដូច្នេះដែរ។
លោក Zelenskyy បានបញ្ជាក់នៅក្នុងសារជាវីដេអូមួយថា៖ «យើងប្រយុទ្ធនៅពេលនោះ ហើយយើងប្រយុទ្ធនៅពេលឥឡូវនេះ ដើម្បីកុំឱ្យប្រទេសណាមួយយកប្រទេសផ្សេងទៀតធ្វើជាទាសករម្ដងទៀតនិងបំផ្លាញប្រទេសទាំងនោះ។ អំពើអាក្រក់ទាំងអស់នោះដែលប្រទេសរុស្ស៊ីសម័យទំនើបបាននាំត្រឡប់យកមកវិញនឹងត្រូវបរាជ័យដូចលទ្ធិណាហ្ស៊ីដែលត្រូវបានបរាជ័យដូច្នេះដែរ»។
លោក Zelenskyy បាននិយាយថា គោលបំណងរបស់រុស្ស៊ីនៅអ៊ុយក្រែនគឺ «ការយកធ្វើជាទាសករ ឬក៏ការបំផ្លិចបំផ្លាញ» ហើយលោកបានប្រៀបធៀបការគាំទ្រដែលអ៊ុយក្រែនបានទទួលពីប្រទេសផ្សេងៗទៅនឹងកិច្ចប្រឹងប្រែងរបស់សម្ព័ន្ធមិត្តក្នុងការធ្វើឱ្យអាល្លឺម៉ង់បរាជ័យនៅក្នុងឆ្នាំ១៩៤៥។
លោក Zelenskyy ថ្លែងដូច្នេះថា៖ «ជាថ្មីម្ដងទៀត សត្រូវនេះបានយកភាពគឃ្លើននិងការភ្ជាប់យកទឹកដី ការត្រួតត្រានិងការចាប់បញ្ជូនមនុស្សចេញពីប្រទេស ការសម្លាប់ទ្រង់ទ្រាយធំ ការធ្វើទារុណកម្ម ការបាញ់ផ្លោងលើទីក្រុង និងការដុតភូមិឋាននានាមកប្រឆាំងនឹងឧត្តមគតិរបស់យើង។ ជ័យជម្នះរបស់យើងនឹងក្លាយជាចម្លើយចំពោះរឿងទាំងនេះ។ ជ័យជម្នះរបស់អ៊ុយក្រែននិងពិភពសេរី ការរំដោះទឹកដីរបស់យើង ការត្រឡប់មកវិញនៃប្រជាជនរបស់យើង ការការពារគុណតម្លៃនិងយុត្តិធម៌ដែលមិនអាចជៀសបានរបស់យើង»។
ការលើកឡើងរបស់លោក Zelenskyy នេះក៏រួមមានផងដែរនូវការប្រកាសក្រឹត្យមួយដើម្បីរំឭកអំពីជ័យជម្នះលើអាល្លឺម៉ង់ក្នុងសម័យសង្គ្រាមលោកលើកទីពីរដែលធ្វើឡើងនៅថ្ងៃទី ៨ ខែឧសភា ដូចដែលសម្ព័ន្ធមិត្តបស្ចិមប្រទេសនានាធ្វើឡើងដូច្នេះដែរ។ ករណីនេះគឺផ្ទុយទៅនឹងប្រទេសរុស្ស៊ី ដែលរៀបចំការប្រារព្ធរបស់ខ្លួននៅថ្ងៃទី ៩ ខែឧសភា។
លោក Zelenskyy បានបញ្ជាក់ថា អ៊ុយក្រែននឹងប្រើថ្ងៃទី ៩ ខែឧសភាដើម្បីរំឭកដល់ការគាំទ្ររបស់អឺរ៉ុបចំពោះអ៊ុយក្រែននៅក្នុងពេលបន្ទាប់ពីរុស្ស៊ីបានភ្ជាប់យកតំបន់ Crimea និងបន្ទាប់ពីកងទ័ពរុស្ស៊ីបានធ្វើការឈ្លានពានទ្រង់ទ្រាយធំលើអ៊ុយក្រែនកាលពីឆ្នាំមុនមក៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, AFP និងReuters
លោក Zelenskyy ថា រុស្ស៊ី «នឹងបរាជ័យដូចពួកណាហ្ស៊ីអាល្លឺម៉ង់» ដូច្នេះដែរ
